2017 թվականի առաջին տասնօրյակը հագեցած էր տարատեսակ իրադարձություններով՝ ինչպես ուրախ տոնական, այնպես էլ ողբերգական: Համառոտ ներկայացնենք այս տարվա 9 օրերի կարեւորագույն լուրերը:

Նախ՝ սահմանային իրավիճակի մասին: Ադրբեջանական կողմն «ավանդույթը» չի խախտել. տարեմուտի գիշերվանից սկսած հակառակորդը պարբերաբար խախտել է հրադադարի ռեժիմը՝ օգտագործելով իր զինանոցի մեծ մասը. ինքնաձիգ, գնդացիր, ականանետ, դիպուկահար: Բարեբախտաբար, հայկական կողմից զոհեր եւ վիրավորներ չեն եղել:

Իսկ ամանորի նախաշեմին վիրավորված Արցախի պաշտպանության բանակի զինծառայող Գարիկ Վարդանյանի վիճակը շարունակում է մնալ ծայրահեղ ծանր: Նա զինվորական հոսպիտալի Վերակենդանացման բաժանմունքում է, անգիտակից վիճակում: Գարիկ Վարդանյանը վիրավորվել է դեկտեմբերի 31-ին, Ադրբեջանի զինված ուժերի կողմից ղարաբաղա-ադրբեջանական շփման գծի հյուսիս-արեւելյան ուղղությամբ հրադադարի ռեժիմը խախտելու հետեւանքով:

Սարդարապատի հուշահամալիրից մեկնարկել է 2017 թվականի առաջին զորակոչը՝ պաշտպանության նախարարի մասնակցությամբ: Վիգեն Սարգսյանը փաստել է. նորակոչիկները ոգեւորությամբ են մեկնում ծառայության:

Իսկ բանակի վերազինումն ու արդիական տեխնիկայով ապահովումը, ըստ Վիգեն Սարգսյանի, մշտական գործընթաց են: Նա ներկայացրել է մի քանի նորամուծություն. զինվորները ծառայության են մեկնում՝ հենց հավաքակայանում հանդերձավորվելով, վիճակահանությամբ իրենք են որոշում այն վայրը, որտեղ պետք է ծառայություն անցնեն: Բացի այդ, այսուհետ նորակոչիկներն առաջին վեց ամիսը կծառայեն ուսումնական զորամասերում, հետո միայն մարտական հերթապահության կմեկնեն:

Ինչ վերաբերում է առողջական խնդիրներ ունեցող երիտասարդներին բանակ զորակոչելուն. նախարարը վստահեցրել է, որ Հանրապետական հանձնաժողովի առջեւ սկզբունքային խնդիր է դրվել՝ ուսումնասիրել հիվանդությունների վերաբերյալ յուրաքանչյուր առանձին դեպք:

Արտակարգ միջադեպ Գեղարքունիքում: Սպանվել է Գեղարքունիքի փոխմարզպետ Անդրանիկ Հակոբյանի որդին՝ 29-ամյա Հայկ Հակոբյանը: Ըստ տեղեկությունների՝ սպանությանը նախորդել է մեքենան չզիջելու պատճառով ծագած վիճաբանությունը: Դեպքի վայրի զննությամբ հայտնաբերվել է 7 պարկուճ եւ երկու գնդակ: Սպանությունը կատարելու մեջ կասկածվողի ինքնությունը հայտնի է. նա Նորատուսի բնակիչ Մեխակ Հարությունյանն է: Հունվարի 8-ին Հարությունյանը ներկայացել է ոստիկանություն: Քրեական գործ է հարուցվել:

Արմավիրի մարզում հունվարի 8-ին ողբերգական դեպք է տեղի ունեցել: Մուսալեռ գյուղի շենքերից մեկի բնակարանում 3 դի են հայտնաբերել՝ երիտասարդ զույգի եւ 4 ամսական երեխայի: Հայտնի է մահացածների ինքնությունն ու ողբերգության պատճառը. 27-ամյա Հրաչյա Բաղդասարյանը, 20-ամյա Աննա Միսակյանը եւ նրանց դուստրը՝ 4 ամսական Ասյա Բաղդասարյանը, մահացել են գազի արտահոսքի հետեւանքով:

Նրանք Ամանորի առիթով Եղվարդից հյուր էին եկել մոր տուն: Մայրը նախապես զգուշացրել է. վառարանը չի կարելի վառել, խողովակներ չունի: Հավելենք նաեւ, որ մահացած երիտասարդ կինն էքստրասենս Անի Մաջնունյանի սպանության գործով կարեւոր վկա Աննա Միսակյանն է:

Ավելի ուշ նույն շենքի մեկ այլ բնակարանում հայտնաբերել են 46-ամյա Գագիկ Դավթյանի դին: Նրա տանը հրդեհ է բռնկվել, ինչի արդյունքում տղամարդը ծխախեղդ է եղել: Հարեւանների խոսքով՝ Դավթյանը հոգեկան խնդիրներ ուներ:

Դեկտեմբերի 31-ին կալանքից ազատել են «Սասնա ծռեր» խմբին սնունդ տարած Արթուր Սարգսյանին, որը հայտնի է «Հաց բերող» անունով: Արթուր Սարգսյանի նկատմամբ ընտրված խափանման միջոց կալանավորումը փոփոխվել է առողջական խնդիրների պատճառով: Նա տանն է, բժիշկների հսկողության ներքո: Հիշեցնենք, որ Արթուր Սարգսյանը նախ մեղադրվում էր զինված խմբի կազմում նախնական համաձայնությամբ հուլիսի 17-ին ՊՊԾ գնդի տարածք մտնելու մեջ, իսկ հետո մեղադրանքը փոխվեց: Հիմա Սարգսյանին մեղադրում են «Սասնա ծռերին» օժանդակելու համար:

Ամանորի գիշերը Ստամբուլի Reina գիշերային ակումբում ահաբեկչություն է իրականացվել: Շուրջ չորս տասնյակ մարդ զոհվել է, վիրավորների թիվը 70-ի է հասնում: Հարձակման պահին ակումբում 700-800 մարդ է եղել, այդ թվում՝ զբոսաշրջիկներ: Որոշ տեղեկությունների համաձայն՝ չարագործն ակումբ է մտել Ձմեռ պապի հագուստով, որի տակ էլ թաքցրել է Կալաշնիկով տեսակի ավտոմատն ու նռնակները:

Ահաբեկչության պատասխանատվությունը ստանձնել է «Իսլամական պետություն»-ը: Իսկ Թուրքիայի ոստիկանությունը հայտնել է, որ հարձակումն իրականացրողն Ուզբեկստանի քաղաքացի է: Նա փախուստի է դիմել: Ենթադրվում է, որ հանցագործը հեռացել է Թուրքիայից: Հավելենք, որ ահաբեկչության զոհերի եւ վիրավորների թվում Հայաստանի քաղաքացիներ եւ ազգությամբ հայեր չկան:

Մի միջադեպ էլ գրանցվել է Երուսաղեմում: Այստեղ բեռնատարը վրաերթի է ենթարկել անցորդներին: 4 զոհ կա, առնվազն 15 վիրավոր: Իրավապահները գնդակահարել են վարորդին: Հաղորդվում է, որ նա Արեւելյան Երուսաղեմի բնակիչ է: Ոստիկանությունը կատարվածն ահաբեկչություն է որակել: Դեպքը տեղի է ունեցել զբոսաշրջիկների շրջանում հանրահայտ Արմոն խա-Նացիվ հրապարակում:

Անկարգություններ Եվրոպայում: Առանձնապես ուշագրավ է Ֆրանսիայում ձեւավորված վատ ավանդույթը: Տարեմուտի գիշերը ֆրանսիական տարբեր քաղաքներ լուսավորվել են, բայց՝ հրդեհված մեքենաների լույսով. չարագործները շուրջ 650 մեքենա են այրել: Ֆրանսիայի քաղաքների փողոցներում տոնական օրերին կարգը պահպանել են ավելի քան 100 հազար ոստիկաններ, ժանդարմներ, հրշեջներ, բայց սա անհայտորեն բավարար չի եղել հանցագործությունները կանխելու համար:

Կյանքից հեռացել է Իրանի նախկին նախագահ Ալի Աքբար Հաշեմի Ռաֆսանջանին: Նա 82 տարեկան էր: Հունվարի 8-ի երեկոյան Ռաֆսանջանին սրտի կաթվածով հիվանդանոց էր տեղափոխվել: Ալի Ռաֆսանջանին Իրանի Իսլամական հանրապետության նախագահ է եղել 1989-1997 թվականներին:

Թբիլիսիում 67 տարեկանում կյանքից հեռացել է բանաստեղծ, հրապարակախոս, լրագրող Անահիտ Բոստանջյանը: Նա ծնվել է 1949 թվականին, Թբիլիսիում: 1988 թվականից Վրաստանի գրողների միության «Կամուրջ» տարեգրքի գլխավոր խմբագիրն էր: Անահիտ Բոստանջյանն ավելի քան 30 գրքերի հեղինակ է, թարգմանել է վրացի գրողների բազմաթիվ ստեղծագործություններ:

Լավագույն նվերը միայն ինքդ կարող ես քեզ մատուցել: Կոտայքի մարզի Նոր Գեղի գյուղի փողոցներից մեկը վերջերս վերանվանել են գործող գյուղապետ Ֆրոնտիկ Թեւոսյանի անունով: Մեզ հետ զրույցում Թեւոսյանը նախ շեշտեց իր մեծ վաստակի մասին. 30 տարի գյուղապետարանում է աշխատել: Իսկ փողոցի վերանվանումը համագյուղացիների նվերն է իր 72-ամյակին. «Գյուղացիներից մեկը ավագանուն առաջարկություն է արել, ավագանին էլ էդ փողոցն իմ անունով է կոչել: Էդքան բան»: Բայց դա գյուղացիների մեծ սիրո ու հարգանքի միակ հավաստիքը չէ. 12 տարի առաջ՝ 60-ամյա հոբելյանի առիթով, Ֆրոնտիկ Թեւոսյանի անունով է կոչվել նաեւ Նոր Գեղիի երաժշտական դպրոցը:

Հունվարի 9-ին դոլարի փոխարժեքն աճել է, եվրոյինը՝ շուրջ 2 դրամով նվազել: Արդյունքում դոլարի փոխարժեքն այսօր կազմել է 484 դրամ, եվրոյինը՝ 509, ռուբլունը՝ 8 դրամ 9 լումա, ֆունտինը՝ 587 դրամ:

Հունվարի 10-ին հանրապետության որոշ շրջաններում՝ Շիրակում, Կոտայքում, Արագածոտնում, Արարատում եւ Արմավիրում, թույլ ձյուն է սպասվում: Օդի ջերմաստիճանն էապես չի փոխվի: Երեւանում վաղը ձյան թույլ տեղումներ են սպասվում: