Թուրքիայի մայրաքաղաքում հունվարի 19-ին ընդդիմադիր «Ժողովրդահանրապետական» կուսակցության հայ կին պատգամավոր Սելինա Դողանի եւ այլ պատգամավորների մասնակցությամբ տեղի է ունեցել Հրանտ Դինքի սպանության 10-րդ տարելիցին նվիրված հիշատակի միջոցառում։
Թուրքական Evrensel-ի փոխանցմամբ՝ Հրանտ Դինքի հիշատակության համար Անկարայի նախաձեռնության անդամները հավաքվել են Անկարայի Յուքսել պողոտայում, սակայն ոստիկանությունը խոչընդոտել է հավաքվածներին հանդես գալ հայտարարություններով։
Ոստիկանությունը միայն թույլատրել է հարգանքի տուրք մատուցել լռությամբ, սակայն ընթացքում մասնակիցներից մեկը Դինքի հետ կապված ինչ-որ բան է հայտարարել, որից հետո ոստիկանները պահանջել են դադարեցնել միջոցառումը։
Այնուհետ հավաքվածները ստիպված են եղել հիշատակի միջոցառումը տեղափոխել հարեւանությամբ գտնվող միություններից մեկի դահլիճ, որտեղ մասնակիցները դատապարտել են ոստիկանության քայլերը։
Հայ պատգամավոր Սելինա Դողանն իր խոսքում նշել է, թե անընդունելի է, որ հիշատակի միջոցառումն արգելում են պատճառաբանելով երկրում արտակարգ դրությունը։ «Եթե Հրանտ Դինքը ողջ լիներ, կասեր՝ աղջիկս, ոչ մի տեղ էլ չենք գնում, մենք շարունակում ենք պայքարը»-ասել է Սելինա Դողանը։
