PicsArt-ը մեկնարկել է Remix Chat նոր գործառույթ, որի շնորհիվ մինչև 50 օգտատեր կարող են միաժամանակ հաղորդակցվել եւ համատեղ նկարներ խմբագրել հաղորդագրությունների միջոցով: Remix Chat-ը խմբագրման ընթացքն ավելի ինտերակտիվ եւ ստեղծարար է դարձնում, որը կարեւոր քայլ է PicsArt-ի առաքելության համար՝ լինել միասնական, ստեղծարար սոցիալական հարթակ մոբայլ սարքերի համար:
Remix Chat-ում կարելի է օգտագործել PicsArt-ի ցանկացած ֆիլտր, տեքստ, կոլաժ, արհեստական բանականությամբ օժտված Magic Effect կամ 10,000 սթիքերներից ցանկացածը։ Օրինակ՝ կարելի է սեփական նկարների փոխարեն, այլ օգտատերերի հետ համատեղ խմբագրել PicsArt-ում առկա 6 միլիոն #freetoedit նկարներից յուրաքանչյուրը կամ որևէ լուսանկար դարձնել հումորային Թրամփի մազեր կամ Փարթիի տեսք սթիքերների միջոցով, ստեղծել համատեղ մեմեր, շփվել ընկերների հետ:
Remix Chat նոր գործառույթից օգտվելու համար անհրաժեշտ է ներբեռնել PicsArt-ի թարմացված տարբերակը ( PicsArt Photo Studio in the App Store կամ Picsart Photo Studio and Collage for free on Google Play ) եւ սեղմել «ուղիղ հաղորդագրություն» կոճակը, ապա ընտրել լուսանկարը, որը ցանկանում եք ուղարկել։ Ձեր ընկերները նկարը բացելու պահին կտեղափոխվեն PicsArt-ի խմբագրիչ ու կկարողանան նկարի վրա ավելացնել սեփական ռեմիքսը։
«Մենք ուրախ ենք հայտարարել Remix Chat-ի գործարկման մասին, քանի որ սա մեր առաքելության իրականացման հաջորդ քայլն է՝ ստեղծել մեկ միասնական ստեղծարար սոցիալական հարթակ մոբայլ սարքերի համար։ Մարդիկ մինչ օրս PicsArt-ով ստեղծում եւ տարածում էին հիանալի լուսանկարներ, մեմեր եւ մեդիա կոլաժներ։ Այժմ, Remix Chat-ի միջոցով, նրանք այդ ամենը կարող են անել ընկերների հետ զրուցելով, քննարկելով եւ նույն նկարի վրա համատեղ աշխատելով»,- նշել է PicsArt-ի համահիմնադիր եւ գլխավոր գործադիր տնօրեն Հովհաննես Ավոյանը։
Նշենք, որ PicsArt ընկերությունը 2016թ․ մայիսին ներկայացրել էր Remix գործառույթը, որը հնարավորություն է տալիս գտնել նկարներ, խմբագրել դրանք եւ ողջ աշխարհի հետ կիսվել յուրօրինակ ռեմիքսներով։
PicsArt հավելվածը ներկայումս ունի ամսական ավելի քան 85 մլն. ակտիվ օգտատեր իսկ հարթակում լուսանկարների ներբեռնումների թիվն օրական կազմում է 2,5 մլն։