Ազգային ժողովի հերթական քառօրյան կարելի է վերջնականապես տապալված համարել: Այսօր կրկին քվորում չապահովվեց. խորհրդարան էր ներկայացել ընդամենը 14 պատգամավոր: Պատգամավորները, սակայն, որոշել են Ազգային ժողով հասնելուց մի օգուտ ունենալ՝ խմբակային լուսանկար անել: Առաջարկն արել է Հերմինե Նաղդալյանը, դահլիճում ներկա պատգամավորներից մեկն էլ դպրոցական տարիներն է հիշել ու արձագանքել՝ «վինետկայի» նկար:
Գյուղատնտեսության ոլորտում ներկրվող ապրանքները տեղական արտադրանքով փոխարինելու հարցն արդեն մի քանի օր է՝ վարչապետ Կարեն Կարապետյանը քննարկում է տարբեր հանդիպումների ընթացքում: Այսօր էլ հարցին անդրադարձել է կառավարության նիստի ընթացքում: Հանձնարարել է Հայաստանում հանքային եւ կենսաբանական պարարտանյութերի արտադրության ուղղությամբ հնարավոր ներդրումային ծրագրի ամբողջական փաթեթ կազմել:
Ոլորտին վերաբերող եւս մեկ խնդիր. տարիներ շարունակ ֆերմերներին կրթում են, բայց արդյունքն այնքան էլ տեսանելի չէ: Հիմա Կարեն Կարապետյանն առաջարկում է ֆերմերների «սպեցնազ» ստեղծել: Բարեփոխումների կարիք, ընդ որում՝ կտրուկ փոփոխություններով, ունի նաեւ ջրօգտագործման ոլորտը: Բոլորի համար հավասար պայմաններ պետք է ապահովել: Ջրային տնտեսության պետական կոմիտեի նախագահին հանձնարարական ուներ:
Արտեմ Ասատրյանին էլ վարչապետը հանձնարարել է ուսումնասիրել եւ վստահ լինել, որ գազի եւ էլեկտրականության վճարների արտոնություններից իսկապես անապահով ընտանիքներն են օգտվում: Նման դեպքեր, հիշեցրել է, արդեն եղել են:
Արման Սահակյանի ներկայացրած որոշման նախագիծը զարմացրել ու զայրացրել է վարչապետին: Պետգույքի կառավարման վարչության պետը ներկայացրել է «Արաքս» ՓԲԸ-ի պետական 80 տոկոս բաժնեմասն օտարելու առաջարկը: Կարեն Կարապետյանը նախ հետաքրքրվել է. ինչո՞վ է զբաղվում ընկերությունը: Սահակյանը հարցին չի կարողացել պատասխանել: Իսկ ինչո՞ւ էինք սպասում 17 տարի: Այս հարցը նույնպես պատասխան չի ունեցել:
Կառավարությունն այսօր հավանության է արժանացրել նաեւ «Հայաստանի ներդրողների ակումբ» ներդրումային հիմնադրամի հետ հուշագրի ստորագրումը։ Կարեն Կարապետյանը բացատրել է, թե ինչու է կարեւորում այն:
ՄԱԿ-ում Ռուսաստանի մշտական ներկայացուցչի տեղակալ Վլադիմիր Սաֆրոնկովը Նյու Յորքում ՄԱԿ-ի Անվտանգության խորհրդի նիստում բավական կոշտ ելույթ է ունեցել: Մեծ Բրիտանիայի դեսպանը Ռուսաստանին մեղադրել է Բաշար Ասադի ռեժիմին, նրա խոսքով, «անամոթաբար աջակցելու» մեջ, ինչին ի պատասխան ռուս դիվանագետը հայտարարել է, որ Լոնդոնը վախենում է Ռուսաստանի ու ԱՄՆ-ի հնարավոր համագործակցությունից: Զայրացած Սաֆրոնկովը նույնիսկ «դու»-ի է անցել: Ելույթի վերջում Սաֆրոնկովը զայրացած նետել է. «Չհամարձակվե՛ք վիրավորել Ռուսաստանին»:
Մինչ այդ՝ Մոսկվայում էր ԱՄՆ պետքարտուղարը: Ռուսական աղբյուրների փոխանցմամբ՝ Սերգեյ Լավրովը Ռեքս Թիլերսոնի հետ հանդիպման ժամանակ հայտարարել է, որ Սիրիային Միացյալ Նահանգների հասցրած հարվածները հակասում են ահաբեկչության դեմ պայքարի նպատակներին: Լավրովը նաեւ պնդել է միջադեպի մանրամասն հետաքննության անհրաժեշտությունը: Վլադիմիր Պուտինն էլ Թիլերսոնի հետ հանդիպմանը «կետ առ կետ» ներկայացրել է բոլոր այն պատճառները, որոնք, իր պատկերացմամբ, հանգեցրել են հարաբերություններում այժմյան տխուր վիճակին: Հանդիպման ավարտին, սակայն, Թիլերսոնը պնդել է, որ Սիրիայում ամերիկյան հրթիռակոծությունը հիմնավորված է եղել:
Արմավիրում տղամարդը փողոցում գնդակահարել է նախկին կնոջը: Տեղեկությունների համաձայն՝ 37-ամյա Բախշի Մարտիրոսյանը որսորդական հրացանից կրակել է 38-ամյա Սյուզաննա Գալստյանի գլխին. կինը տեղում մահացել է: Հրազենը հայտնաբերված է, Մարտիրոսյանն ինքնակամ ոստիկանություն է ներկայացել ու ձերբակալվել:
Տեղեկությունների համաձայն՝ Բախշի Մարտիրոսյանը Սեւանի բնակիչ է: Նա նախկինում 7 տարի ազատազրկված է եղել գողության համար: Քննչական կոմիտեի տեղեկացմամբ՝ տղամարդը հարցաքննվել է: Պարզվել է, որ անձնական խնդիրների պատճառով նախկին ամուսինները լարված հարաբերություններ են ունեցել:
Երեւանի շենքերից մեկից էլ 24-ամյա տղամարդ է նետվել: Երիտասարդին տեղափոխել են հիվանդանոց, սակայն մի քանի ժամ անց, ուշքի չգալով, մահացել է: Ոստիկանության տեղեկություններով` ինքնասպանություն գործած տղամարդը Լիբանանի քաղաքացի է:
Իսկ Կոտայքի մարզում արտակարգ դեպք է տեղի ունեցել: Երեւան-Սեւան ավտոճանապարհին՝ Չայնիի ոլորաններում, Mercedes մակնիշի ավտոմեքենայում հրդեհ է բռնկվել: Հրշեջներն ու քաղաքացիները մարել են հրդեհը, բայց Mercedes-ը մոխրակույտի է վերածվել։ Ըստ տեղեկությունների՝ մեքենան պատկանում է 41-ամյա իտալացու:
Դոլարն ու եվրոն շարունակում են վերելքը, աննշան թանկացել է նաեւ ռուբլին: Արդյունքում դոլարի փոխարժեքն այսօր կազմել է 486 դրամ, եվրոյինը՝ 517, ռուբլունը՝ 8 դրամ 60 լումա, ֆունտինը՝ 610 դրամ:
Ապրիլի 14-ին հանրապետության շրջանների մեծ մասում ժամանակ առ ժամանակ սպասվում է անձրեւ եւ ամպրոպ: Օդի ջերմաստիճանը 2-4 աստիճանով կբարձրանա: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +11+13, ցերեկը՝ +20+22 աստիճան տաքություն:
