Երբ փաստաթղթերը հանձնում էինք, այնտեղ փաստաթղթեր էին ստորագրել տալիս. դեռ 1-2 ամիս առաջ այդ փաստաթղթերը շտաբում բոլոր թեկնածուները հավաքված ստորագրում էին, պարզվել է եղել է մի թղթի կտոր, որ պարզ էլ չէր, թե ինչ էր գրված: Այս մասին, այսօր՝ մայիսի 3-ին, ԿԸՀ նիստից հետո լրագրողների հետ զրույցում նշել է «Ծառուկյան» դաշինքի թեկնածու Մուշեղ Սաղաթելյանը, ով հրաժարվել է ինքնաբացարկի դիմումից եւ ցանկանում է վերցնել պատգամավորի մանդատը:
«Սստորագրություն ես դրել՝ չգիտենալով, որ… երեւի… ես դեռ չգիտեմ, բովանդակություն չկար, գրած էր միայն 90 հոդված: Դատարանը կորոշի: Հիմա նույնիսկ եթե դա կա, պահանջում ենք չեղյալ համարել»,-հայտարարեց նա:
Դիտարկմանը, որ փաստորեն Ծառուկյանն իրենց խաբե՞լ է, նա արձագանքեց. «Մինչեւ չպարզաբանեմ, չեմ կարող կարծիք ասել որեւ մեկի վերաբերյալ: Ինձ չեն կանչել, չեն զգուշացրել: Դա միայն Ծառուկյանից չի կախված»:
Նրա խոսքով, ոչ միայն «Ծառուկյան» դաշինքից, այլեւ բոլոր մյուս թեկնածուներն ունեին գրված այդպիսի «սատանայական թուղթ, որպեսզի հետագայում ոնց ցանկանան, քեզ դեմ տան»:
Հարցին, թե մտավախություն չունեք, որ ձեր նկատմամբ ճնշումներ կլինեն, որ հրաժարվեք մանդատից, Սաղաթելյանը պատասխանեց. «Էս տարիքիս պետք է վախենա՞մ»:
Ավելի վաղ NEWS.am-ը հայտնել էր, որ ԿԸՀ նախագահ Տիգրան Մուկուչյանը հայտարարել է, որ «Ծառուկյան» դաշինքի կողմից մանդատից հրաժարված 23 թեկնածուներից 11-ը ինքնաբացարկից հրաժարվելու դիմումներ են ներկայացրել եւ ցանկանում են ստանալ իրենց մանդատները: Մուշեղ Սաղաթելյանը նարնց թվում է: