Նոր խորհրդարանի անդրանիկ նիստը, որը տեղի է ունենալու մայիսի 18-ին, կվարի Նապոլեոն Ազիզյանը՝ որպես ամենատարիքով պատգամավոր:
Ավելի վաղ նշվում էր, որ ԱԺ առաջին նիստը վարելու է ՀՀԿ խմբակցությունից Արա Բաբլոյանը, սակայն երեկ վերջնականապես պարզվեց, որ Նապոլեոն Ազիզյանը վերցնում է մանդատը, իսկ նա Արա Բաբլոյանից մեկ տարով մեծ է: Նապոլեոն Ազիզյանը ծնվել է 1946-ի հունվարին, իսկ Արա Բաբլոյանը ծնվել է 1947-ի մայիսին:
ԱԺ Կանոնակարգ օրենքի համաձայն, մինչեւ Ազգային ժողովի նախագահի ընտրվելը նիստերը վարում է տարիքով ավագ պատգամավորը:
Առաջին նստաշրջանի բացման առթիվ ողջույնի ելույթի իրավունք ունեն Հանրապետության նախագահը եւ Ամենայն Հայոց Կաթողիկոսը:
Ողջույնի ելույթներից հետո պատգամավորները երդվում են:
ԱԺ առաջին նիստի օրը հին խորհրդարանը վայր է դնում լիազորությունները: Կառավարությունը նույնպես թողնում է իր լիազորությունները:, սակայն շարունակում է աշխատել մինչեւ նոր կառավարության ձեւավորումը:
Խորհրդարանի առաջին նիստում ընտրվում են ԱԺ նախագահը, փոխնախագահները, հանձնաժողովների նախագահները:
ԱԺ հաջորդ նիստը արդեն տեղի կունենա աշնանային նստաշրջանի ժամանակ: