Ազգային ժողովի ԲՀԿ խմբակցության պատգամավոր Կարո Կարապետյանի՝ Յուվեցի Կարոյի փեսան՝ Գոռ Առաքելյանը, որը դատապարտվել էր 6.5 տարվա ազատազրկման, նախօրեին ազատ է արձակվել Սերժ Սարգսյանի ներման շնորհիվ: Այս մասին NEWS.am-ին հայտնեցին Արդարադատության նախարարության քրեակատարողական վարչության հանրային կապերի բաժնից:
Նշենք, որ Գոռ Առաքելյանի պաշտպան Երեմ Սարգսյանը երեկվանից զանգերի չի պատասխանում: Ազատ արձակման մասին հրաժարվում է խոսել նաեւ Առաքելյանի պատգամավոր աները:
Հիշեցնենք, որ 2014թ. մայիսի 17-ին Երեւանի կենտրոնում՝ «Վերնիսաժի» տարածքում, կրակոցներ էին հնչել: Մասնավորապես, Գոռ Առաքելյանը ապօրինաբար կյանքից զրկելու նպատակով վեճի էր բռնվել Վալերիկ Հովհաննիսյանի ու Ներսես Մելքոնյանի հետ եւ անկանոն կրակ բացել նրանց ուղղությամբ, ինչպես նաեւ վիրավորել պատահական անցորդների:
Առաջին ատյանի դատարանը Գոռ Առաքելյանին մեղավոր էր ճանաչել եւ դատապարտել 6.5 տարվա ազատազրկման: Փաստացի, Յուվեցի Կարոյի փեսան կալանավայրում անցկացրել է մոտ 3 տարի: