ՀՀ վարչապետ Կարեն Կարապետյանը  կշարունակի պաշտոնավարել նաեւ 2018 թվականից հետո։ Այս մասին NEWS.am-ի հետ զրույցում նշել է ԱԺ ՀՀԿ խմբակցության պատգամավոր, ԱԺ նախկին նախագահ Գալուստ Սահակյանը:

«Իհարկե, ես կարծում եմ՝ Կարեն Կարապետյանը կմնա։ Ինչպես Կարեն Կարապետյանը, այնպես էլ մեր թիմի անդամները կմնան, բայց երկրի ղեկավարությունը կապված ապագայի հետ կմնա Սերժ Սարգսյանը»,–ասել է Գալուստ Սահակյանը։

Ինչ վերաբերում է կառավարության ծրագրին, որն այս շաբաթ  ներկայացվելու է Ազգային ժողով, Սահակյանն ասել է, թե այն տարբերվում է նախորդից.  «Կարծում եմ՝ տարբերություններ կլինեն, որովհետեւ կառավարման նոր ձեւ է եւ կարծում եմ՝ եւ տնտեսութան, եւ քաղքականության մեջ անհրաժեշտ է որոշակի փոփոխություն մտցնել, ընդ որում դա ամբողջ քարոզարշավի ժամանակ ասել ենք»։

Անդրադառնալով վարչապետ Կարեն Կարապետյանի խոստացած 850 միլիոն դոլարի ներդրումներին, որոնք դեռ չեն իրականացել, Գալուստ Սահակյանը նշել է, թե խոսքը 85 կոպեկի մասին չէ. «Ես կարծում եմ, բնականաբար, հնարավարություններ կլինեն եւ գտնում եմ, որ առաջիկայում կսատարեն, դա 85 կոպեկ չի, մենք խոսում ենք միլիոնավոր դոլարների մասին, իսկ մարդիկ մտածում են՝ վաղը չէ մյուս օրը անմիջապես գործարանները պիտի կառուցվեն եւ շահագործվեն»։