Ժիրայր Սեֆիլյանի եւ մյուսների գործով այսօրվա դատական նիստն առանձնացել է բազմաթիվ ընդմիջումներով ու սանկցիաներով: Նախ՝ շենքի մուտքի մոտ սովորական դարձած պատմությունն է սկսվել. փաստաբանները դատական կարգադրիչների հետ նորից վիճել են իրենց զննել-չզննելու շուրջ: Նիստի հենց մեկնարկին էլ Տիգրան Հայրապետյանն այն հետաձգելու կամ ընդմիջելու միջնորդություն է ներկայացրել. նախորդ դատական նիստին ներկա չի եղել եւ ժամանակ է պետք, որ ծանոթանա, թե ինչ է տեղի ունեցել: Հետո եւս կես ժամով ընդմիջում. ամբաստանյալներից Սասունիկ Կիրակոսյանի ինքնազգացողությունն է վատացել:
Նիստի ընթացքում Տիգրան Հայրապետյանն ու Տիգրան Եգորյանը երկար ժամանակ փորձել են հայտարարություն անել. տեղեկություն ունեին, որ Ժիրայր Սեֆիլյանին ու Գեւորգ Սաֆարյանին դատարանի շենքում բռնության են ենթարկում: Դատավորը թույլ չէր տալիս ավարտել խոսքը: Տիգրան Հայրապետյանն ի վերջո զայրացել է ու սպառնացել, որ կլքի նիստերի դահլիճը:
Դատարանի շենքի միջանցքում էլ Գեւորգ Սաֆարյանի մայրը որդու մասին փորձել է տեղեկություն ստանալ Երեւանի փոխոստիկանապետից: Վալերի Օսիպյանը վստահեցրել է. Սաֆարյանին ոչ ոք մատով անգամ չի կպել: Կարճ ժամանակ անց ահազանգի հետքերով դատարան են եկել Մարդու իրավունքների պաշտպանի գրասենյակի աշխատակիցները: Զրուցել են ամբաստանյալների հետ ու հերքել բռնության մասին տեղեկությունը:
Իսկ ամբաստանյալներ Ժիրայր Սեֆիլյանը, Ներսես Պողոսյանն ու Գեւորգ Սաֆարյանը դահլիճում չեն եղել, քանի որ նախորդ նիստին դատարանը նրանց նկատմամբ սանկցիա էր կիրառել: Նիստի կեսից նրանց դահլիճ են բերել, բայց այստեղ երկար չեն մնացել: «Ոտքի՛, դատարանն է գալիս» հայտարարությանը նրանք չեն արձագանքել ու կրկին 10 ժամով հեռացվել դահլիճից:
Վերջում արդեն դատական սանկցիա է կիրառվել պաշտպանների՝ Տիգրան Հայրապետյանի ու Արայիկ Պապիկյանի նկատմամբ: Դատարանը պատրաստվում է նաեւ դիմել Փաստաբանների պալատ՝ նրանց պատասխանատվության ենթարկելու համար: Սրանից հետո արդեն նիստը հետաձգվել է:
Արտգործնախարար Էդվարդ Նալբանդյանը չի բացառում, որ առաջիկայում կարող է ղարաբաղյան հիմնախնդրի շուրջ բանակցություններ ունենալ ադրբեջանցի գործընկեր Էլմար Մամեդյարովի հետ: Հանդիպումը, հավանաբար, տեղի կունենա հուլիսին:
Դավիթ Տոնոյանը չի բացառում, որ արտակարգ իրավիճակների նախարարությունը կարող է միավորվել ոստիկանությանը: Բայց այդ հարցով քննարկումներ առայժմ չեն ընթանում: Ո՞ւմ համար է ստեղծվում նախարարությունը հարցին Տոնոյանը գերադասել է չպատասխանել. քանի դեռ քննարկումներ չեն սկսվել, պետք չէ ենթադրություններ անել:
Պատգամավոր Միհրան Պողոսյանին էլ լրագրողները հարցրել են կոռուպցիայի դեմ պայքարի հանձնաժողովի եւ ազդարարի ինստիտուտի ստեղծման մասին: Չեն մոռացել նաեւ հիշեցնել, որ օֆշորային սկանդալի ժամանակ շրջանառվում էր նաեւ ԴԱՀԿ նախկին ղեկավարի անունը: Պողոսյանը կարեւորում է կոռուպցիայի դեմ պայքարի հանձնաժողովի ստեղծումը, ինքն էլ ակտիվ աշխատելու է այդ ուղղությամբ:
Մոսկվայի մարզում վատ եղանակային պայմանների պատճառով Ռուսաստանի մայրաքաղաքի օդանավակայանների չվացուցակներում փոփոխություններ են տեղի ունեցել: Հետաձգվում են նաեւ դեպի Երեւան չվերթներ Մոսկվայի «Դոմոդեդովո» օդանավակայանից: «Շերեմետեւո» օդանավակայանում էլ հորդառատ անձրեւների հետեւանքով հեղեղում է եղել. օդանավերի կայանատեղին ջրով է լցվել:
Երեւանում հրդեհավտանգ իրավիճակ է: Պատճառը հունիսի համար անսովոր օդի բարձր ջերմաստիճանն է: Առավել վտանգավոր են Ծիծեռնակաբերդի հուշահամալիրի, Եռաբլուրի, «Փարոս»-ի, Հրազդանի կիրճի, Հաղթանակի եւ Օղակաձեւ զբոսայգիների անտառագոտիները:
Հուլիսին նույնպես կլիմայական նորմայից 2-3 աստիճանով բարձր օդի միջին ջերմաստիճան է կանխատեսվում: Արաբական թերակղզուց Կովկաս հերթական արեւադարձային տաք հոսանքներ են ներթափանելու: «Հիդրոմետ» ծառայության օդերեւութաբանության կենտրոնի պետ Գագիկ Սուրենյանն այսօր նշել է, որ Երեւանի ցածրադիր հատվածներում օդի ջերմաստիճանը կարող է հասնել մինչեւ 40 աստիճան տաքության: Սուրենյանը քաղաքացիներին խորհուրդ է տվել հատկապես ցերեկային ժամերին՝ 11-16-ն ընկած հատվածում, խուսափել արեւի ուղիղ ճառագայթներից:
Դոլարի ու եվրոյի վերելքը կանգ առավ, այսօր փոքր-ինչ թանկացել է միայն բրիտանական ֆունտը: Հունիսի 30-ին ամերիկյան արժույթի փոխարժեքը կազմել է 480 դրամ, եվրոյինը՝ 548, ռուբլունը՝ 8 դրամ 10 լումա, ֆունտինը՝ 624 դրամ:
Հուլիսի 1-ին հանրապետությունում սպասվում է առանց տեղումների եղանակ: Օդի ջերմաստիճանը 5-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +34+36 աստիճան տաքություն:
