Հանրապետական խմբակցության պատգամավոր Արթուր Գեւորգյանն ի հեճուկս իր կուսակիցների այն պնդումների, թե Սերժ Սարգսյանն անփոխարինելի է, NEWS.am-ի հետ զրույցում ասաց, որ անփոխարինելի մարդիկ չկան: Պատգամավորի համար էական չէ՝ 2018 թվականից հետո երկիրը կղեկավարի Սերժ Սարգսյանը, թե Կարեն Կարապետյանը:
«Էական չէ վարչապետը Կարեն Կարապետյանը կլինի, թե Սերժ Սարգսյանը։ Ես ուզում եմ, որ կառավարությունը ամուր ձեռքերում լինի, եւ էսօրվա աշխատանքները որ սկսվել են՝ շարունակվի»,-ասաց նա։
Դիտարկմանը, որ օրինակ Գալուստ Սահակյանը եւ այլ ՀՀԿ-ականներ համոզված են, որ Սերժ Սարգսյանն անփոխարինելի է, պատգամավորը պատասխանեց. «Սերժ Սարգսյանը լավ կառավարիչ է, դրանում համոզված եմ, բայց անփոխարինելի մարդիկ չկան»:
Անդրադառնալով այն կանխատեսումներին, որ եթե 2018 թվականից ՀՀԿ-ն շարունակի երկրի ղեկավարումը, ապա արտագաղթը կշարունակվի՝ ինչպես վերջին տարիներին՝ Արթուր Գեւորգյանն ասաց. «Եթե ուրիշները լինեին իշխանության, ի՞նչ գիտեք՝ մեկ միլիոն քաղաքացի չէր արտագաղթի: Այսօրվա աշխարհում արտագաղթ բառը մի տեսակ ճիշտ չէ, մարդկանց տեղաշարժը ամբողջ աշխարհում շատ է ակտիվացել: Ես համամիտ չեմ վիճակագրության հետ: Մարդը ուզում է գնա ուրիշ տեղ ապրի: Սխալ է ասել, որ արտագաղթեցիր. սպորտսմենը, երաժիշտը չի կարող մեծ գումար վաստակել, գնում է Միացյալ Նահանգներ, ամբողջ աշխարհում տեղաշարժ է»:
Հիշեցնենք, որ պաշտոնական տվյալներով՝ վերջին տասը տարվա ընթացքում երկրից արտագաղթել է շուրջ 400 հազար քաղաքացի:
