Մի քանի օր է, Լոռու մարզի Ճոճկան համայնքի մանկապարտեզի երեխաներից 4-ը ստացիոնար բուժում են ստանում Ալավերդու բժշկական կենտրոնի ինֆեկցիոն բաժանմունքում: Մի քանի երեխա էլ, որոնց վիճակն այնքան էլ ծանր չի եղել, ամբուլատոր բուժում են ստանում գյուղում:
Լոռու մարզում NEWS.am-ի թղթակիցը հայտնում է, որ բոլոր հիվանդները Ճոճկանի մանկապարտեզի սաներ են: Մանկապարտեզն ունի երկու տարիքային խումբ, նախատեսված 3 եւ 5 տարեկանների համար: Հիվանդներ կան երկու խմբից էլ:
Երեխաների մոտ աղիքային ինֆեկցիային բնորոշ ախտանշաններն սկսել են ի հայտ գալ նոյեմբերի 6-ից: Առաջնային նշանները եղել են փորլուծությունն ու ջերմասիճանի բարձրացումը:
«Բուժքույրերը ակտիվ տնայցեր են կատարում, երեկ բոլոր երեխաները, թե հիվանդները, թե առողջները հանձնել են բակքսուկները, սպասում ենք պատասխաններին,- մեզ հետ զրույցում տեղեկացրեց Ճոճկանի ամբուլատորիայի տնօրեն Նաիրա Գրիգորյանը, վստահեցնելով, որ մեծահասակների շրջանում աղիքային ինֆեկցիայի դեպքեր չեն արձանագրվել:
Նմուշառումներ են արված նաեւ մանկապարտեզի ջրից ու սննդատեսակներից:
Թե ո՞րն է մանկապարտեզի սաների շրջանում գրանցված աղիքային ինֆեկցիայի պատճառն ու հատկապես ի՞նչ ինֆեցիա է, մասնագետները դեռեւս դժվարանում են ասել:
ՀՀ հիվանդությւնների կանխարգելման ու վերահսկման Լոռու մարզային կենտրոնի ղեկավար Անժելա Հովհաննիսյանի խոսքով, լաբորատոր ուսումնասիրությւներն ընթացքի մեջ են: Արդյունքները պարզ կլինեն քիչ ավելի ուշ:
Ճոճկանի մանկապարտեզի տնօրենի հրագանգով այսօր՝ նոյեմբերի 10-ին, ծնողները երեխաներին մանկապարտեզ չեն տարել: Աշխատակիցներին, սակայն, տնօրենը կանչել է աշխատանքի: ԹԵ որն է նման որոշում կայացնելու պատճառը, դեռեւս պարզ չէ: ՏՆօրենի հետ առայժմ կապ հաստատել չի հաջողվում:
