Արթուր Բաղդասարյանի «Հայկական վերածնունդ» կուսակցությունը համագործակցության հուշագիր է ստորագրել Վանաձորի հանրապետական քաղաքապետի հետ: Անմիջապես լուրեր տարածվեցին, որ «Հայկական վերածնունդ»-ը փոխքաղաքապետի պաշտոն կստանա, իսկ ավելի ուշ Վանաձորի քաղաքապետարանի կայքի հրապարակումը հաստատեց այդ լուրերը. նոյեմբերի 21-ին արտահերթ նիստ է գումարվելու՝ քննարկելու ավագանիում «Հայկական վերածնունդ» խմբակցության ղեկավար Արկադի Փելեշյանին Վանաձորի քաղաքապետի առաջին տեղակալ նշանակելու հարցը: Փելեշյանի անունը, ի դեպ, կապվում է բազմաթիվ սկանդալային պատմությունների հետ:
Նշենք, որ 2016 թվականի հոկտեմբերի 2-ի ՏԻՄ ընտրություններից հետո Վանաձորի ավագանու «Լուսավոր Հայաստան», ԲՀԿ եւ «Հայկական վերածնունդ» խմբակցությունները բոյկոտել էին ավագանու նիստերը, սակայն քաղաքապետ Մամիկոն Ասլանյանը, չունենալով մեծամասնություն, շարունակում էր նիստեր գումարել եւ որոշումներ կայացնել: Սահմանադրական դատարանը նոյեմբերի 10-ին որոշում կայացրեց՝ հակասահմանադրական ճանաչելով այդ նիստերի գումարումը: Դրանից հետո «Հայկական վերածնունդ»-ը հերքում էր լուրերը, թե բանակցությունների մեջ կարող է մտնել Վանաձորի քաղաքապետի հետ՝ նշելով, որ հավատարիմ է «Լուսավոր Հայաստանի» եւ ԲՀԿ-ի հետ կնքած հուշագրին:
ՀՀԿ-ՀՎԿ հուշագրին այսօր անդրադարձ է եղել նաեւ Ազգային ժողովի խմբակցությունների ճեպազրույցներում: Լրագրողները հարցին, թե հուշագրի դիմաց ՀՀԿ-ն ի՞նչ է խոստացել «Հայկական վերածննդին», Վահրամ Բաղդասարյանը պատասխանել է, թե իրենք որեւէ ծառայության կարիք չունեն: Ավագանին լուծարելու կարիք Բաղդասարյանը չի տեսնում: Ասում է՝ մինչեւ հաջորդ տարվա մարտի 31-ը ժամանակ կա՝ ՍԴ-ի որոշման համաձայն ՏԻՄ օրենքի դրույթները Սահմանադրությանը համապատասխանեցնելու համար:
Նիկոլ Փաշինյանն էլ ՍԴ-ի որոշումն այսպես է մեկնաբանում. 15 հոգով գումարված Վանաձորի ավագանու նիստերում կայացված որոշումները հակասահմանադրական են: Ասում է՝ դա նույնն է, որ հիմա այս դահլիճում հավաքված մարդկանցով Ազգային ժողովի նիստ գումարենք: Փաշինյանը նաեւ հայտարարել է, որ հիմա կարելի է արձանագրել «Հայկական վերածնունդ» կուսակցության քաղաքական մահը:
Ճեպազրույցների ընթացքում անդրադարձել են նաեւ Հաղթանակի զբոսայգուն հարակից առանձնատների հարցին: Նիկոլ Փաշինյանն ասել է՝ բացառված է, որ այնտեղ որեւէ հողակտոր կապ չունենա կոռուպցիայի հետ: Պատգամավորը «Հաղթանակ» զբոսայգին եւ նրա հարակից տարածքները կոչել է կոռուպցիայի թանգարան բաց երկնքի տակ եւ կատակել. կարելի է Հովիկ Աբրահամյանին այդտեղ գիդ նշանակել: Նախկին վարչապետի արձագանքը չի ուշացել: Հովիկ Աբրահամյանը, սակայն, որոշել է գեղարվեստորեն պատասխանել՝ ֆեյսբուքում Պարույր Սեւակից մեջբերում անելով. «Որտեղ մի պատառ չաղ ու յուղալի, կանգնած է այնտեղ նա երկյուղալի»:
Պարույր Հայրիկյանը հացադուլ է սկսել Կենտրոնական ընտրական հանձնաժողովի շենքի մոտ: ԱԻՄ նախագահն ասում է, որ որոշել է այդ կերպ ընդվզել հանձնաժողովի հակասահմանադրական գործողությունների դեմ: Հայրիկյանը ցանկանում է հանրաքվե անցկացնել ստորագրահավաքի միջոցով եւ այն սկսելու համար ձեւաթուղթ ստանալու նպատակով դիմել էր ԿԸՀ: Այստեղ, սակայն, պատասխանել են, որ «Հանրաքվեի մասին» օրենքը քաղաքացիական նախաձեռնություն չի նախատեսում: Այս պատասխանն էլ վրդովել է գործչին:
Ավելի ուշ ԿԸՀ նախագահը, այնուամենայնիվ, լրագրողների հետ զրույցում շեշտել է, որ ԱԻՄ առաջնորդը հանրաքվե անցկացնելու գործընթաց չի կարող իրականացնել, քանի որ Սահմանադրության այդ դրույթն ուժի մեջ է մտնելու 2018 թվականից, նորընտիր նախագահի կողմից պաշտոնը ստանձնելու օրը: Նշենք, որ Պարույր Հայրիկյանը հացադուլը սկսել է երեկ երեկոյան, իր տանը: Այսօր նույնպես նա ԿԸՀ-ի մոտ չի գիշերի. հացադուլը կշարունակի տանը, իսկ վաղն առավոտյան նորից Հանձնաժողովի շենքի մոտ կլինի:
«Իգլա»-ի գործով այսօրվա դատական նիստում հերթը պաշտպանական ճառերինն էր: Գործով մեղադրյալ Սամվել Բաբայանի պաշտպանը հայտարարել է, որ իր պաշտպանյալին առաջադրված մեղադրանքներն անհիմն են եւ պահանջել է արդարացնել նրան:
Ավետիս Քալաշյանը նշել է, որ մեղադրանքը կառուցված է ենթադրությունների հիման վրա, իսկ փաստական ապացույցներ չկան: Փաստաբանն ասել է, որ Արցախի պաշտպանության նախկին նախարարը որեւէ առնություն չունի «Իգլա»-ի հետ՝ հավելելով, որ Հայաստան դրա տեղափոխման նախաձեռնությունը Գաբրիելյանինն է: Քալաշյանը մեղադրողին նաեւ հորդորել է Բաբայանի մասին խոսելիս հաշվի առնել նրա անձն ու հայրենիքին մատուցած ծառայությունը: Հիշեցնենք, որ նախորդ նիստում դատախազ Արամ Արամյանն առաջարկել էր Սամվել Բաբայանին դատապարտել 7 տարվա ազատազրկման:
Բագրատաշենի սահմանային անցակետում արտակարգ դեպք է տեղի ունեցել: Նոյեմբերի 19-ի լույս 20-ի գիշերն այստեղ սահմանապահի են դանակահարել: Ըստ տեղեկությունների՝ Բագրատաշեն գյուղի բնակիչները՝ երկու եղբայր, ցանկացել են հատել սահմանը: Սահմանապահ ծառայության աշխատակիցը պահանջել է բացել մեքենայի բեռնախցիկը, սակայն եղբայրները հրաժարվել են՝ հայտարարելով, որ տեղացի են, բոլորն իրենց ճանաչում են: Արդյունքում վեճ է բռնկվել: Եղբայրներից մեկը կանչել է աներձագին, որն է դանակով հարվածել է սահմանապահին: Ձերբակալվելուց հետո կասկածյալն ինքնասպանության փորձ է արել: Քննչական կոմիտեի տեղեկացմամբ՝ քրեական գործ է հարուցվել: Մեկ ձերբակալված կա, մեկ անձի էլ որոնում են:
Ռուսաստանում Կրասնոդար-Արմավիր ավտոճանապարհին մահվան ելքով վթար է տեղի ունեցել: Զոհերի եւ տուժածների թվում նաեւ Հայաստանի քաղաքացիներ կան: Բախվել են «ՎԱԶ-2107» եւ եւ «LADA Priora» մակնիշների մեքենաները: Վարորդները՝ Արթուր Մելիքյանն ու Վյաչեսլավ Շամպարովը, ինչպես նաեւ LADA-ի ուղեւոր Մայա Շամպարովան տեղում մահացել են, իսկ «ՎԱԶ-2107»-ի ուղեւոր Սոֆիկ Մելիքյանը հիվանդանոց է տեղափոխվել: Վթարի հետեւանքով զոհված Արթուր Մելիքյանն ու տուժած Սոֆիկ Մելիքյանն ամուսիններ են, Կոտայքի մարզից են: Մեր տեղեկություններով՝ նրանք երկու տարի է՝ Ռուսաստանում էին բնակվում, պատրաստվում էին առաջիկայում տեղափոխել նաեւ ընտանիքի մյուս անդամներին: Տուժածի վիճակը կայուն ծանր է գնահատվում:
Շուրջ 40 տարի Զիմբաբվեն կառավարելուց հետո Ռոբերտ Մուգաբեն վերջապես հեռանում է նախագահի պաշտոնից: Իհարկե՝ ոչ ինքնակամ: Աֆրիկյան այս պետությունում վերջին օրերին խառն իրավիճակ էր: Նոյեմբերի 15-ին զինվորականները գրավեցին պետական հեռուստատեսության շենքն ու հայտարարեցին, որ Ռոբերտ Մուգաբեն եւ նրա ընտանիքը կալանքի տակ են: Մայրաքաղաք Հարարեում տանկեր հայտնվեցին, սակայն հեղաշրջումն անարյուն իրականացվեց:
Իրավիճակը երկրում սրվեց, երբ 93-ամյա Մուգաբեն պաշտոնանկ արեց փոխնախագահ Էմերսոն Մնանգագվային՝ նրան մեղադրելով իշխանությունը զավթելու նպատակով դավադրություն կազմակերպելու մեջ: Փոխնախագահը հեռացավ ՀԱՀ եւ հայտարարեց, որ իր կյանքին վտանգ է սպառնում: Իսկ շատերը նաեւ համարեց, որ Մնանգագվայի պաշտոնանկությունը երկրի առաջին տիկին Գրեյս Մուգաբեի համար նախագահի պաշտոնին ճանապարհ հարթելու միջոց էր: Մուգաբեն երկար ժամանակ կոչ էր անում իրեն մինչեւ լիազորությունների ժամկետի ավարտը՝ 2018 թվականի ապրիլ ժամանակ տալ, սակայն իշխող կուսակցությունը չհամաձայնեց եւ Մուգաբեին նույնիսկ հեռացրեց կազմակերպության ղեկավարի պաշտոնից: Նախագահը, ի վերջո, որոշեց հրաժարական տալ:
Զինվորականները համաձայնել են Մուգաբեի պահանջներին, այդ թվում՝ նրան եւ կնոջը լիակատար անձեռնմխելիություն ապահովելուն եւ սեփականության պահպանմանը: Իսկ իշխող «Զիմբաբվեի Աֆրիկյան ազգային միություն-հայրենասիրական ճակատ» կուսակցությունը որոշել է երկրի նախագահի պաշտոնում առաջադրել նախկին փոխնախագահ Էմերսոն Մնանգագվայի թեկնածությունը:
Նոյեմբերի 20-ին դոլարն ու եվրոն նորից արժեզրկվել են: Դոլարի փոխարժեքն արդյունքում կազմել է 484 դրամ, եվրոյինը՝ 571, ռուբլունը՝ 8 դրամ 19 լումա, ֆունտինը՝ 643 դրամ:
Նոյեմբերի 21-23-ը հանրապետության շրջանների զգալի մասում տեղումներ են սպասվում, այդ թվում՝ ձյան տեսքով: Օդի ջերմաստիճանը 22-23-ը 10-15 աստիճանով կնվազի: Երեւանում սպասվում է փոփոխական ամպամածություն, հնարավոր է թույլ անձրեւ: Մայրաքաղաքում գիշերը կդիտվի +5+7, ցերեկը՝ +13+14 աստիճան տաքություն: