Հայաստանի պետական սահմանի դիրքերից մեկի դիմաց՝ միջդիրքային տարածքում ադրբեջանցի զինվորի դի են հայտնաբերել: Պաշտպանության նախարարությունն օպերատիվ տվյալներ ունի, որ զինծառայողն Ադրբեջանի զինված ուժերի կապիտան է, վաշտի հրամանատար: Զորամասում տեղի ունեցած հանցագործությունից հետո նա փախուստի է դիմել: Հայկական կողմը պատրաստակամություն է հայտնել զինծառայողի դին Կարմիր Խաչի միջազգային կոմիտեի միջնորդությամբ փոխանցել ադրբեջանական կողմին: Ավելի վաղ մամուլում տեղեկություններ էին տարածվել, որ մի քանի օր առաջ ադրբեջանական բանակի Նախիջեւանի ստորաբաժանումներից մեկում զանգվածային սպանություն է տեղի ունեցել: Լուրերի համաձայն՝ ադրբեջանական բանակի սպաներից մեկը կոտորել է դիրքի ամբողջ անձնակազմին ու փախուստի դիմել: Ամենայն հավանականությամբ՝ խոսքը միեւնույն միջադեպի մասին է:
Սերժ Սարգսյանն աշխատանքային այցով Բելգիայում է: Նախագահի այս այցն առանձնակի ուշադրության կենտրոնում է. վաղը պետք է ստորագրվի Հայաստան-Եվրամիություն համագործակցության մասին համաձայնագիրը: Սերժ Սարգսյանն այսօր հանդիպել է Բելգիայի թագավոր Ֆիլիպի հետ, իսկ ավելի ուշ մասնակցելու է Եվրոպական ժողովրդական կուսակցության գագաթնաժողովին:
Եվրամիության «Արեւելյան գործընկերության» գագաթնաժողովը կմեկնարկի արդեն վաղը: Ակնկալվում է, որ դրա շրջանակում Հայաստանը վերջապես կստորագրի ԵՄ-ի հետ համապարփակ եւ ընդլայնված գործընկերության մասին համաձայնագիրը: 2013 թվականին Հայաստանը որոշեց հրաժարվել ԵՄ-ի հետ գործընկերությունից եւ միացավ ԵՏՄ-ին: Այս անգամ, սակայն, հայկական ու եվրոպական կողմերը հավաստում են, որ համաձայնագրի ստորագրման համար որեւէ խոչընդոտ չկա: Կասկածներ, ամեն դեպքում, դեռ առկա են:
Հավաքի եւս մեկ խնդրահարույց հարց է գագաթնաժողովի ամփոփիչ հռչակագրի ընդունումը: Շատերը մտահոգված են, որ 2015 թվականի նման այն կարող է փակուղում հայտնել: Պատճառը ղարաբաղյան հիմնախնդիրն է ու հակամարտությանը վերաբերող ձեւակերպումների հարցում Հայաստանի եւ Ադրբեջանի դիրքորոշումը: Այսօր Բրյուսելում կայացած ճեպազրույցում ընդլայնման հարցերով ԵՄ հանձնակատար Յոհաննես Հանը պատասխանել է հռչակագրում հակամարտությունների վերջնական ձեւակերպման մասին լրագրողներից մեկի հարցին՝ նշելով, որ փաստաթղթի շուրջ բանակցելու են մինչեւ վերջին պահը: Եվրոպացի պաշտոնյան, ամեն դեպքում, հույս չունի, որ կընդունեն հռչակագիրը, որը բոլորին 100 տոկոսով երջանիկ կդարձնի: Իրադարձություններին ուշադիր հետեւում են նեւ Եվրոպայի հայկական կառույցները: Կարեւորելով Հայաստան-ԵՄ համաձայնագրի ստորագրումը՝ նրանք, ամեն դեպքում, կենտրոնացած են ղարաբաղյան հակամարտության հարցով գագաթնաժողովի հռչակագրի ձեւակերպումների շուրջ:
Դեկտեմբերի 12-ին Ազգային ժողովի արտահերթ նիստ կգումարվի: Նախաձեռնողը կառավարությունն է, իսկ որոշումը հաստատվել է գործադիրի այսօրվա նիստում: Օրակարգում 19 հարց է ներառվելու, այդ թվում՝ ընտանեկան բռնության կանխարգելման մասին օրինագիծն ու Ռուսաստանից սպառազինություն ձեռք բերելու համար 100 մլն դոլարի վարկ ստանալու մասին համաձայնագիրը: Գործադիրը որոշել է նաեւ օգնել մարզերում կարկտահարությունից, ցրտահարությունից ու սելավներից տուժած համայնքների բնակիչներին: Այդ նպատակով կառավարության պահուստային ֆոնդից գումար կհատկացվի՝ հողօգտագործողների 2017 թվականի հողի հարկի եւ օգտագործված ոռոգման ջրի վարձավճարի մարման նպատակով:
Այսօր զեկուցված հարցերից մեկը զայրացրել է վարչապետին: Ավշար համայնքում պետք է հիմնանորոգվեր մանկապարտեզի շենքը, բայց պարզվել է, որ հնարավոր չէ: Տարածքային կառավարման նախարարությունն առաջարկում է լուծարել արդեն կնքված պայմանագրերը: Կարեն Կարապետյանին հետաքրքրել է սխալ հաշվարկների պատճառը: Վաչե Տերտերյանի բացատրությունը վարչապետին, կարծես, չի գոհացրել: Կարեն Կարապետյանն ընդհատել է փոխնախարարին:
Վարչապետի թիրախում է եղել նաեւ պետգույքի կառավարման վարչության պետը: Կարապետյանը լսել է Արման Սահակյանի զեկուցած հարցերը, հետո նշել, թե ինչ պետք է անի, որ հաստատվի հաջորդ տարվա նրա աշխատանքային պլանը:
Գործադիրը մտադիր է վերանայել հիփոթեքային վարկավորման դեպքում հարկային արտոնությունները: Նշենք, որ նորակառույց շենքում բնակարան գնելու դեպքում եկամտահարկը որպես տոկոսադրույք փոխանցվում է վարկառուին: Հիմա ուզում են նեղացնել այս արտոնությունից օգտվողների շրջանակ: Այս հնարավորությունը չի տրամադրվի 55 մլն դրամը գերազանցող գործարքների կամ այն դեպքում, երբ վարկառուն կամ համավարկառուն երկրորդ բնակարանն է գնում:
Շավարշ Քոչարյանին էլ լրագրողները հարցրել են ԵՏՄ-ին Ադրբեջանի անդամակցության հնարավորության մասին: Պաշտոնյայի խոսքով՝ տեսականորեն հնարավոր է, բայց Բաքուն պետք է կատարի Եվրասիական տնտեսական միության մասին պայմանագրի մի կարեւոր դրույթ. ԵՏՄ անդամը կամ դիտորդը չպետք է որեւէ քայլ ձեռնարկի՝ ի վնաս անդամ պետությունների կամ ընդհանրապես Միության: Իսկ միայն տնտեսական դաշտի պարագայում փաստ է, որ Ադրբեջանը շրջափակման մեջ է պահում Հայաստանին:
Երեւան կատարած այցի ժամանակ Ռուսաստանի արտգործնախարարն ասել էր, թե լավատես չէ ղարաբաղյան հակամարտության բանակցություններում շուտափույթ առաջընթացի հարցում: Արդյո՞ք հայկական կողմը նույնպես կարծում է, որ բանակցությունները շուտ չեն ավարտվի եւ առաջիկայում բեկում ակնկալել պետք չէ:
Վանաձորում այսօր արտակարգ դեպք է տեղի ունեցել. առավոտյան քաղաքի ավտոկայանի հարեւանությամբ մի երիտասարդ բեռնատար գնացքի տակ է ընկել: Նա Վանաձորի 26-ամյա բնակիչ Լեւոն Սուրենյանն է: Գնացքի 4 վագոններն անցել են երիտասարդի վրայով, բայց նա հրաշքով ողջ է մնացել: Գնացքավարը դեպքից մանրամասներ է պատմել: Երիտասարդին հիվանդանոց են տեղափոխել: Նա գլխուղեղի ցնցում է ստացել, գլխի շրջանում բաց վերքեր, գոտկատեղի շրջանում վնասվածքներ ունի: Նրա վիճակը միջին ծանրության են գնահատում:
Թբիլիսիում շուրջ մեկ օր տեւած հակաահաբեկչական գործողության արդյունքում հանցավոր խմբի մեկ անդամ է ձերբակալվել, երեքը սպանվել են: Տեղական աղբյուրների փոխանցմամբ՝ նրանք Վրաստանի քաղաքացի չեն: Հիմա հատուկ ծառայությունները փորձում են հայտնաբերել խմբի բոլոր անդամներին: Հիշեցնենք, որ հակաահաբեկչական գործողության ընթացքում անընդհատ հրաձգության եւ պայթյունների ձայներ են լսվել: Իսանի շրջանի շենքը, որտեղ թաքնվել էին կասկածյալները, բավական վնասվել է: Բնակիչները, սակայն, չեն տուժել: Գործողության ընթացքում Պետական անվտանգության ծառայության մեկ աշխատակից է զոհվել, 3 վիրավոր կա:
Դոլարի ու եվրոյի արժեւորմանը միացել է նաեւ ռուբլին: Նոյեմբերի 23-ին դոլարի փոխարժեքը կազմել է 483 դրամ, եվրոյինը՝ 572, ռուբլունը՝ 8 դրամ 29 լումա, ֆունտինը՝ 643 դրամ:
Նոյեմբերի 23-ի գիշերը հանրապետության շրջանների զգալի մասում տեղումներ են սպասվում, իսկ կիրակի օդի ջերմաստիճանը կնվազի եւս 4-6 աստիճանով: Երեւանում նույնպես տեղումներ են սպասվում, որոշ հատվածներում՝ թաց ձյան տեսքով: Մայրաքաղաքում գիշերը կդիտվի -1-3 աստիճան ցուրտ, ցերեկը՝ +2+4 աստիճան տաքություն: