Հայաստանում տարեկան փաստացի գնաճը գրեթե համընկել է ԿԲ կանխատեսմանը եւ կազմել է 2.6 տոկոս, որը թույլատրելի միջակայքի ստորին սահմանի մոտ է: Այս մասին, այսօր՝ հունվարի 23-ին, ԱԺ-ում առանձին ապրանքատեսակների գնաճի թեմայով լսումների ժամանակ հայտարարել է Կենտրոնական բանկի նախագահ Արթուր Ջավադյանը։
Համեմատության համար նա նշեց, որ հարեւան երկրներում գնաճն ավելի բարձր է եղել. «Հարեւան Վրաստանում գնաճը 2017-ին կազմել է 6,7 տոկոս, Ադրբեջանում՝ 7,9 տոկոս, Ռուսաստանում, 2,5, Ուկրաինայում՝ 13,7 տոկոս, Մոլդովայում, 7,3, Թուրքիայում՝ 19,9, Իրանում՝ 10 տոկոս: Իսկ եթե նայենք կուտակային՝ 2016-2017 թվականներին, Հայաստանում գնաճը կազմել է 1,5 տոկոս, քանի որ 2016-ին ունեցել ենք դեֆլյացիա 1,1 տոկոսի չափով: Վրաստանում գնաճը կազմել է 8,6 տոկոս, Ադրբեջանում՝ 24,6, ՌԴ-ում՝ 8 տոկոս, Ուկրաինայում՝ 27,8, Մոլդովայում՝ 10, Թուրքիայում՝ 21,5 տոկոս, Իրանում՝ մոտ 20 տոկոս»:
Արթուր Ջավադյանը նշեց նաեւ, որ ԿԲ-ն 2017-ին շարունակել է նվազեցնել վերաֆինանսավորման տոկոսադրույքը՝ մեղմելով գնանկումային միջավայրը:
Նրա խոսքով, 2014 թվականից հետո Հայաստանում մեկ շնչին ընկնող ՀՆԱ-ն 2016-ին կազմել է 2013-ի ցուցանիշի 94 տոկոսը, իսկ 2017-ին, իրենց գնահատմամբ, ամբողջությամբ վերականգնել են այդ ցուցանիշը:
«Գնաճի սպասումները վերջին 2 տարիներին նվազել են: Նվազել են տոկոսադրույքները, ֆինանսական հատվածը ապադոլարիզացվել է, դրամային ավանդների աճը կազմել է 33,5 տոկոս: Վարկավորման կառուցվածքում դրամային վարկերի աճ է արձանագրվել ավելի քան 28 տոկոսով:
Սակայն պայմանավորված ակցիզային հարկի եւ մաքսատուրքերի դրույքափաչերի, ինչպես նաեւ մի քանի ապրանքների գնաճով պայմանավորված ավելացել են գնաճային սպասումները, որոնք ուժգնանում են որոշ փորձագետների, գործիչների մամուլում չհիմնավորված, սպեկուլյատիվ շահարկումներով: Մենք այդ սպասումները գերագնահատված ենք համարում»,-ընդգծեց Ջավադյանը:
Ինչ վերաբերում է 2018-ին գնաճի գնահատականին, ԿԲ նախագահն ասաց. «Ըստ ԿԲ-ի դիտարկումների, չնայած բեինզին, սեղմված գազի ու դիզվառելիքի գների աճին, 2018-ի հունվարի գնաճը կլինի նախորդ տարիներին արձանագրվածի շրջանակներում: Հարկային եւ մաքսային դրույքաչափերի աճերի ազդեցությունը գնահատում ենք առավելագույնը 1.3 կետ: 2018-ի համար ԿԲ-ն կանխատեսում է, որ գնաճը աստիճանաբար կմոտենա 4 տոկոս նպատակային ցուցանիշին եւ կկայունան դրա շուրջ»:
Որքա՞ն է կազմել գնաճը Հայաստանում. թվեր ներկայացրեց վիճակագրության ծառայության պետը
Մենք այստեղ չենք հավաքվել, որ թոզ փչենք ու գնանք. Շարմազանովն ու Փաշինյանը բանավիճեցին