Զինվորական հոսպիտալում փետրվարի 12-ին ժամկետային զինծառայող է մահացել: Պաշտպանության նախարարության տեղեկացմամբ՝ Ստեփան Ստեփանյանն արձակուրդում է եղել, հետո վերադարձել է զորամաս եւ ինքնազգացողությունը վատացել է: Զինծառայողին հոսպիտալացրել են, որտեղ էլ արձանագրել են նրա մահը: Պաշտպանական գերատեսչությունում, սակայն, մահվան պատճառների մասին ոչինչ չեն նշում. դատաբժշկական փորձաքննություն է նշանակված, պետք է սպասել արդյունքներին:
Ստեփանը Կոտայքի Գառնի գյուղից էր, մեկ տարի առաջ էր զորակոչվել բանակ: Գառնիի գյուղապետարանից մեր թղթակցին ասել են, որ երիտասարդն առողջական խնդիրներ չի ունեցել: Ստեփանը երկկողմանի ծնողազուրկ էր, նրան տատիկն ու պապիկն են մեծացրել, իսկ մի քանի տարի առաջ նաեւ պապն է մահացել: Ծառայության մեկնելուց առաջ տղան մեղվաբուծությամբ է զբաղվել՝ տատին ու կրտսեր քրոջը պահելու համար:
Պաշտոնական Փարիզը մեկնաբանել է Ադրբեջանի նախագահի հերթական ագրեսիվ հայտարարությունը՝ կոչ անելով զերծ մնալ ցանկացած հայտարարությունից կամ գործողություններից, որոնք կարող են լարվածության պատճառ դառնալ: Հիշեցնենք, որ Իլհամ Ալիեւն այս անգամ էլ «ադրբեջանական պատմական տարածք էր կոչել Երեւանն ու Զանգեզուրը»: Իսկ մինչ միջազգային հանրությունն արձագանքում է Ալիեւի հայտարարություններին, Ադրբեջանը հերթական սադրանքին է դիմել: Հիմա էլ այս երկրի գլխավոր դատախազությունն Ինտերպոլի միջոցով հետախուզում է հայտարարել է Եվրոպայի Հայ դատի հանձնախմբի ղեկավար Գասպար Կարապետյանի նկատմամբ: Պատճառը Կարապետյանի հաճախակի այցերն են Արցախ: Ադրբեջանում նրա դեմ նույնիսկ քրեական գործ է հարուցվել՝ «կազմակերպված խմբով Ադրբեջանի սահմանը հատելու եւ պետության դեմ հրապարակային կոչերի համար»: Հավելենք, որ Եվրոպայի Հայ դատի հանձնախմբի նախաձեռնությամբ վերջին տարիներին բազմաթիվ եվրոպացի գործիչներ են այցելել Արցախ, որոնցից շատերը հայտնվել են Ադրբեջանի տխրահռչակ «սեւ ցուցակում»:
Պաշտոնական այցով Հայաստան է ժամանել Լիբանանի նախագահ Միշել Աունը. նախագահ Սերժ Սարգսյանն է հրավիրել: Այսօր արդեն Միշել Աունին ընդունել է Ամենայն Հայոց կաթողիկոսը, Լիբանանի նախագահն այցելել է նաեւ Ծիծեռնակաբերդ, ծաղկեպսակ դրել Հայոց ցեղասպանության զոհերի հիշատակին: Նշենք, որ Լիբանանը 1915 թվականի ջարդերը ցեղասպանություն ճանաչած երկրներից է: Այցի շրջանակում Միշել Աունը կհանդիպի նաեւ Ազգային ժողովի նախագահի, վարչապետի հետ, իսկ նախագահական նստավայրում վաղը նախանշված են հայ-լիբանանյան բարձր մակարդակի բանակցություններ: Հավելենք, որ Լիբանանի նախագահին ուղեկցող պատվիրակության կազմում են նաեւ այդ երկրի զբոսաշրջության նախարար Ավետիս Կիտանյանն ու խորհրդարանի հայազգի պատգամավոր Հակոբ Բագրատունին:
«Ելք» խմբակցությունն Ազգային ժողովին առաջարկել է Մարտի 1-ի իրադարձությունների 10-րդ տարելիցի կապակցությամբ հայտարարություն ընդունել: Պետաիրավական հարցերի հանձնաժողովի նիստում Նիկոլ Փաշինյանն ասել է նաեւ, որ, մինչեւ հիմա 2008 թվականի մարտի 1-2-ին տեղի ունեցած իրադարձությունների ժամանակ 10 զոհերի մահվան հանգամանքները բացահայտված չեն, իսկ զոհերի հարազատներին փոխհատուցում չի տրվել: «Ելք»-ն առաջարկում էր նաեւ առաջիկայում օրենսդրական փաթեթ մշակել՝ այդ իրադարձությունների ժամանակ զոհվածների հարազատներին ու վնասվածք ստացած քաղաքացիներին արժանի փոխհատուցում տալու համար: Հանձնաժողովը, սակայն, բացասական եզրակացություն է տվել հայտարարությանը:
Իսկ ՀՀԿ-ի խորհրդարանական խմբակցությունն այսօր նիստ է գումարել եւ պետաիրավական հարցերի մշտական հանձնաժողովի նախագահի թեկնածու առաջադրել Գեւորգ Կոստանյանին: Մինչեւ հիմա այս հանձնաժողովը ղեկավարում էր Հրայր Թովմասյանը, որն օրերս հրաժարական է ներկայացրել. նշանակվելու է Սահմանադրական դատարանի անդամի թափուր պաշտոնում:
«Սասնա ծռերի» գործով այսօրվա դատական նիստը լարված մթնոլորտում է անցել: Պաշտպանների խոսքով՝ գործով մեղադրող Պետրոս Պետրոսյանի հայտարարության ժամանակ Պավլիկ Մանուկյանը տեղից հայտարարել է, թե «թքած ունի նրա հայտարարության վրա», ինչին հետեւել է Պետրոս Պետրոսյանի արձագանքը. «Մի՛ հաչա, թուրք»: Արդյունքում նիստերի դահլիճում աղմուկ է բարձրացել: Նախագահող դատավոր Մեսրոպ Մակյանը դատական սանկցիա է կիրառել Պավլիկ Մանուկյանի նկատմամբ՝ նրան 5 ժամով հեռացնելով դահլիճից, իսկ մեղադրող Պետրոս Պետրոսյանի պարագայում բավարարվել է ընդամենը նախազգուշացում անելով: Դատավորը սանկցիա է կիրառել նաեւ Արայիկ Խանդոյանի եւ Սմբատ Բարսեղյանի նկատմամբ. նրանց նիստերի դահլիճից հեռացրել են 10-ական ժամով: Իսկ ընդմիջումից հետո նիստը կրկին սկանդալով է սկսվել, այս անգամ՝ նիստին հետեւողների մասնակցությամբ: Նրանք բողոքել են մեղադրողի արտահայտության դեմ՝ «Թուրքը դու ես, Պետրոսիկ», «Պավլիկը քո նման թուրքերին է սատկացրել», «Թուրքը դու ես, ծախված» պաստառներ պարզելով: Ի դեպ՝ գործով պաշտպաններից Արա Ղարագյոզյանը մեղադրողի դեմ քրեական գործ հարուցելու միջնորդություն է ներկայացրել դատարանին: Մեսրոպ Մակյանը, սակայն, մերժել է: Ամեն դեպքում, պաշտպանը պատրաստվում է բողոք ներկայացնել դատախազություն:
Երեւան-Վանաձոր ավտոճապարհին խոշոր վթար է տեղի ունեցել: Ապարանի վարչական տարածքում բախվել են Lada եւ Samand մակնիշների մեքենաները։ Պատահարի հետեւանքով 8 մարդ մարմնական վնասվածքներով հիվանդանոց է տեղափոխվել: Վիրավորների թվում 1-ամյա երեխա կա: Փոքրիկին Երեւան են տեղափոխել: Բժիշկները երեխայի վիճակը ծայրահեղ ծանր են գնահատում. նա գանգուղեղային վնասվածքներ ունի:
Փետրվարի 21-ին դոլարի ու եվրոյի արժեզրկմանը միացել է նաեւ ֆունտը: Դոլարի փոխարժեքը կազմել է 480 դրամ, եվրոյինը՝ 592, ռուբլունը՝ 8 դրամ 49 լումա, ֆունտինը՝ 670 դրամ:
Փետրվարի 22-ին հանրապետության առանձին շրջաններում տեղումներ են սպասվում, 23-25-ին՝ առանց տեղումների եղանակ: Օդի ջերմաստիճանը ցերեկային ժամերին 4-5 աստիճանով կբարձրանա: Երեւանում նույնպես վաղը անձրեւի հավանականություն կա: Մայրաքաղաքում գիշերը կդիտվի +2+4, ցերեկը՝ +9+11 աստիճան տաքություն: