Միգուցե ես փոշմանել եմ, այո: Այս մասին, այսօր՝ ապրիլի 25-ին, ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած երթի ժամանակ «Ազատության» հետ զրույցում նշեց «Ծառուկյան» խմբակցության պատգամավոր, Գագիկ Ծառուկյանի փեսա, ՈՒկրաինայում ՀՀ դեսպան Անդրանիկ Մանուկյանի որդի Դավիթ Մանուկյանը՝ անդրադառնալով հարցին, թե ինչպես է պատահել, որ մեկ շաբաթ առաջ ԱԺ-ում կողմ է քվեարկել Սերժ Սարգսյանի թեկնածությանը վարչապետի պաշտոնում, իսկ հիմա մասնակցում է Սերժ Սարգսյանի եւ ՀՀԿ-ի դեմ ուղղված երթին:
«Եկեք այս օրը չփչացնենք, ես լրատվամիջոցների համար լրիվ բաց եմ: Հիմա չեմ կարող պատասխանել»,-ասաց նա:
Հարցին, թե չի՞ փոշմանել իր արարծի համար, նա արձագանքեց. «Եթե ժողովրդի մեծամասնության կամքը դա էր, որ Սերժ Սարգսյանը հրաժարական տար, ուրեմն էդպես ճիշտ էր: Միգուցե ես փոշմանել եմ, այո»:
«Ծառուկյան» խմբակցության մեկ այլ պատգամավոր՝ Վարդան Բոստանջյանը, ով եւս կողմ է քվեարկել Սերժ Սարգսյանին ու այսօր մասնակցում է ընդդիմութայն երթին, ասաց. «Ես համաժողովրդական շարժման կողմնակից եմ, իսկ էն ժամանակ, որ կողմ եմ քվեարկել, միգուցե համարեք, որ սխալ եմ արել: Ես ոչ թե ֆիզիկական անձին եմ կողմ եղել, այլ քվեարկել եմ մեր երկրի անվտանգության, հարաբերական կայունության համար: Տեղի է ունեցել սխալ: Ես ընդունում եմ իմ սխալը»:
Նշենք, որ ապրիլի 17-ին, ԱԺ-ում Սերժ Սարգսյանին վարչապետի պաշտոնում ընտրելու ժամանակ «Ծառուկյան» խմբակցության 31 պատգամավորներից միայն 12 դեմ քվեարկել Սերժ Սարգսյանին:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:
