Կառավարության կազմը շարունակում է համալրվել: Նիկոլ Փաշինյանի առաջարկությամբ նախագահ Արմեն Սարգսյանը Հայաստանի առաջին փոխվարչապետի պաշտոնում նշանակել է Արարատ Միրզոյանին, փոխվարչապետի պաշտոնում՝ Տիգրան Ավինյանին: Երկուսն էլ Փաշինյանի «Քաղաքացիական պայմանագիր» կուսակցությունից են:
Այսօր նաեւ մի քանի նախարարներ են նշանակվել. կրթության եւ գիտության նախարարությունը կգլխավորի Արայիկ Հարությունյանը, տարածքային կառավարման եւ զարգացման նախարարությունը՝ Սուրեն Պապիկյանը, սփյուռքի նախարար էլ նշանակվել է Մխիթար Հայրապետյանը: Նրանք նույնպես «Քաղաքացիական պայմանագիր» կուսակցությունից են:
Պաշտպանության նախարարությունը նույնպես նոր ղեկավար ունի. այդ պաշտոնում նշանակվել է ԱԻ նախարարի պաշտոնակատար Դավիթ Տոնոյանը: Նա այս ոլորտում երկարամյա աշխատանքի փորձ ունի, այդ թվում եղել է պաշտպանության փոխնախարար, ՆԱՏՕ-ում Հայաստանի զինված ուժերի ներկայացուցիչ:
Քննչական կոմիտեի ղեկավարը չի պատրաստվում հրաժարական տալ: Լրագրողների հետ զրույցում Աղվան Հովսեփյանը բացատրել է, թե ինչու: Փոխարենը նոր կառավարությունում չի ցանկանում աշխատել Վահան Մարտիրոսյանը: Տրանսպորտի նախարարի պաշտոնակատարը, սակայն, վստահեցնում է. խնդիրը Փաշինյանի մեջ չէ: Լեւոն Ալթունյանն էլ առողջապահության նախարարի պարտականությունները կկատարի այնքան ժամանակ, որքան հարմար գտնի նորընտիր վարչապետը:
Սակայն Նիկոլ Փաշինյանը, կարծես, առողջապահության նախարարի պաշտոնի այլ թեկնածու ունի: Մամուլի տեղեկություններով՝ նա պատրաստվում է այդ պաշտոնում նշանակել առողջապահության փոխնախարար Սամվել Մարգարյանին: Բժշկական հանրությունը, սակայն, դեմ է այս թեկնածուին: Մի խումբ բժիշկներ բաց նամակ են հղել վարչապետին՝ նշելով, որ կցանկանային ոլորտի պատասխանատու տեսնել «նախկին իշխանությունների հետ շփումից չփչացած մարդու»:
Նոր կառավարությունում պորտֆելների ակնկալիք ունի նաեւ «Ծառուկյան» դաշինքը: Գեւորգ Պետրոսյանը նախընտրում է սոցիալական ոլորտի գերատեսչությունները, սակայն հավելում, որ որոշումը կուսակցության առաջնորդն է կայացնելու: Նիկոլ Փաշինյանը նույնպես առայժմ չի նշում, թե որ նախարարությունների ղեկավարումը կվստահեն Գագիկ Ծառուկյանի քաղաքական ուժին:
Երկու նշանակում էլ երեկ երեկոյան է արվել. ոստիկանապետի պաշտոնը ստանձնել է Վալերի Օսիպյանը, ԱԱԾ տնօրենինը՝ Արթուր Վանեցյանը: Վալերի Օսիպյանի նշանակումը, սակայն, բուռն քննադատության ալիք է առաջացրել: Նիկոլ Փաշինյանն այսօր բացատրել է որոշման պատճառը:
Գործադիրն այսօր Նիկոլ Փաշինյանի գլխավորությամբ առաջին նիստն է գումարել: Կառավարության շենքին մոտեցող Փաշինյանին հավաքված քաղաքացիները ծափերով են դիմավորել: Վարչապետը լսել է նրանց բողոքները, նամակներ վերցրել ու շենք մտել: Արդեն նիստի ընթացքում Նիկոլ Փաշինյանը խոսել է կարկտահարությունից տուժածներին իրական, ոչ թե ֆորմալ աջակցություն ցուցաբերելու անհրաժեշտության մասին, քննադատել բուհերի խորհուրդների ձեւավորման գործող պրակտիկան, լսել նախարարների ներկայացրած օրակարգային մյուս հարցերը: Որոշումներն ընդունելիս նախկին պատգամավորը շփոթության է մատնվել:
Կառավարությունը կլուծի Հայաստանի 3-րդ պաշտոնաթող նախագահ Սերժ Սարգսյանին բնակարանով ապահովելու խնդիրը: Օրակարգային հարցը ներկայացրած Դավիթ Հարությունյանն ընդգծել է, որ Սերժ Սարգսյանը վերջինն է, որը կօգտվի սոցիալական այդ երաշխիքից: Նախորդ կառավարությունում հարցը քննարկելիս որոշվել էր սեփականաշնորհել եւ Սերժ Սարգսյանին հատկացնել Կոնդի առանձնատների տնտեսության «ՊՈԱԿ»-ի հաշվեկշռում գտնվող որոշակի շինություն` իր հողամասով: Փաշինյանը չեղարկել է կառավարական առանձնատան սեփականաշնորհման որոշումը եւ աշխատակազմի ղեկավարին հանձնարարել մեկ ամսում օրենքի շրջանակում այլ լուծում առաջարկել:
Հավելենք, որ կառավարությունն այս կազմով վերջին անգամ էր հավաքվել: Նիստի ավարտին Նիկոլ Փաշինյանը շնորհակալություն է հայտնել ներկաներին եւ հաջողություն մաղթել նոր ձեւավորվող կառավարությանը:
Դադարեցվեցին նաեւ Աղվան Վարդանյանի պատգամավորական լիազորությունները: Ազգային ժողովի նախագահը ստորագրել է համապատասխան արձանագրությունը: ՀՅԴ խմբակցության քարտուղարը, հիշեցնենք, մանդատը վայր է դրել կուսակցության Հայաստանի կառույցի պահանջով, ավելի ուշ՝ հեռացվել նաեւ Դաշնակցության շարքերից: Իսկ պատճառը մայիսի 1-ին Ազգային ժողովում Նիկոլ Փաշինյանին դեմ քվեարկելն է: Խորհրդարանում նրան, ամենայն հավանականությամբ, կփոխարինի Ռուզաննա Առաքելյանը: Հիշեցնենք, որ երեկ մանդատից հրաժարվելու դիմում է ներկայացրել նաեւ ՀՅԴ խմբակցության մեկ այլ պատգամավոր՝ անկուսակցական Արմեն Բաբայանը:
Իսկ Նիկոլ Փաշինյանի եւ Արարատ Միրզոյանի փոխարեն «Ելք» խմբակցությունը կհամալրեն «Քաղաքացիական պայմանագիր» կուսակցության երկու անդամներ՝ Հրաչ Հակոբյանն ու Ալեն Սիմոնյանը:
Դատավոր Արշակ Վարդանյանը այսօր առաջին անգամ «Սասնա ծռերի» գործով դատական նիստ անցկացրեց: Փաստաբանները մեկ առ մեկ իրենց պաշտպանյալների խափանման միջոցը փոխելու միջնորդություն ներկայացրեցին դատարանին: Փաստաբան Լուսինե Սահակյանը նշեց, թե այդ միջնորդությունը պետք է ներկայացրած լինեին դատախազները, բայց քանի որ չեն արել, իրենք պահանջում են անհապաղ ազատ արձակել «Սասնա ծռերին»: Դատավորը լսեց բոլորին եւ գնաց խորհրդակցական սենյակ՝ որոշում կայացնելու: Խորհրդակցական սենյակից վերադառնալով՝ Արշակ Վարդանյանը հայտարարեց, որ «Սասնա ծռերի» գործով 11 ամբաստանյալների խափանման միջոց կալանավորումն անփոփոխ է թողնում: Որոշումից դժգոհ «Սասնա ծռերի» աջակիցները դրա հրապարակումից հետո փակել են Երեւանի Արշակունյաց պողոտան:
Ֆուտբոլի Հայաստանի հավաքականի գլխավոր մարզիչ Վարդան Մինասյանը Մալթայի եւ Մոլդովայի դեմ ընկերական խաղերի համար ազգային թիմ է հրավիրել արտերկրում հանդես եկող 19 ֆուտբոլիստի: Հավաքականում նոր անուններ կան՝ Անդրե Կալիսիրը, Դավիդ Յուրչենկոն, Խորեն Բայրամյանը, Էդգար Բաբայանն ու Իվան Յագանը: Տեւական ընդմիջումից հետո հավաքական է հրավիրվել նաեւ շվեդական «Յուրգորդենի» նորեկ Յուրա Մովսիսյանը: Վերջին շրջանում 31-ամյա հարձակվողը, ֆուտբոլի ֆեդերացիայի նախագահի որոշմամբ, հավաքական չէր հրավիրվում: Նշենք, որ ընկերական խաղերն անցկացվելու են Ավստրիայում: Հայաստան-Մալթա հանդիպումը մայիսի 29-ին է, Վատենս քաղաքի «Ժերնո Լանժ» ստադիոնում, իսկ Հայաստան-Մոլդովա խաղը՝ հունիսի 4-ին, Կեմատեն քաղաքի «Շպորտպլաց» ստադիոնում: Հայաստանի ազգային հավաքականի պաշտոնում վերանշանակվելուց հետո սրանք Վարդան Մինասյանի գլխավորությամբ թիմի առաջին խաղերը կլինեն:
Մայիսի 11-ին դոլարը շարունակել է արժեզրկվել, եվրոն ավելի քան 2 դրամով թանկացել է: Դոլարի փոխարժեքը կազմել է 486 դրամ, եվրոյինը՝ 580, ռուբլունը՝ 7 դրամ 88 լումա, ֆունտինը՝ 658 դրամ:
Մայիսի 12-16-ը հանրապետության շրջանների զգալի մասում ժամանակ առ ժամանակ սպասվում է անձրեւ եւ ամպրոպ, առանձին վայրերում՝ կարկուտ: Օդի ջերմաստիճանն էապես չի փոխվի: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +10+12, ցերեկը՝ +22+24 աստիճան տաքություն: