Շիրակի նորանշանակ մարզպետ Կարեն Սարուխանյանը Գյումրիի ծննդատանը կատարված ֆինանսական աուդիտի հաշվետվությունը, որտեղ մի շարք չարաշահումներ են հայտնաբերվել, ուղարկել է մարզի դատախազ Կարեն Գաբրիելյանին: Այս տեղեկությունը NEWS.am-ի հետ զրույցում հաստատեցին գլխավոր դատախազության հանրային կապերի բաժնից:
«Դրանում առկա տեղեկությունները Քրեական դատավարական օրենսգրքի ռեժիմով ստուգելու նկատառումներից ելնելով՝ Կարեն Գաբրիելյանի կողմից այն ուղարկվել է ոստիկանության Շիրակի մարզային վարչության պետին՝ նույն Օրենսգրքի 180-րդ հոդվածի կարգով նյութեր նախապատրաստելու և ձեռք բերված արդյունքներով տվյալ օրենսգրքի 181 հոդվածով նախատեսված որոշումներից մեկը կայացնելու հանձնարարությամբ», - հայտնեցին դատախազությունից: