Ազգային անվտանգության ծառայությունը խուզարկություն է կատարել «Շմայս» մականունով հայտնի ԱԺ նախկին պատգամավոր, ՀՀԿ-ական Առաքել Մովսիսյանի՝ Այգեկ գյուղի առանձնատանը: ԱԱԾ-ականներն ասել են, որ զենք են փնտրում: Նախնական տեղեկություններով՝ Մովսիսյանի տանն ատրճանակներ եւ հրացաններ են գտել: Սակայն նախկին պատգամավորի կինը պնդում է, որ դրանք օրինական են: Առաքել Մովսիսյանին ԱԱԾ են տարել՝ հարցաքննության:
Վարչապետ Նիկոլ Փաշինյանի նկատմամբ քրեական հետապնդումը դադարեցվել է: Ապրիլի 13-ից 22-ը Երեւանում տեղի ունեցած իրադարձությունների փաստով առթիվ Հատուկ քննչական ծառայությունում քննված քրեական գործով, հիշեցնենք, ապրիլի 22-ին ձերբակալվել էին ԱԺ պատգամավորներ Նիկոլ Փաշինյանը, Արարատ Միրզոյանն ու Սասուն Միքայելյանը: Քրեական հետապնդում էր իրականացվում նաեւ Դավիթ Սանասարյանի, Արմեն Գրիգորյանի եւ մի շարք այլ անձանց նկատմամբ: Այսօր Հատուկ քննչական ծառայության քննիչը որոշում է կայացրել դադարեցնել քրեական հետապնդումը եւ կարճել քրեական գործով վարույթը: Հիմքը նրանց արարքներում հանցակազմի բացակայություն է:
Նիկոլ Փաշինյանի գլխավորությամբ կառավարության նիստն այսօր առաջին անգամ ռեկորդային կարճ է տեւել: Բուռն քննարկումներ եւ բանավեճեր չկային: Վարչապետը նույնպես բավական սակավախոս էր: Շուրջ 20 րոպե տեւած նիստի մեկնարկին Փաշինյանը շնորհավորել է առողջապահության նախարարին: Արսեն Թորոսյանի դիտարկմանը, թե այսօր նաեւ բուժաշխատողների օրն է, վարչապետը հումորով է արձագանքել:
Հետո Նիկոլ Փաշինյանը կառավարության անդամներին հայտնել է, որ Մանե Թանդիլյանի հրաժարականի դիմումը չի ընդունել, եւ նախարարը շարունակելու է աշխատել: Հիշեցնենք, որ կուտակայինի հարցով աղմկահարույց որոշումից հետո աշխատանքի եւ սոցիալական հարցերի նախարարը հրաժարական էր ներկայացել: Նա նաեւ «Լուսավոր Հայաստանը» լքելու մասին էր հայտարարել: Այսօր պարզ դարձավ, որ Թանդիլյանը ոչ միայն նախարարի պաշտոնից չի հրաժարվում, այլեւ կուսակցության փոխնախագահի:
Գործադիրի կայացրած կարեւոր որոշումներից մեկը վերաբերում էր «ՎԱԲԱ» ընկերությանը հարկային արտոնություն տալուն: Ընկերությունը նպատակ ունի շուրջ 2.25 միլիարդ դրամի չափով ներդրում կատարել, որից սարքավորումների համար նախատեսված գումարը կկազմի շուրջ 102.9 միլիոն դրամ: Մամուլի տեղեկություններով՝ «ՎԱԲԱ»-ն պատկանում է ՀՀԿ խմբակցության ղեկավար Վահրամ Բաղդասարյանին: Վերջինը, սակայն, խորհրդարանում լրագրողների հետ զրույցում հերքել է այդ լուրերը:
Իսկ կառավարության նիստից հետո լրագրողները Վալերի Օսիպյանից հետաքրքրվեցին ոստիկանության կողմից օրենքով գողերին եւ քրեական հեղինակություններին բերման ենթարկելու լուրերից: Հիշեցմանը, թե Վլադիմիր Գասպարյանի օրոք Հայաստանում բազմիցս օրենքով գողերը հավաքներ են կազմակերպել, ոստիկանապետն արձագանքել է:
Պետական վերահսկողության ծառայության ղեկավարն էլ անդրադարձել է իրենց կառույցի աշխատանքներին: Ավելի վաղ հաղորդվել էր, որ Դավիթ Սանասարյանի ղեկավարած մարմինն ուսումնասիրությունները սկսելու է պաշտպանության նախարարությունից: Պաշտոնյայի խոսքով՝ ինքը հիմնավոր կասկածներ ունի, որ այնտեղ կոռուպցիա կա: Լրագրողները հարցրել են նաեւ, արդյո՞ք ստուգումները կառնչվեն նաեւ Մովսես Հակոբյանին, որի ունեցվածքի օրինականությունը մամուլը շարունակ կասկածի տակ է դնում:
Ի տարբերություն նախորդ նիստերի՝ Ազգային անվտանգության ծառայության պետն այսօր լրագրողների հարցերին չի պատասխանել: Սակայն Արթուր Վանեցյանի մասնակցությամբ փոքրիկ միջադեպ է գրանցվել: Նրան է մոտեցել Գյումրիում սպանված Արտյոմ Ադանալյանի մայրն ու, կարծես, մեղադրել անգործության մեջ:
Երկրապահ կամավորականների միությունն այսօր արտահերթ նիստ էր հրավիրել: Քննարկել են Մանվել Գրիգորյանին ԵԿՄ վարչության նախագահի պաշտոնից զրկելու, Միության համագումար եւ ԵԿՄ-ում ներքին աուդիտ անցկացնելու հարցը: Նիստին, ի դեպ, բազմաթիվ նախկին ԵԿՄ-ականներ: Նիստը լրագրողների համար փակ էր, սակայն ավարտին նիստի ընդունած հայտարարությունը հրապարակային են ընթերցել: ԵԿՄ-ականները նաեւ որոշել են նախաձեռնող խումբ ստեղծել եւ ԵԿՄ արտահերթ համագումար հրավիրել:
«Յանս» ռեստորանային համալիրում խուզարկություն է կատարվել. պատճառը ֆինանսական չարաշահումներն են: Դրանք ի հայտ են եկել համալիրում 2017 թվականին կատարված ներքին ստուգումների արդյունքում: Իրավապահների նախնական տվյալներով՝ համալիրի հաշվապահն ու մենեջերը 2012-2017 թվականների ընթացքում յուրացումներ են կատարել:
Ռեստորանային համալիրի, ինչպես նաեւ տնօրենի եւ սեփականատիրոջ բնակավայրերում խուզարկությունների ժամանակ հաշվապահական փաստաթղթեր, համակարգիչներ, էլեկտրոնային կրիչներ են առգրավվել, նաեւ 2 ատրճանակ եւ մեծ քանակությամբ գումար՝ 1 մլն 100 հազար 400 դոլար, 230.500 եվրո, 36 մլն դրամ են հայտնաբերել: Քննիչի որոշմամբ՝ գումարն ի պահ է հանձնվել Կենտրոնական բանկին՝ մինչեւ քննությամբ դրանց ծագումը պարզելը: Որոշ տեղեկություններով՝ «Յանս»-ը կապվում է Սերժ Սարգսյանի թիկնազորի նախկին ղեկավարի՝ գեներալ Վաչագան Ղազարյանի հետ:
Հունիսի 21-ին դոլարը փոքր-ինչ թանկացել է, եվրոն՝ էժանացել: Դոլարի փոխարժեքը կազմել է 482 դրամ, եվրոյինը՝ 555, ռուբլունը՝ 7 դրամ 55 լումա, ֆունտինը՝ 632 դրամ:
Հունիսի 22-23-ը հանրապետության առանձին շրջաններում ժամանակ առ ժամանակ սպասվում է անձրեւ եւ ամպրոպ: Օդի ջերմաստիճանը 2-3 աստիճանով կբարձրանա: Երեւանում նույնպես առանձին հատվածներում գիշերը եւ երեկոյան ժամերին հնարավոր են տեղումներ: Մայրաքաղաքում գիշերը կդիտվի +16+18, ցերեկը՝ +31+33 աստիճան տաքություն:
