Գերմանիայի կանցլերը Հայաստանում է: Կարճատեւ պաշտոնական այցով Երեւան ժամանած Անգելա Մերկելին «Զվարթնոց» օդանավակայանում դիմավորել է վարչապետ Նիկոլ Փաշինյանը: Դիմավորման պաշտոնական արարողությունից հետո Մերկելը Ծիծեռնակաբերդ է այցելել, ծաղիկներ խոնարհել անմար կրակի մոտ: Գերմանիայի խորհրդարանը, հիշեցնենք, Հայոց ցեղասպանությունը ճանաչել է 2016 թվականին: Չնայած դրան՝ Նիկոլ Փաշինյանի հետ համատեղ ասուլիսում Մերկելը «ցեղասպանություն» բառը չի օգտագործել: Խոսել է հայ ժողովրդի նկատմամբ տեղի ունեցած «1915 թվականի սարսափելի իրադարձության մասին», որը չպետք է մոռացվի:
Վարչապետ Նիկոլ Փաշինյանը հիշեցրել է, որ Գերմանիայի կանցլերի պաշտոնում Անգելա Մերկելն առաջին անգամ է Հայաստան այցելում, եւ ուրախությամբ արձանագրել, որ նա արդեն զգացել է Գերմանիայի եւ անձամբ իր հանդեպ Հայաստանում տիրող դրական մթնոլորտը: Երկու երկրների կառավարությունների ղեկավարները նաեւ խոսել են ղարաբաղյան հակամարտության կարգավորման, երկկողմ հարաբերությունների զարգացման, Հայաստան-Եվրամիություն համաձայնագրի մասին: Այս համատեքստում Անգելա Մերկելն անդրադարձել է Հայաստանի քաղաքացիների համար վիզայի ազատականացման հարցին:
Նիկոլ Փաշինյանը շտապել է փարատել գերմանացի պաշտոնակցի մտահոգությունները. վերջին շրջանում ավելի մեծ թվով Հայաստանի քաղաքացիներ վերադառնում են, քան մեկնում երկրից: Ռուսաստանի եւ Եվրամիության հետ Հայաստանի հարաբերություններում հավասարակշռության մասին հարցին ի պատասխան էլ Նիկոլ Փաշինյանը եւս մեկ անգամ ընդգծել է. Երեւանն իր արտաքին քաղաքականությունը հակակշիռների վրա չի կառուցում:
Հավելենք, որ Երեւան այցի ընթացքում Գերմանիայի կանցլերը հանդիպել է նախագահ Արմեն Սարգսյանի հետ, հասցրել է լինել նաեւ «Թումո» ստեղծարար տեխնոլոգիաների կենտրոնում: Վաղն արդեն Անգելա Մերկելը Բաքու կմեկնի: Ադրբեջանի նախագահի հետ քննարկումների օրակարգում կլինի նաեւ Լեռնային Ղարաբաղի հարցը: Ըստ ամենայնի, անդրադարձ կլինի վերջերս տեղի ունեցած սկանդալին՝ կապված Մերկելի կուսակցությունից Բունդեսթագի պատգավոր Ալբերտ Վայլերին Բաքվի անցանկալի անձանց ցանկում ընդգրկելու եւ նրա մուտքն Ադրբեջան արգելելու հետ:
«Ֆլեշ»-ի սեփականատեր Բարսեղ Բեգլարյանին եւ ընկերության բազայի պետին մեղադրանք է առաջադրվել. բռնության գործադրմամբ ինքնիրավչության դեպքի առիթով հարուցված քրեական գործի նախաքննությունն ավարտվել է: Իրավապահների տվյալներով՝ Բարսեղ Բեգլարյանը «Ֆլեշ» ընկերության «Քանաքեռ» բազայի պետ Հովսեփյանի հետ ընկերության նախկին կոմերցիոն տնօրենին մեղադրել է յուրացումների մեջ եւ բռնության գործադրմամբ պահանջել որպես վնասի փոխհատուցում անվանափոխել իր բնակարանը կամ 20.000 դոլար վճարել: Նախկին կոմերցիոն տնօրենը գրավադրել է բնակարանը եւ ընկերությանը 9 մլն 700 հազար դրամ փոխանցել: Բարսեղյանի եւ Հովսեփյանի նկատմամբ որպես խափանման միջոց է ընտրվել չհեռանալու մասին ստորագրությունը:
Վալերի Օսիպյանի հրամանով՝ Երեւանի ոստիկանապետն ազատվել է աշխատանքից: Գնդապետ Արտակ Պողոսյանը ոստիկանության կադրային ռեզերվ է ուղարկվել: Պողոսյանը, փաստորեն, ոստիկանության Երեւանի վարչությունը ղեկավարեց շուրջ 2 ամիս. նա այս պաշտոնում նշանակվել էր հունիսին: Մինչ այդ Արտակ Պողոսյանը ոստիկանության Երեւանի վարչության պետի տեղակալն էր:
ՀՅԴ-ն վերջապես որոշում կայացրեց. մասնակցելու են Երեւանի ավագանու արտահերթ ընտրություններին: Ընտրել են նաեւ քաղաքապետի թեկնածուին, սակայն դեռ չեն շտապում հայտարարել նրա անունը: Փոխարենը կուսակցության հայաստանյան կառույցում հայտնել են, որ իրենց թիմի կարգախոսն է լինելու «Միասին, հանուն Երեւանի»: Այստեղ վստահ են, որ լուրջ հաջողություններ են գրանցելու եւ հենց այդ ակնկալիքով էլ մասնակցում են ընտրություններին:
Նշենք, որ Երեւանի ավագանու ընտրություններին մասնակցելու մասին հայտարարել է 11 քաղաքական ուժ: Այսօր այդ մասին հայտնել է նաեւ «Օրինաց երկիր» կուսակցությունը. ՕԵԿ-ի քաղաքապետի թեկնածուն Մհեր Շահգելդյանն է:
Գյումրիի «Շիրակ» օդանավակայանի կառամատույցն ամբողջությամբ կվերականգնվի: «Արմենիա» միջազգային օդանավակայաններ» ընկերությունը պատրաստվում է այդ նպատակով շուրջ 1.5 մլրդ դրամ ներդնել, իսկ շինաշխատանքները պետք է ավարտին հասցվեն մինչեւ 2020 թվականը: Օդանավակայանի կառամատույցը չի նորոգվել 1986 թվականից: «Արմենիա» միջազգային օդանավակայաններ»-ը խոստանում է այն համապատասպանեցնել միջազգային ստանդարտներին, ինչը լրացուցիչ խթան կհանդիսանա նոր ավիաընկերությունների ներգրավման համար:
«Նուբարաշեն» ՔԿՀ-ում կալանավոր է մահացել: Արարատ Նիկողոսյանը երեկ երեկոյան ուշագնաց է եղել. ժամանած բժիշկները նրա կենսաբանական մահն են արձանագրել: Նշենք, որ Արարատ Նիկողոսյանը մեղադրվում էր լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության մեջ: Գործով դատավարությունը դեռ ընթանում է:
Օգոստոսի 24-ին դոլարը, եվրոն եւ ռուբլին նորից սկսել են արժեւորվել: Դոլարի փոխարժեքը կազմել է 482 դրամ, եվրոյինը՝ 558, ռուբլունը՝ 7 դրամ 12 լումա, ֆունտինը՝ 619 դրամ:
Օգոստոսի 25-ին հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +33+35 աստիճան տաքություն:
