Սեպտեմբերի 6-ին Ազգային ժողովի եւս մեկ արտահերթ նիստ կգումարվի, այս անգամ նույնպես՝ կառավարության նախաձեռնությամբ: Նիստի օրակարգում կլինեն Քրեական, Քրեական դատավարության եւ Վարչական իրավախախտումների օրենսգրքերում փոփոխությունների եւ լրացումների օրինագծերը:
Գործադիրի այսօրվա նիստի օրակարգում ընդհանուր առմամբ 27 հարց էր ներառված, որից 19-ը՝ չզեկուցվող, 1-ը՝ գաղտնի: Հարցերից մեկն էլ վերաբերել է Երեւանի 2800-ամյակի միջոցառումներին. կառավարությունը որոշել է դրանք անցկացնել ավելի ուշ՝ սեպտեմբերի վերջի փոխարեն՝ հոկտեմբերի 20-ին եւ 21-ին: Պատճառը Ֆրանկոֆոնիայի երեւանյան գագաթնաժողովն է:
Գործադիրն այսօր նաեւ որոշել է եւս մեկ՝ թվով 4-րդ ազատ տնտեսական գոտին ստեղծել: Այն կգործի Հրազդան քաղաքում, իսկ կազմակերպիչը «ԷԿՈՍ» ընկերությունն է: Ներկայացված ծրագիրը տպավորիչ է. ընկերությունը նախատեսում է մինչեւ 2043 թվականն այդ տարածքում ներգրավել շուրջ 200 շահագործողի, ստեղծել 22 նոր աշխատատեղ, 4 մլն դոլարի ներդրում կատարել: Մինչեւ 2021 թվականը եւս 15 մլն, իսկ հետագա տարիներին՝ 30 մլն դոլարի ներդրում եւ 300 նոր աշխատատեղ էլ շահագործողների կողմից է ակնկալվում:
Հյուսիսային պողոտայում երեկ միջադեպ է տեղի ունեցել, որը մեծ աղմուկ եւ դժգոհության ալիք է բարձրացրել համացանցում: Մայրաքաղաքի կենտրոնում իրավապահների եւ փողոցային երաժիշտների միջեւ վիճաբանություն է սկսվել, բերման ենթարկվածներ են եղել: Ավելի ուշ պարզվել է, որ նրանք Ուկրաինայի քաղաքացիներ են, որոնց կարճ ժամանակ անց ազատ են արձակել: Սակայն դժգոհության պատճառը երաժիշտներից մեկի նկատմամբ ոստիկանների ակնհայտ կոպիտ վերաբերմունքն է:
Ոստիկանապետը վստահեցնում է՝ խնդիրն արդեն կարգավորվել է: Վալերի Օսիպյանը նաեւ պնդում է, որ բերման ենթարկված երաժիշտներից մեկը ոչ սթափ վիճակում է եղել. ամեն դեպքում՝ իրեն այդպես են զեկուցել: Օսիպյանը նաեւ ասել է՝ Հյուսիսային պողոտայի բնակիչներից բազմաթիվ բողոքներ են ստացել աղմուկից, եւ հորդորել հասկանալ նրանց. անհնար է ամեն օր ժամեր շարունակ դիմանալ այդ աղմուկին, եթե անգամ երաժշտություն է:
«Լիդիան Արմենիա» ընկերության կողմից Ամուլսարի օգտակար հանածոների ապօրինի արդյունահանման փաստի առթիվ քրեական գործ է հարուցվել: Գլխավոր դատախազության տեղեկատվության հիմքում բնապահպանության եւ ընդերքի տեսչական մարմնի եզրակացությունն է: Ուսումնասիրության արդյունքում Ամուլսարի ոսկու հանքավայրի լեռնահատկացման ակտի սահմաններում «Լիդիան Արմենիա»-ի կողմից ընդերքի ապօրինի օգտագործման փաստեր են պարզվել: Շրջակա միջավայրին, ընդերքին եւ օգտակար հանածոներին պատճառված վնասը շուրջ 18 միլիոն դրամ է: Քրեական գործով նախաքննությունն իրականացնելու է քննչական կոմիտեն:
Երեւանում հայտնաբերել են ԱՄՆ-ի իրավապահների կողմից հետախուզվող, ազգությամբ թուրք Քեւին Օքսուզին: Նա Հայաստանում ձեռնարկատիրական գործունեություն էր ծավալում: Օքսուզի նկատմամբ միջազգային հետախուզում էր հայտարարվել օգոստոսի 23-ին: Քեւին Օքսուզն ԱՄՆ-ում հասարակական կազմակերպության նախագահ է եղել, 2013 թվականին կազմակերպել է մի քանի կոնգրեսականների մասնավոր այցը Թուրքիա եւ Ադրբեջան: ԱՄՆ կոնգրեսականների մասնավոր այցերը կանոնակարգվում են Էթիկայի հանձնաժողովի կողմից, որին Օքսուզը կեղծ տվյալներ է ներկայացրել՝ նշելով, որ կազմակերպությունը ուղղակի կամ անուղղակի որեւէ աղբյուրից ֆինանսական միջոցներ չի ստացել: Սակայն պարզվել է, որ Օքսուզի ղեկավարած կազմակերպությունը ֆինանսավորում է ստացել մի քանի աղբյուրներից, այդ թվում՝ Ադրբեջանի պետական «Սոկար» ընկերությունից: Բացի այդ՝ 9 կոնգրեսականներ եւ Կոնգրեսի 32 աշխատակիցներ հարյուր հազարավոր դոլարների արժողության նվերներ են ստացել: Քեւին Օքսուզը ձերբակալված է:
Ադրբեջանի իշխանությունները որոշել են միջազգային հետախուզում հայտարարել ամերիկահայ միլիոնատեր Դեն Բիլզերյանի նկատմամբ: Հիշեցնենք, որ Դենն ընտանիքի հետ Հայաստան է եկել, հայկական անձնագիր ստացել, հասցրել է լինել նաեւ Արցախում: Հենց սա էլ հետախուզում հայտարարելու պատճառ է դարձել: Ադրբեջանական մամուլում դժգոհություն են արտահայտել նաեւ այն կապակցությամբ, որ Դեն եւ Ադամ Բիլզերյանները, Հայաստանի քաղաքացիություն ստանալուց հետո, հաշվառման են կանգնել հայկական Զինված ուժերում. թեեւ սա օրենքով սահմանված պահանջ է հայկական անձնագիր ստացող արական սեռի բոլոր քաղաքացիների համար:
Կյանքից հեռացել է ԽՍՀՄ ժողովրդական արտիստ, Ռուսաստանի Պետդումայի պատգամավոր Իոսիֆ Կոբզոնը. նա 81 տարեկան էր: Հուլիսի 20-ին Կոբզոնի վիճակը կտրուկ վատթարացել է, նրան գաղտնի հոսպիտալացրել են. այդ մասին տեղեկությունները մամուլում միայն մի քանի օր անց են հայտնվել: Երգչի օրգանները սկսել են չգործել, նրան միացրել են թոքերի արհեստական օդափոխության սարքին: Հիվանդությունները Կոբզոնին վաղուց էին հետապնդում: Նրա մոտ քաղցկեղ էին ախտորոշել դեռեւս 13 տարի առաջ: Հենց այս հիվանդության զարգացումն էլ Կոբզոնի մահվան պատճառ է դարձել: Իոսիֆ Կոբզոնը համերգներով հանդես է եկել ավելի քան կես դար: Նա նաեւ ակտիվ մասնակցություն է ունեցել Ռուսաստանի հասարակական-քաղաքական գործընթացներին:
Սյունիքի մարզում մահվան ելքով պատահար է տեղի ունեցել. վթարի զոհերից մեկը զինծառայող է: Կապան-Քաջարան ավտոճանապարհին բախվել են «FAW» եւ «ՎԱԶ-2106» մակնիշների մեքենաները: Վերջինի վարորդը եւ ուղեւորը՝ 55-ամյա Վարդան Հակոբյանն ու 36-ամյա Մարտին Անտոնյանը, տեղում մահացել են: Մյուս մեքենայի վարորդը հիվանդանոց է տեղափոխվել: Փրկարարները «ՎԱԶ-2106»-ից մահացածների դիերը դուրս են բերել հատուկ տեխնիկայի օգնությամբ: Զոհվածներից Մարտին Անտոնյանը պայմանագրային զինծառայող էր:
Օգոստոսի 30-ին դոլարը, եվրոն եւ ֆունտը թանկացել են: Դոլարի փոխարժեքը կազմել է 482 դրամ, եվրոյինը՝ 564, ռուբլունը՝ 7 դրամ 09 լումա, ֆունտինը՝ 628 դրամ:
Օգոստոսի 31-ին երեկոյան ժամերին հանրապետության առանձին շրջաններում սպասվում է կարճատեւ անձրեւ եւ ամպրոպ: Օդի ջերմաստիճանն էապես չի փոխվի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +20+22, ցերեկը՝ +33+35 աստիճան տաքություն: