Նիկոլ Փաշինյանը երկօրյա այցով Ֆրանսիայում է: Երեկ Փարիզ ժամանելուն պես վարչապետը գնացել է «Երեւանի պուրակ», ծաղկեպսակ զետեղել Կոմիտասի արձանի մոտ, հետո հանդիպել Ֆրանսիայի հայ համայնքի եւ երկրի քաղաքական, հասարակական գործիչների հետ: Հայաստանի անկախության տոնի առիթով Նիկոլ Փաշինյանը ֆրանսահայ հայտնի ֆուտբոլիստ Յուրի Ջորկաեֆին Երախտագիտության մեդալ է շնորհել:
Այսօր արդեն Փաշինյանն աշխատանքային օրը սկսել է «Ֆրանսիայի ձեռնարկությունների շարժում» կազմակերպության անդամների հետ հանդիպմամբ, որից հետո Ելիսեյան պալատում նրան ընդունել է Ֆրանսիայի նախագահ Էմանուել Մակրոնը:
Կառավարության այսօրվա նիստը Փարիզում գտնվող Նիկոլ Փաշինյանի փոխարեն վարել է առաջին փոխվարչապետ Արարատ Միրզոյանը: Իսկ գործադիրի օրակարգում 21 հարց էր ներառված, որից 13-ը՝ չզեկուցվող, մեկը՝ գաղտնի:
Չզեկուցվողների շարքում էր նաեւ «Ռազմավարական նախաձեռնությունների կենտրոն» հիմնադրամը լուծարելու հարցը: Այս գործընթացի համար կառավարության պահուստային ֆոնդից վարչապետի աշխատակազմին 33.292 մլն դրամ կհատկացվի՝ աշխատավարձերի եւ այլ վճարումների համար:
Ծառեր եւ թփեր կտրելու համար այսուհետ նաեւ կարող է բանտարկություն սպառնալ: Գործադիրը հավանություն է տվել պատգամավոր Նաիրա Զոհրաբյանի օրինագիծը, որը ծառերի, թփերի եւ բուսածածկի ապօրինի հատման համար պատժի խստացում է նախատեսում, մասնավորապես՝ առավելագույնը երկու ամիս ժամկետով կալանքը փոխարինել առավելագույնը երկու տարի ժամկետով ազատազրկմամբ: Օրենքի նախագիծն Ազգային ժողով կուղարկվի:
Կառավարությունը հաստատել է նաեւ երկրորդ երեխայի ծննդյան դեպքում միանվագ տրամադրվող նպաստի չափը. 50 հազարի փոխարեն այսուհետ երկրորդ երեխայի համար 150 հազար դրամ կտրամադրվի: Որոշումն ուժի մեջ կմտնի այս տարվա հոկտեմբերի 1-ից:
Իրավապահներն «օլիգարխների թիկնապահներին ասֆալտին փռում» են ոչ թե շոուի համար, այլ անվտանգությունից ելնելով: Լրագրողների հետ զրույցում ոստիկանապետ Վալերի Օսիպյանն ասել է՝ նման քայլի դիմում են, երբ զենքի մասին տվյալներ են ստանում: Իսկ գործարարներ Սամվել Ալեքսանյանի եւ Խաչատուր Սուքիասյանի թիկնապահներին, Օսիպյանի հավաստմամբ, ստուգել են ոչ թե զենքի, այլ շարասյունով երթեւեկելու համար: Այս անգամ նույնպես ոստիկանապետը վկայակոչել է քաղաքացիներից ստացած բողոքները:
Ամեն դեպքում, Վալերի Օսիպյանը չի պատրաստվում ներողություն խնդրել օլիգարխների այն թիկնապահներից, որոնց մոտ հայտնաբերված զենքն օրինական է եղել։ Ոստիկանապետը նաեւ հրաժարվել է պատասխանել հարցին՝ արդյո՞ք ճիշտ է համարում, որ վարչապետը հրահանգներ է տալիս հանրահավաքի հարթակից. ասել է՝ իր վերադասի գործողությունները մեկնաբանելու իրավասություն չունի, վարչապետի կողմից անօրինական հանձնարարականներ էլ չի տեսել»։
Սեպտեմբերի 17-22-ն Ադրբեջանը կրկին լայնածավալ զորավարժություններ է անցկացնելու: Տեղական մամուլը հաղորդում է, որ դրանց ավելի քան 20 հազր զինծառայող է մասնակցելու, 200 միավոր տանկ եւ այլ զրահատեխնիկա, կործանիչներ, ռմբակոծիչներ, ռազմական ավիացիա: Ընդ որում՝ պաշտպանության նախարարության մամուլի հաղորդագրության մեջ այս անգամ կոնկրետ հակառակորդ է նշված՝ Հայաստանը, իսկ նախկինում օգտագործվում էր «պայմանական հակառակորդ» եզրույթը:
Պաշտոնական Երեւանն արձագանքել է զորավարժություններին՝ նշելով, որ Բաքուն հերթական անգամ խախտել է միջազգային պարտավորությունները. դարձյալ ԵԱՀԿ անդամ երկրներին չի տեղեկացրել խոշոր զորավարժության մասին:
Երեւանում արտակարգ դեպք է տեղի ունեցել: Նախօրեին կեսօրից հետո «Մուրացան» բուժկենտրոն է տեղափոխվել 12 երեխա. բժիշկներին ասել են՝ իրենց ինքնազգացողությունն անսպասելի վատացել է: Բոլորը Տնտեսագիտական համալսարանի Ավանի ֆինանսատնտեսագիտական քոլեջի ուսանողներ են, 16-18 տարեկան: Պարզվել է, որ թունավորվել են շմոլ գազից, քոլեջի տարածքում գործող թանի արտադրամասի բակում տեղադրված գազի բալոնի արտահոսքից: Փաստի առիթով նյութեր են նախապատրաստվում:
«Ֆլորենս» փոթորիկը հասել է ամերիկյան Հյուսիսային եւ Հարավային Քարոլինա նահանգների ափերին: Քամու արագությունը 160 կմ/ժ է: Տեղատարափ անձրեւների հետեւանքով ջրհեղեղի վտանգ կա: Չնայած վերջին օրերին փոթորիկը թուլացել է՝ չորրորդից հասնելով առաջին կարգի, սակայն, մասնագետների կարծիքով, «Ֆլորենսը» մնում է վերջին տարիների ամենավտանգավոր փոթորիկներից մեկը:
ԱՄՆ-ի արեւելյան ափամերձ շրջաններում տասնյակ հազարավոր տներ առանց էլեկտրականության են մնացել: Իշխանությունները նախազգուշացրել են, որ աղետալի հեղեղումների վտանգ կա, ինչը կարող է զոհերի պատճառ դառնալ: Հյուսիսային եւ Հարավային Քարոլինաներում արտակարգ դրություն է հայտարարվել:
Սեպտեմբերի 14-ին դոլարն էժանացել է, եվրոն թանկացել է շուրջ 4 դրամով: Դոլարի փոխարժեքը կազմել է 485 դրամ, եվրոյինը՝ 567, ռուբլունը՝ 7 դրամ 8 լումա, ֆունտինը՝ 636 դրամ:
Սեպտեմբերի 15-ին հանրապետությունում սպասվում է առանց տեղումների եղանակ: Օդի ջերմաստիճանը 3-4 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +35+37 աստիճան տաքություն: