Ողբերգական վթար Որոտան-Խնձորեսկ ավտոճանապարհին․ զինվորական «Կամազը» դուրս է եկել ճանապարհից և գլորվել ձորը: Վթարից մահացել է 4 ժամկետային զինծառայող, շարքայինններ՝ Հայրապետ Վոլոդյայի Նաիրյանը, Հրանտ Արայի Գասպարյանը, Էդգար Արմենի Հունանյանը, Դավիթ Բենիամինի Մելքոնյան։ Բոլորը 20 տարեկան էին, երկուսը Երևանից, մյուսները՝ Հրազդանից և Թալինից։ Բեռնատարում եղել է 21 զինծառայող, որից 19-ը թափքում։ Կան նաև վիրավորներ․ 8-ը տեղափոխվել են Գորիսի հիվանդանոց և Սիսիանի զինվորական հոսպիտալ։ Նրանց կյանքին վտանգ չի սպառնում։
Ոստիկանությունը ուսումնասիրել է եվրոպական փորձը և հասկացել, որ վթարների աճը զսպելու ավելի արդյունավետ միջոց, քան բալային համակարգն է, չկա։ Վարչապետի պաշտոնակատարին ներկայացվել է նոր օրինագիծը։ Ամեն վարորդ կունենա 9 բալ, և եթե մեկ տարում զրոյացնի դրանք, կկորցնի վարորդական իրավունքը: Այն կարող է վերականգնել՝ տեսական քննություն հանձնել։ Նոր օրինագծով կվերանայվեն նաև տուգանքները, որոշ արաքներ կքրեականացվեն։
Հանրապետականը պետք է ոչ թե «խռովի» ժողովրդից ու «ձեռքերը լվանա», այլ այնպայման մասնակցի արտահերթին։ Այսպիսի վստահությամբ գրառում է արել պաշտպանության նախկին նախարար Վիգեն Սարգսյանը։ Ըստ նրա՝ ընդդիմություն լինելը պատվաբեր հնարավորություն է ապաշխարելու սխալների համար գործով եւ ոչ թե խոսքով, և երկար տարիներ իշխանություն եղած կուսակցությունը իրավունք չունի հավաքելու կուտակած փորձը, գիտելիքը, արհեստավարժ թիմը և հեռանալու հանրային կյանքից։
Ոչ այս էմոցիայով, բայց Արա Բաբլոյանը ևս համարում է, որ ՀՀԿ-ն ունի լուրջ մարդկային և մասնագիտական պոտենցիալ և պետք է մասնակցի ընտրություններին։ Ինքը՝ Բաբլոյանը, ցուցակում չի լինի․ նա մտադիր է թողնել քաղաքականությունը և վերադառնալ հարազատ գործին։
Էդմոն Մարուքյանը, ընդհակառակը, կարծում է Հանրապետականին նոր խորհրդարանում չեն տեսնի, քանի որ մարդիկ անգամ ամենասուրբ ռեյտինգային թեկնածուի խաթր ձեռքը չեն վերցնի ՀՀԿ-ի քվեաթերթիկը։
Մարուքյանին Շարմազանովը կզարմացնի Ալավերդիից ստացած ձայներով, և ընդհանրապես հանրապետականը, ըստ նրա, լուրջ ներուժ ունի լինելու երկրոդ ուժը խորհրդարանում․ դրա համար են պայքարելու, որովհետև երկու ռեալ բևեռ կա, մեկը իրենք են, մյուսը՝ Փաշինյանի թիմը և նրանց ծափահարողները։
Նիկոլի թիկունքից իրեն ու Աշոտյանին քննադատողներին ասել է ինքը միայն աստծուն և իր ծնողներն է պարտական, որ հայտնվել է խորհրդրանում, իսկ նրանք կկորչեն, եթե իրենց շվաք անող Փաշինյանին հանկարծ գրիպի մի վիրուս հանդիպի։
Շարամզանովը նաև թվարկել է, թե ինչ լավ գործեր են արել, երբ իշխանության էին, և ըստ այդմ՝ ինչու են երկրոդ բևեռի և ուժի հավակնություն հայտնում։
Սերժ Սարգսյանի եղբորորդու՝ Հայկի դեմ ցուցմունք տված Դավիթ Սիմոնյանը, նույն ինքը «Կենտրոնի Կյաժը», վախենում է իր անվտանգության համար։ Նա դատարան էր եկել ոստիկանության 6-րդ վարչության աշխատակիցների ուղեկցությամբ։ NEWS.am–ի հետ զրույցում «Կյաժը» ասել է, որ անվտանգության խնդիր ունի և վերջին շրջանում մշտապես շրջում է ոստիկանների ուղեկցությամբ։
ԱՄՆ-ում տեղի են ունեցել Կոնգրեսի միջանկյալ ընտրություններ, արդեն հայտնի է, որ հանրապետականները պահպանել են Սենատում վերահսկողությունը, դեմոկրատները մեծամասնություն են կազմել Ներկայացուցիչների պալատում: Այս ընտրություններն աչքի են ընկել պատկառելի բյուջեով․ թեկնածուներն ընդհանուր ծախսել են մոտ 5 մլրդ դոլար՝ 2018-ի ընտրապայքայրը դարձնելով ամենաթանկարժեքը Ամերիկայի պատմության մեջ։ Ռեկորդ են սահմանել կանայք․ կոնգրես է անցել 107 կին, Ներկայացուցիչների պալատ՝ 92։ Արդյունքներից գոհ են նաև հայկական համայնքում։ Ամերիկայի հայ դատի հանձնախմբի սատարած 180 թեկնածուներից 165-ը հաղթել են իրենց ընտրատարածքներում:
Դոլարի փոխարժեքը երկար վերելքից հետո անկում է գրանցել՝ կազմելով 487 դրամ։ Եվրոյի փոխարժեքի աճը կանգի չի առնում, 560 դրամ է՝ մոտ 4-ով ավելի, բրիտանական ֆունտի փոխարժեքը 641 դրամ է, ռուսական ռուբլու փոխարժեքը գրեթե անփոփոխ է՝ 7 ու 39 դրամ:
Հայաստանի տարածքում նոյեմբերի 7-ի ցերեկը և 8-ին սպասվում է ամպամածություն, հնարավոր են թույլ տեղումներ եւ մառախուղ: Երեւանում նույն ժամերին սպասվում է ամպամածություն, քաղաքի առանձին հատվածներում հնարավոր է նաեւ թույլ անձրեւ:
Առաջիկա գիշերը մայրաքաղաքում կլինի +4+6, վաղը ցերեկը՝ +10+12:
