Ավստրալիայի բնակչուհին մահացել է բիսկվիտ ուտելու մրցույթին մասնակցելուց հետո, հայտնում է BBC-ն:
Արագության մրցույթի մասնակիցները ավանդական շոկոլադե բիսկվիտ ուտելու մրցույթին մասնակցել են Քվինսլենդի Հերվի Բեյ հյուրանոցում, որը կիրակի՝ հունվարի 26-ին, կազմակերպվել էր Ավստրալիայի օրվա պատվին: Ականատեսների խոսքով՝ 60-ամյա կինը սկսել է ուտել աղանդերի հերթական չափաբաժինը, երբ նրա մոտ սկսվել է էպիլեպսիայի նոպա:
Մինչ բժիշկների ժամանումը ավստրալուհուն ցուցաբերվել է առաջին բուժօգնություն, այնուհետեւ նրան տեղափոխել են հիանդանոց, որտեղ նա մահացել է: Հյուրանոցի աշխատակազմը ցավակցություն է հայտնել կնոջ ընտանիքին եւ ընկերներին, ում անունը չի նշվում:
Կերակուր ուտելու մրցույթները Ավստրալիայի օրվա՝ եվրոպացիների կողմից մայրցամաքը յուրացնելու պատվին ազգային տոնակատարության զվարճությունների ամենատարածված տեսակն է: Այն նշում են հունվարի 26-ին, 1788 թվականի հենց այդ օրն է կապիտան Արթուր Ֆիլիփը ափ իջել Սիդնեյի ծովածոցում, բարձրացրել բրիտանական դրոշը եւ հիմնադրել Նոր Հարավային Ուելս անունով առաջին գաղութը:
