«Բարգավաճ Հայաստան» խմբակցության քարտուղար Արման Աբովյանը քիչ առաջ ֆեյսբուքյան էջում տեղեկացրեց, որ խմբակցությունը օրենքով սահմանված ժամկետում ՀՀ Սահմանադրական դատարան է ուղարկել ՍԴ-ին ուղղված դիմումը։ ԲՀԿ-ին է միացել նաև ամիսներ առաջ խմբակցությունից դուրս եկած, այժմ անկախ պատգամավորի Տիգրան Ուրիխանյանը։
Այսպիսով 26 պատգամավոր Սահմանադրական փոփոխությունների նախագծի հարցով դիմում է ՍԴ։ Սահմանադրության 169-րդ հոդվածի առաջին մասի 2-րդ կետի համաձայն՝ ՍԴ կարող են դիմել պատգամավորների ընդհանուր թվի առնվազն մեկ հինգերորդը՝ Սահմանադրության 168-րդ հոդվածի 1-ին, 4-րդ և 6-րդ կետերով սահմանված դեպքերում։
ՀՀ Ազգային ժողովն ունի 132 պատգամավոր, որի մեկ հինգերորդը 26,4-ն է։ Իշխանության ներկայացուցիչները պնդում են, որ ՍԴ դիմելու համար առնվազն 27 ձայն է հարկավոր։
NEWS.am-ի հետ զրույցում «Բարգավաճ Հայաստան» խմբակցության պատգամավոր Միքայել Մելքումյանը անդրադառնալով ՍԴ դիմելուն և ձայների վերաբերյալ տարակարծություններին, նախ հարցրեց. «26, 4-ը 26 է՞, թե՞ 27»։
«Վերջերս ԱԺ-ում հանձնաժողովներից մեկի նիստի քննարկման ժամանակ քննարկում եղավ, որ եթե ամբողջ չորս է, ապա դա չի կլորացվում դեպի վերև, դա ներքև է գալիս։
Էստեղ տենց իրավական բան չկա գրած, որ էսինչ ամբողջ էսինչը էսքա՞ն է, թե՞ էնքան է։ Համենայն դեպս 26,4-ը ավելի 26 է, քան 27»,- ասաց Միքայել Մելքումյանը։
ԲՀԿ-ական պատգամավորից հետաքրքրվեցինք նաև, որ, ինչպես Նիկոլ Փաշինյանն է նշել, կեսգիշերն անց ուժի մեջ է մտնելու Սահմանադրական փոփոխությունների նախագիծը, այդ դեպքում ՍԴ-ն կարո՞ղ է վարույթ ընդունել խմբակցության դիմումը։
«Հո Սահմանադրական դատարանը չի՞ վերանում, ՍԴ-ն ինստիտուտ է, չէ՞։Ոնց որ ասեք՝ մի քանի պատգամավոր իրենց լիազորությունները դադարեցրել են, նորը չկա, հիմա պառլամենտը չի՞ գործում։ Քվորումը կա՞, թե՞ չկա, էդ ինստիտուտը պետք է գործի։ Չի կարող այնպես լինի, որ պարալիզացվի պետական իշխանության մի թևը»,- եզրափակեց Միքայել Մելքումյանը։
Հիշեցնենք, որ դեռևս հունիսի 22-ին, երբ ԱԺ-ն որոշում ընդունեց, որ Սահմանադրական փոփոխությունների նախագիծը չի ուղարկելու Սահմանադրական դատարան, որովհետև այն վերաբերում է ՍԴ կազմին և շահերի բախման խնդիր կա, և երկրորդ ընթերցմամբ ու ամբողջությամբ ընդունեց այն, ԲՀԿ-ն հայտարարեց, որ նախաձեռնում է ԱԺ պատգամավորների մեկ հինգերորդի ստորագրահավաք՝ խորհրդարանի կողմից ընդունված որոշման սահմանադրականության հարցով Սահմանադրական դատարան դիմելու համար: «Բարգավաճ Հայաստանը» դիմեց «Լուսավոր Հայաստան» խմբակցությանը, որպեսզի միանան նախաձեռնությանը՝ «երկրում իրավական անվտանգությունը պաշտպանելու և սահմանադրական կարգի տապալումը կանխելու համար»։ ԼՀԿ-ն հունիսի 24-ին հայտարարեց, որ ՍԴ-ը կդիմեն միայն Ռոբերտ Քոչարյանի դիմումի քննությունից հետո։