News
Լրահոս
News
Երեքշաբթի
Սեպտեմբեր 29
USD
485.66
EUR
565.55
RUB
6.16
ME-USD
0.01
Տեսնել լրահոսը

Հանրապետական կենտրոնական հավաքակայանում COVID-19–ի հետազոտման թեստերի արդյունքներով որևէ նորակոչիկի մոտ կորոնավիրուս չի աշխտորոշվել։ Այս մասին  NEWS.am–ին հայտնեց ՊՆ մամլո խոսնակ Շուշան Ստեփանյանը։ «Այս պահի դրությամբ վարակակիրներ չեն հայտնաբերվել, եղել են կասկածելի դեպքեր, որոնք հետազոտվել են նաև ՊՇՌ թեստավորման մեթոդով, սակայն նրանց թեստի պատասխանները ևս բացասական են եղել»,–ասաց Ստեփանյանը։

Նշենք, որ այս տարի բոլոր զորակոչիկները ծառայության մեկնելուց առաջ պարտադիր թեստավորվում են, ապա նոր միայն մասնակցում վիճակահանությանը։ Պաշտպանության նախարարությունից հավաստիացնում են, որ Հանրապետական կենտրոնական հավաքակայանում ամառային զորակոչի գործընթացի պատշաճ իրականացմանը զուգահեռ հակահամաճարակային խիստ միջոցառումներ են կազմակերպված՝ զինված ուժեր վարակի ներթափանցումը կանխելու նպատակով։

Իսկ մինչ այդ զորակոչային տարիքի տղաները պատվաստումներ ստանալու, ինչպես նաև հետազոտվելու նպատակով այցելում են պոլիկլինիկաներ, որտեղ, COVID-19–ով պայմանավորված, մեղմ ասած քաոսային իրավիճակ է։ Օրերս NEWS.am–ի թղթակիցը Երևանի Թիվ 19 պոլիկլինիկայում ականատես է եղել, թե ինչպես մեկ ժամից ավելի մի խումբ զորակոչիկներ կորոնավիրուսով վարակված հիվանդների հետ նույն հերթում սպասում են տեղամասային թերապևտի աշխատասենյակի մոտ, որպեսզի իրենց ուղեգրեն համապատասխան մասնագետների մոտ։ Հերթում սպասող տարեց քաղաքացիներից մեկն անգամ ինքն է անձամբ զգուշացրել նորակոչիկներին, որ հաստատված վարակակիր է և հորդորել իրենից հեռու կանգնել։ Թեև տվյալ հարկաբաժնում հերթերի կարգավորման նպատակով գծանշումներ էին արված, իսկ բուժաշխատողները փորձում էին կարգավորել հերթը և հորդորում էին քաղաքացիներին պահպանել սոցիալական հեռավորություն, սակայն փաստն այն է, որ նեղ միջանցքում հնարավոր չէր պահպանել սահմանված տարածությունը և ժամեր շարունակ կանգնած մնալ նույն տեղում։ Ի դեպ՝ նույն հարկում է գտնվում նաև ռենտգեն հետազոտության կաբինետը, որտեղ տվյալ ժամանակահատվածում նախատեսված էր նաև COVID-19 ունեցող հիվանդների հետազոտությունը։

Խնդրի առնչությամբ NEWS.am–ը զրուցեց Թիվ 19 պոլիկլինիկայի գլխավոր բժիշկ Ռոբերտ Պետրոսյանի հետ։ Վերջինս վստահեցրեց, որ կորոնավիրուսով  հաստատված հիվանդներ պոլիկլինիկա չեն այցելում, թեև նրա խոսքով՝ լինում են դեպքեր, երբ ակնհայտ ախտանիշներ ունեցող հիվանդներին տեղափոխում են պոլիկլինիկա, ռենտգեն հետազոտության ենթարկում, ապա ուղարկում թեստավորման։ Պետրոսյանը հայտնեց, որ նախազորակոչային և զորակոչային տարիքի արական սեռի քաղաքացիները այս ընթացքում նույն ընթացակարգով են պոլիկլինիկայում բուժզննում անցնում, ինչպես մյուս քաղաքացիները։

Հարցին՝ արդյոք ռիսկային չէ՞, երբ զորակոչային տարիքի տղաները նույն հերթում են սպասում հնարավոր վարակակիրների կամ կոնտակտավորների հետ, մանավանդ որ շատ քաղաքացիներ ախտանշաններ ունենալու դեպքում, շարունակում են այցելել պոլիկլինիկաներ, Պետրոսյանը պատասխանեց։

«Նախ, որևէ քաղաքացի չի կարող առանց պաշտպանիչ դիմակի և ջերմաչափման այցելել մեր պոլիկլինիկա։ Եթե մեզ այցելած քաղաքացին ջերմություն է ունենում, նրան հենց մուտքի մոտ առանձնացնում ենք մեկուսարանում, ինչից հետո հերթապահ թերապևտն իջնում  է մեկուսարան, գնահատում  քաղաքացու վիճակը, և եթե քաղաքացին լուրջ գանգատներ չունի, նրան ուղարկում են տնային բուժման, սակայն եթե լուրջ ախտանիշներ ունի, հոսպիտալացնում են։ Մենք պարետատան տրամադրած ցանկով տեղեկանում ենք վարակակիրների և կոնտակտավորների մասին, և հեռախոսազանգով հսկողություն ենք իրականացնում»։

Դիտարկմանը, թե հնարավոր չէ՞ արդյոք գործընթացն այնպես կազմակերպել, որ զորակոչիկների շփումը մյուս քաղաքացիների հետ նվազագույնի հասցվի, օրինակ, նրանք առանձին մուտքով մտնեն՝ հաշվի առնելով, որ պոլիկլինիկան բավականին մեծ է և ունի նման հնարավորություն, և առանձին բժիշկներ նախատեսված ժամանակահատվածում սպասարկեն միայն զորակոչիկներին, Պետրոսյանն արձագանքեց.

«Ամեն օր առավոտյան պոլիկլինիկայի շենքի առջև 40 հոգի հերթ են կանգնում՝ սպասելով ժամը 9–ին, որպեսզի պոլիկլինիկան  բացվի և կարողանան մուտք գործել։ Պոլիկլինիկան աշխատում է թաղամասային սկզբունքով և յուրաքանչյուր զորակոչիկ այցելում է իր թերապևտին.  մեր պոլիկլինիկայում 22 տեղամասային  թերապևտ է աշխատում և նրանցից յուրաքանչյուրը տարբեր զորակոչիկների է սպասարկում, այսինքն ես չեմ կարող  բոլոր զորակոչիկների համար մի թերևապևտ առանձնացնել»։

Պետրոսյանը միաժամանակ ընդգծեց, որ իրենք իրավասու չեն զորակոչային տարիքի տղաների հետազոտության գործընթացն այլ կարգով կազմակերպել, քանի որ առողջապահության նախարարությունից նման ցուցում չեն ստացել։

«Զինկոմիսարիատները սահմանված կարգով զորակոչիկներին ուղեգրում են պոլիկլինիկա, որպեսզի այստեղ նրանք հետազոտության ենթարկվեն։ Երևանում գործում է 28 պոլիկլինիկա, և բոլորի համար նույն չափանիշներն են սահմանված։ Եթե զորակոչիկների համար հատուկ կարգ սահմանված լիներ, բուժզննում անցնելու հատուկ ռեժիմ կամ առանձին մուտք, մենք նույնպես կհետևեինք այդ կանոնին»,–եզրափակեց գլխավոր բժիշկը։

Նշենք, որ զորակոչի առողջապահական բաղադրիչի համար պատասխանատու է Առողջապահության նախարարությունը: Մասնավորապես, առողջապահության նախարարի հրամանով կազմակերպվում է նախազորակոչային և զորակոչային տարիքի արական սեռի քաղաքացիների հիվանդանոցային բուժումը, ինչպես նաև առողջապահության նախարարությունը համակարգում է նախազորակոչային եւ զորակոչային տարիքի քաղաքացիների պատվաստումների գործընթացը։ NEWS.am–ի հարցմանն ի պատասխան Առողջապահության նախարարությունից տեղեկացրեցին, որ ինչպես նախորդ տարիներին, այս տարի ևս զորակոչային տարիքի քաղաքացիների հետազոտությունը պոլիկլինիկաներում կազմակերպվել է ընդհանուր հիմունքներով՝ պահպանելով հակահամաճարակային կանոնները։ 

Ընդամենը մեկ ամիս առաջ ՀՀ վարչապետ Նիկոլ Փաշինյանն իր ֆեյսբուքյան էջում հակահամաճարակային կանոնների խախտումների վերաբերյալ նյութեր էր հրապարակել,  տեղադրելով նաև «Արմենիա» բժշկական կենտրոնում հերթում սպասող զորակոչիկների եւ նրանց ծնողների լուսանկարը։ Այդ կերպ երկրի ղեկավարը, ըստ էության, հասարակությանը զգուշացնում էր, որ չպետք է թույլ տալ, որ վարակը ներթափանցի բանակ։ Հետաքրքիր է,  այդ լուսանկարից ի՞նչ հետևություն է արել   երկրի առողջապահական ոլորտի պատասխանատուն կամ, առհասարակ, պոլիկլինիկաներում տիրող քաոսից նա տեղյա՞կ է, մի՞թե այս իրավիճակում նույնպես միայն հասարակությունն է մեղավոր կամ փաստացի պատերազմող երկրի բանակ զորակոչվող պատանին, որն առանց վարանելու իր հերթը զիջեց կորոնավիրուսով վարակված պապիկին, և նույնը կաներ, եթե նույն այդ պապիկը վարակված չլիներ։

Տպել
Կարդացեք նաև
Ամբողջը
Ցածր եկամուտ ունեցող երկրները կորոնավիրուսի ախտորոշման 120 միլիոն թեստ կստանան. ԱՀԿ
Այս թեստերը թույլ են տալիս վարակի ախտորոշում անցկացնել ընդամենը 15-30 րոպեում...
ԱՄՀ-ն պատմել է, թե ինչպես համավարակը կազդի եվրոպական երկրների տնտեսությունների վրա
Ընդ որում, Գեորգիեւան խոստովանել է, որ երկրորդ եռամսյակի տվյալները մի փոքր ավելի լավն էին, քան հունիսյան կանխատեսումները ...
ԱՀԿ-ն դեռ տվյալներ չունի կորոնավիրուսի ծագման մասին
Նրա խոսքով` վիրուսի ծագման հարցն ուսումնասիրում են չինացի փորձագետները, ԱՀԿ-ն հրավիրվել է մասնակցել...
ԱՀԿ-ում կարծում են, որ կորոնավիրուսը կարող է սեզոնային վարակ դառնալ
Ճիշտն ասած, ես չգիտեմ, թե երբ դա կարող է պատահել, բայց ես լավատես եմ․․․
Մակրոնը փորձել է արդարացնել կորոնավիրուսի համավարակի հետ կապված նոր սահմանափակումները
Մերկել. Գերմանիայում կորոնավիրուսով վարակման օրական դեպքերի թիվը կարող է հասնել 19 200-ի