Անհայտ անձինք կողոպտել են Փարիզում սաուդցի արքայադստեր բնակարանը, հափշտակել թանկարժեք զարդեր, պայուսակներ եւ մորթյա մուշտակ ընդհանուր առմամբ 1,5 միլիոն եվրո արժողությամբ, հաղորդում է ՌԻԱ Նովոստի-ին՝ հղում անելով Parisien-ին:
Կողոպտիչը կամ կողոպտիչները ներխուժել են 200 քառակուսի մետր մակերեսով բնակարան, որը տեղակայված է Փարիզի 16-րդ շրջանում, եւ դուրս հանել 20 պայուսակ 50 հազար եվրո արժողությամբ, թանկարժեք զարդեր, այդ թվում՝ 8 հազար եվրո արժողությամբ Cartier ժամացույց, մորթյա մուշտակ:
Ոստիկանությունը չի հայտնաբերել բնակարանում կողոպուտի հետքեր: Քննիչները կասկածում են սաուդցի արքայադստեր ընկերոջը, որի հետ նա ծանոթացել է օգոստոսին: Նաեւ հաղորդվում է, որ անհետացել է բնակարանի բանալիների կրկնօրինակը:
«Ընկերը մի քանի անգամ առաջարկել է նրան լյուքս դասի իրեր Ebay-ում, սակայն արքայադուստրը հրաժարվել է»,-նշել են ոստիկանությունում:
Կողոպուտի մասին հայտնի է դարձել հինգշաբթի առավոտյան: Կողոպուտի պահին 47-ամյա արքայադուստրը գտնվել է Ֆրանսիայի հարավում: Երբ նա վերադարձել է Փարիզ եւ հայտնաբերել թալանված բնակարանը, նրա ինքնազգացողությունը վատացել է, եւ արքայադուստրը տեղափոխվել է հիվանդանոց:
