ԱՄՆ նորընտիր փոխնախագահ Քամալա Հարիսը COVID-19-ի դեմ պատվաստվել է հեռուստատեսության ուղիղ եթերում, քանի որ Բայդենի նոր վարչակազմը փորձում է բարձրացնել պատվաստումների նկատմամբ վստահությունը, թեեւ նախազգուշացնում է, որ ամիսներ կանցնեն, մինչ այն բոլորին հասանելի կդառնա:
Նա դարձել է երկրորդ բարձրաստիճան անձը էթնիկ փոքրամասնությունից, ով պատվաստում է ստացել՝ գլխավոր վիրաբույժ Ջերոմ Ադամսից հետո:
Դեմոկրատական կուսակցությունից նորընտիր նախագահ Ջո Բայդենը, ով պաշտոնը կստանձնի հունվարի 20-ին, հայտարարել է, որ պայքարելու է կորոնավիրուսի դեմ, որը վարակել է ավելի քան 19 միլիոն ամերիկացու եւ սպանել ավելի քան 334 000 մարդու: Անցյալ շաբաթ նա պատվաստանյութի առաջին չափաբաժնի ներարկումն է ստացել ուղիղ եթերում: Լիարժեք պաշտպանության համար անհրաժեշտ է երկու չափաբաժին:
Բայդենի թիմը ընդգծել է պատվաստանյութի տարածումը խրախուսելու եւ կորոնավիրուսից հատկապես շատ տուժած ոչ սպիտակամորթ խմբերի պատվաստման կարեւորությունը:
Հարիսը ստացել է COVID-19-ի դեմ Moderna ընկերության պատվաստանյութը: «Ես ուզում եմ բոլորին կոչ անել պատվաստվել, դա համեմատաբար անցավ է, անվտանգ․․․ Դա բառացիորեն կյանքեր է փրկում: Ես վստահում եմ գիտնականներին»: