Վրաստանն այսօր COVAX պլատֆորմին հաստատում կուղարկի այն մասին, որ երկիրը պատրաստ է տարվա առաջին եռամսյակում ստանալ կորոնավիրուսի դեմ պատվաստանյութը, հայտնում է «Իմեդի» հեռուստաընկերությունը: Վրաստանը փաստացի ավարտել է պատվաստման ուղղությամբ աշխատանքը:
Երկիրը լիարժեք բացելու համար, այսինքն՝ սովորական տնտեսական ռեժիմի վերականգնման համար անհրաժեշտ է պատվաստել մեծահասակ բնակչության 60 տոկոսին: Ցանկալի է, որ պատվաստումն ավարտվի մինչեւ տարեվերջ: Դրա համար կարող է ծախսվել մոտ 164 մլն լարի (51 մլն դոլար): Այսպիսի եզրահանգման է եկել հատուկ խորհուրդը, որը կազմված է կառավարության անդամներից, փորձագետներից, տեղական եւ միջազգային ֆինանսական կազմակերպություններից:
Պատվաստումը լինելու է կամավոր եւ անվճար: Աշխարհում կորոնավիրուսի դեմ պատվաստվել է արդեն ավելի քան 32 մլն մարդ:
Վրաստանում պատվաստման համար առաջնահերթ խմբերն արդեն որոշվել են, դրանք բաշխվել են հետեւյալ կերպ՝ առաջին հերթին առողջապահության հատվածի աշխատակիցները, երկարաժամկետ խնամքի հաստատությունների անձնակազմը եւ շահառուները, 75-ն անց քաղաքացիները, 65 -74 տարեկան քաղաքացիները, 55-64 տարեկան քաղաքացիները, ինչպես նաեւ 18-ից մինչեւ 54 տարեկան քրոնիկական հիվանդություններով քաղաքացիները:
Այնուհետեւ նախատեսվում է մնացած բնակչության պատվաստումը, այդ թվում՝ նրանց, ովքեր արդեն հիվանդացել են կորոնավիրուսով: Մինչեւ 18 տարեկան երեխաներին չեն պատվաստելու:
Երկրի առողջապահության նախարար Եկատերինա Թիքարաձեն հայտարարել է, որ պատվաստումը կսկսվի փետրվարի վերջին: Նրա խոսքով՝ այս փուլում խոսքը վերաբերում է Pfizer-ի պատվաստանյութին, փոխանցում է «Նովոստի-Գրուզիան»:
Նա ասել է, որ Վրաստանում արդեն ստեղծվել է բժշկական շղթա, որը նախատեսում է պատվաստանյութերի պահման համար սառնարաններ:
Ներկայումս Վրաստանում դիտարկում են Չինաստանում արտադրված, բրիտանա-շվեդական AstraZeneca ընկերության, ամերիկյան Pfizer ֆիրմայի եւ նրա գերմանական գործընկեր BioNTech-ի, ինչպես նաեւ ԱՄՆ-ից Moderna ֆիրմայի պատվաստանյութերի գնման հնարավորությունը: Առաջին փուլում նախատեսվում է ձեռք բերել պատվաստանյութի 1,4 մլն դեղաչափ, որ պատվաստեն բնակչության շուրջ 20 տոկոսին:
