Վրաստանի ընդդիմությունը մտադիր է շարունակել ցույցերը, չնայած կառավարող «Վրացական երազանք» կուսակցության՝ «Օտարերկրյա ազդեցության թափանցիկության մասին» օրինագծի հետկանչի մասին որոշմանը, տեղեկացրել է «Գիրչի – ավելի շատ ազատություն» կուսակցության անդամ Ցոթնե Քոբերիձեն, փոխանցել է «Իմեդի» հեռուստաալիքը։
Կուսակցությունում «Վրացական երազանքից» պահանջել են ազատ արձակել ցույցերի ժամանակ կալանավորվածներին եւ ավելի մեծ հստակություն մտցնել օրինագծի հետկանչի հարցում։
«Այսօր անպայման ցույց է լինելու, որովհետեւ շատ երիտասարդներ կան, որոնք չեն վստահում «Վրացական երազանքին»,- նշել է նա։
Քոբերիձեի խոսքով՝ հստակություն է պետք, թե ինչպես է կուսակցությունը պատրաստվում հետ կանչել օտարերկրյա գործակալների մասին օրինագիծը։ «Մյուս կողմից՝ քանի դեռ այն մարդիկ, ովքեր կանգնած էին մեր կողքին եւ գերի են ընկել, ազատ չեն արձակվել, «Վրացական երազանքը» չպետք է մտածի, որ իր աշխատանքը հեշտ է լինելու»,- ասել է նա։
Մինչ այդ Վրաստանի կառավարող «Վրացական երազանք» կուսակցությունը, «Ժողովրդի ուժը» հասարակական շարժումը եւ խորհրդարանական մեծամասնությունը որոշել էին Վրաստանի խորհրդարանից հետ կանչել օտարերկրյա գործակալների մասին օրինագիծը։
Մարտի 7-ին Վրաստանի խորհրդարանը ձայների մեծամասնությամբ առաջին ընթերցմամբ ընդունել էր «Օտարերկրյա ազդեցության թափանցիկության մասին» օրինագիծը, որը նախատեսում էր օտարերկրյա ֆինանսավորում ստացող կառավարական կազմակերպությունների եւ լրատվամիջոցների ռեեստրի ստեղծում։ Դրանից հետո երկու օր Թբիլիսիում չեն դադարել բողոքի ցույցերը։
Մարտի 8-ի նախօրեին վրացական հատուկջոկատայինները լրիվ ցրել են օտարերկրյա գործակալների մասին օրենքի դեմ բողոքողների ցույցը։ Նրանք կիրառել են ջրնետ մեքենաներ եւ արցունքաբեր գազ։