Ադրբեջանի հետ լիարժեք ձեւաչափով երկխոսություն հնարավոր է միայն միջազգային ձեւաչափով։ Այս մասին ասել է Արցախի արտգործնախարար Սերգեյ Ղազարյանը՝ «Արցախ. շրջափակման 100 օր» տեսակամուրջի ժամանակ։
Նախարարը հիշեցրել է, որ 44-օրյա պատերազմից հետո ՌԽԿ-ի միջնորդությամբ ադրբեջանական կողմի հետ հանդիպումներ են եղել հումանիտար եւ տեխնիկական հարցերի լուծման հետ կապված։ «Վերջին հանդիպումներում ադրբեջանական կողմը փորձել է խեղաթյուրել իրենց օրակարգը։ Հանդիպումների նպատակն էր քննարկել ապաշրջափակման, գազի եւ էլեկտրաէներգիայի մատակարարման վերականգնման հարցերը։ Ադրբեջանական կողմը բովանդակությունը ներկայացրել է խեղաթյուրված, սա անընդունելի է։ Բայց մենք պատրաստ ենք նույն ձեւաչափով հանդիպումներին՝ ՌԽԿ-ի մասնակցությամբ։
Ինչ վերաբերում է լիարժեք ձեւաչափով բանակցություններին, ապա դրանք հնարավոր են միայն միջազգային ձեւաչափով։ Հաշվի առնելով, որ Ադրբեջանը խախտել է անգամ ԵԱՀԿ Մինսկի խմբի համանախագահների միջնորդությամբ ձեռք բերված պայմանավորվածությունները, ինչպե՞ս չի խախտի երկկողմ ձեւաչափով պայմանավորվածությունները»,- նշել է նախարարը՝ ընդգծելով կարեւոր բաղադրիչը՝ կատարման երաշխիքների մեխանիզմը։
Խոսելով Արցախ փաստահավաք առաքելության համար այց կազմակերպելու գաղափարի մասին՝ Ղազարյանը նշել է, որ ողջունում է բոլոր այն քայլերը, որոնք ուղղված են լինելու իրավիճակի վերաբերյալ միջազգային հանրությանը փաստեր ներկայացնելուն։