Ազգային ժողովի նախագահ Ալեն Սիմոնյանի՝ քաղաքացի Կարեն Մկրտչյանի դեմքին թքելու առթիվ «Իրազեկ քաղաքացիների միավորում» հասարակական կազմակերպության ներկայացրած հաղորդման հիման վրա վարույթ չի նախաձեռնվի: Այս մասին NEWS.am-ի հետ զրույցում ասաց Քննչական կոմիտեի մամուլի խոսնակ խոսնակ Գոռ Աբրահամյանը:
«Հիմքերի բացակայության հանգամանքով պայմանավորված կազմվել է քրեական վարույթ չնախաձեռնելու արձանագրություն»- նշեց Աբրահամյանը:
ԱԺ նախագահի կողմից քաղաքացու դեմքին թքելու առթիվ կազմակերպությունը Դատախազություն էր ներկայացրել հաղորդում՝ խուլիգանության (2021 թ. Քրեական օրենսգրքի 297-րդ) եւ պաշտոնատար անձի կողմից լիազորությունների չարաշահման (ՔՕ հոդված 441) կամ ազատությունից ապօրինի զրկելու (ՔՕ հոդված 192) հատկանիշներով վարույթ նախաձեռնելու համար: Դատախազությունն ավելի ուշ հաղորդումը փոխանցել էր Քննչական կոմիտեին:
Հիշեցնենք, որ ապրիլի 3-ին, քաղաքացի Կարեն Մկրտչյանը ֆեյսբուքյան էջում հայտնել էր, որ նա Կասկադում Ազգային ժողովի նախագահ Ալեն Սիմոնյանին դավաճան է կոչել, ինչից հետո Սիմոնյանը հրահանգել է թիկնապահներին բռնել իրեն եւ թքել է իր դեմքին:
Ալեն Սիմոնյանն ավելի ուշ ֆեյսբուքյան գրառմամբ չէր հերքել կատարվածը:
« «Ականջներիդ օղ արեք», որ ձեր լկտիությունն անպատասխան չի մնալու ՀՀ օրինական իշխանությանը վիրավորելուն լինելու է օրինական պատասխան»,- նշել էր Սիմոնյանը:
Այս միջադեպի վերաբերյալ Լեւոն Տեր-Պետրոսյանը հոդված էր հրապարակել, որտեղ նշել էր, որ ՔՊ խմբակցությունը պարտավոր է նախաձեռնել Ալեն Սիմոնյանի պաշտոնանկության հարցը: Ի պատասխան Ալեն Սիմոնյանը հրավիրել էր Լեւոն Տեր-Պետրոսյանին Ազգային ժողով:
Հանրային մեծ ճնշումից հետո, հինգ օր անց, ի վերջո, Սիմոնյանը ընդունել էր կատարվածը եւ ներողություն խնդրել Հայաստանի քաղաքացիներից:
«Ես ցավում եմ, որ ինձ ուղղված անձնական վիրավորանքից հունից դուրս եկա: Վստահ եմ, որ արժանապատվություն ունեցող որեւէ հայ մարդ չէր հանդուրժի նման վիրավորանքը, սակայն ընտրված պաշտոնյայի վրա դրված բարձր պատասխանատվությունը պիտի զսպող դեր ունենա»:
Ալեն Սիմոնյանի հետ ունեցած միջադեպի հետեւանքով վնասվածք եմ ստացել աչքիս հատվածում. Կարեն Մկրտչյան
ՔՊ խմբակցությունը պարտավոր է նախաձեռնել Ալեն Սիմոնյանի պաշտոնանկության հարցը. Լևոն Տեր-Պետրոսյան
Քաղաքացու դեմքին ենթադրաբար թքելու մասով խնդրել ենք քրեական վարույթ նախաձեռնել. Դանիել Իոաննիսյան
Մի քանի օր հակառակվելուց հետո Ալեն Սիմոնյանը հանրայնորեն ներողություն է խնդրել իր արարքի համար