Արաբական պետությունների լիգան (ԱՊԼ) մերժել է Սիրիայի ներկայացրած` ճգանաժամի կարգավորման ծրագրի առաջարկները: 

Ինչպես հաղորդում է Associated Press-ը,  մասնավորպես ԱՊԼ ծրագրով նախատեսվում էր  500 արաբ դիտորդի տեղակայում Սիրիայի տարածքում`  երկրում իրավիճակի վերահսկման նպատակով: Իր հայտարարության մեջ ԱՊԼ-ն նշել է, որ Դամասկոսի առաջարկությունները խախտում են ծրագրի էությունը,  քանի որ փոփոխություն են մտցնում դիտորդների կարգավիճակում:

Հիշեցնենք, որ նոյեմբերի 12-ին ԱՊԼ-ն կասեցրել էր Սիրիայի անդամակցությունը կազմակերպությանը` այդ երկրում չդադարող  բռնությունների պատճառով:

Նոյեմբերի 13-ին Սիրիայում նախագահ Բաշար Ասադի համակիրների  զանգվածային ցույցեր էին տեղի ունեցել` ի նշան ԱՊԼ որոշման դեմ բողոքի:  Դամասկոսը  պահանջել էր «շուտափույթ կերպով ԱՊԼ արտակարգ գագաթնաժողով հրավիրել` երկրում ճգնաժամի կարգավորման ուղիների քննարկման նպատակով»:

Սիրիայի նախագահ Բաշար ալ Ասադի հրաժարականի պահանջով բողոքի ակցիաները Սիրիայի տարբեր քաղաքներում շարունակվում են 2011 թ. մարտից: