նախընտրելի դարձնելՍեպտեմբերի 23-ին վնասազերծված բանդայի գործով անցնող 19-ամյա Քյարամ Ամոյանին, ով նաեւ «Եզդի Ճակոյի» քրոջ որդին է, արյան զեղումով «Նուբարաշեն» քրեակատարողական հիմնարկից տեղափոխվել է Էրեբունի բժշկական կենտրոնի վերակենդանացման բաժանմունք: Այս մասին NEWS.am-ի թղթակցի հետ զրույցում տեղեկացրեց Քյարամ Ամոյանի մայրը` Կարինե Ամոյանը:
Հարազատների պատմելով, փետրվարի 6-ին, առավոտյան ժամը 9.00-ի սահմաններում, «Նուբարաշեն» ՔԿՀ-ում Քյարամը վատացել է, ճնշումը կտրուկ բարձրացել է, որի հետեւանքով ուղեղի մեջ արյան անոթը տրաքել է եւ ամբողջ արյունը լցվել է գլխի մեջ: Նա նաեւ կաթված է ստացել եւ ներկա պահին ընդհանրապես չի կարողանում խոսել, իսկ գիտակցությունը գնում-գալիս է: Սկզբում նույնիսկ ապրելու հույս չեն տվել:
Նրա ծնողներին հետաքրքրում է, թե 19 տարեկան երեխան ինչպե՞ս կարող է կաթված ստանալ: «Ինչպես են վարվել նրա հետ, որ նրա ճնշումն այդ աստիճան բարձրացել է եւ այսօրվա դրությամբ նրան ապրելու հույս չեն տալիս»,- բարձրաձայնում է մայրը: Տիկին Կարինեն նշում է, որ իրեն տեսակցելու հնարավորություն չեն տալիս, սակայն եթե այս անորոշությունը երկար շարունակվի, խոստանում է հենց հիվանդանոցում ինքնահրկիզվել:
Էրեբունիի հերթապա բժիշկ Արմեն Մուրադյանը NEWS.am-ի թղթակցի հետ զրույցում հաստատեց, որ Քյարամ Ամոյանը կաթված է ստացել: Բժշկի խոսքով, Քյարամ Ամոյանի առողջական վիճակը լավ չէ եւ ներկա պահին անում են հնարավորինը` նրա կյանքը փրկելու համար:
Բժշկին ուղղված այն հարցին, թե ի՞նչը կարող էր 19-ամյա տղային հանգեցնել այդ վիճակի, նա պատասխանեց. «Ըստ երեւույթին նա անոթային խնդիրներ է ունեցել, որի ֆոնի վրա կարող էր նմանատիպ խնդիր առաջանալ»:
Հիշեցենք, որ դեռեւս դեկտեմբերի 22-ին մեզ տված հարցազրույցում Քյարամ Ամոյանի մայրն ասել էր. «Մեր փաստաբանը փորձաքննության արդյունքներն է ստացել, որ Քյարամիս քրտինքը, մատնահետքերը, արյունը չի համընկնում այդ ավազակային հարձակումներ կատարողների հետքերի հետ, բայց դեռ նրան ազատ չեն արձակում: Ճիշտն ասած, առաջին հերթին, մտածում եմ երեխայի առողջական վիճակի մասին, որ վիրահատեն: Դիմել եմ նախագահի աշխատակազմին, որտեղ ասացին, որ կտեղափոխեն դատապարտյալների հիվանդանոց, բայց մինչ օրս չեն տեղափոխում: Այնինչ տղայիս անալգին, դիմեդրոլ են ներարկում եւ նա ամբողջ օրը սոված ծարավ պառկած է: Փաստաբանը ինչքան գնում է, ասում են, քնած ա, երբ գնում ա տղայիս խելքը գլուխը չի: Իբր ցանկանում են Քյարամիս ցավերը հանգստացնեն, բայց փորձում են տղայիս անջատելով ուրիշի մեղքը բարդել երեխայիս վրա: Իրական հանցագործները դրսում են»:
Կարինե Ամոյանը նշել է նաեւ, որ թույլ չի տվել, որ որդին դպրոցն ավարտելուց հետո ուսումը շարունակի կամ աշխատի, քանի որ առողջական խնդիրներ ունի: «Ծաղկաձորում բուռանով (ամենագնացով) շրջվելուց հետո հազիվ կյանքը փրկեցինք: 2006-ի հուլիսին են գլուխը վիրահատել, ինչից հետո խորհուրդ են տվել մշտապես գտնել նյարդաբանի հսկողության տակ: Մինչ օրս ոտքի մեջ շշեր են դրված, իսկ նյարդային համակարգը խանգարվել էր: Երբ այդ ավազակային հարձակումներն սկսվեցին տղաս Կրասնոդարում էր, իսկ վերադառնալուց հետո` հիվանդանանոցում էր պառկած»,- պատմել էր Քյարամ Ամոյանի մայրը:
Ավելի վաղ` NEWS.am-ը տեղեկացրել էր, որ սեպտեմբերի 23-ին, ավազակախմբի վնասազերծման գործողությունն իրականացվել է Ոստիկանության կազմակերպված հանցավորության դեմ պայքարի վարչության աշխատակիցների կողմից: Գործողությունն իրականացվել է մի քանի ուղղություններով: Գործողության ժամանակ կասկածյալներից մի քանիսը փորձել են փախուստի դիմել, սակայն Mercedes մակնիշի մեքենան վթարվել էր, իսկ 49-ամյա Գուրգեն Հայրապետյանը փախուստի ժամանակ ընկել էր ժայռից եւ մահացել: Բանդայի վնասազերծման գործողության արդյունքում ձերբակալվել էր 16 մարդ, որոնցից 8-ն ավելի ուշ կալանավորվել էին:
Հ.Գ. Քյարամ Ամոյանի մայրը խնդրում է, որ Մարդու Իրավունքների պաշտպանի գրասենյակն արձագանքի ստեղծված իրավիճակին:
Պատրաստեց Տաթեւ Մեսրոպյանը
