ԱՄՆ Սենատը հինգշաբթի մերժեց բանաձևը, որը պետք է արգելափակեր նախագահ Դոնալդ Թրամփի՝ Իրանին նոր հարվածներ հասցնելու հրամաններ տալու հնարավորությունը։ Դա տեղի ունեցավ հանրապետականների շրջանում պատերազմի վերաբերյալ աճող մտահոգության ֆոնին՝ միջանկյալ ընտրություններից առաջ, գրում է Washington Post-ը։

Բանաձևը մերժվեց 49 ընդդեմ 50 ձայների հարաբերակցությամբ, այն դեպքում, երբ հուլիսին այն հաստատել էր Ներկայացուցիչների պալատը։ Չորս հանրապետականներ՝ Կենտուկիից սենատոր Ռենդ Փոլը, Մեյնից Սյուզան Քոլինզը, Ալյասկայից Լիզա Մուրկովսկին և Հյուսիսային Կարոլինայից Թոմ Թիլիսը, գնացին Թրամփի դեմ և դեմոկրատների հետ միասին քվեարկեցին բանաձևի օգտին։ Միակ դեմոկրատը՝ Փենսիլվանիայից սենատոր Ջոն Ֆեթերմանը, հանդես եկավ դրա դեմ։

Վերջին շրջանում ավելի ու ավելի շատ հանրապետականներ են հրապարակավ քննադատում պատերազմը։ Անցյալ շաբաթ Ներկայացուցիչների պալատում յոթ հանրապետականներ քվեարկեցին նմանատիպ բանաձևի օգտին, որն ընդունվեց ստորին պալատի կողմից։ Իսկ Օհայոյից սենատոր Ջոն Հյուստեդը և Սենատի երկու հանրապետական թեկնածուներ, որոնք մրցակցային պայքարի մեջ են իրենց նահանգներում՝ Այովայից կոնգրեսական Էշլի Հինսոնը և Միչիգանից նախկին կոնգրեսական Մայք Ռոջերսը, այս շաբաթ կոչ արեցին դադարեցնելու պատերազմը։

1973 թվականի ռազմական լիազորությունների մասին բանաձևը՝ օրենքը, որի հիման վրա դեմոկրատները հասան ներկայիս քվեարկության անցկացմանը, նախատեսում է, որ նախագահը պետք է դուրս բերի ամերիկյան զորքերը, որոնք առանց Կոնգրեսի թույլտվության մասնակցում են արտասահմանում ռազմական գործողությունների, եթե Կոնգրեսն ընդունում է համապատասխան բանաձև։

Թրամփի վարչակազմը պնդում է, որ այս օրենքը հակասում է Սահմանադրությանը, իսկ այն դրույթը, որը Կոնգրեսին թույլ է տալիս ընդունել ռազմական լիազորությունների վերաբերյալ բանաձևեր, որոնց վրա նախագահը չի կարող վետո դնել, ունի էլ ավելի կասկածելի իրավական հիմքեր։

1983 թվականին ԱՄՆ Գերագույն դատարանը «Immigration and Naturalization Service v. Chadha» գործով որոշեց, որ Կոնգրեսը չի կարող նման կերպ սահմանափակել նախագահի՝ վետո դնելու իրավունքը։ Սակայն դեմոկրատները պնդում են, որ դատարանները երբեք չեն քննարկել, թե արդյոք այս նախադեպը տարածվում է ռազմական լիազորությունների վերաբերյալ բանաձևերի վրա։

Հանրապետականներն իրենց հերթին պնդում են, որ Գերագույն դատարանի որոշումը կիրառելի է նաև նման բանաձևերի նկատմամբ։