Իրանի գերագույն առաջնորդ Մոջթաբա Խամենեին կարգադրել է անհապաղ և արդյունավետ արձագանքել երկրի հակառակորդներից բխող ցանկացած հնարավոր սպառնալիքի՝ անկախ դրա բնույթից և աշխարհագրական ուղղությունից։ Այս մասին նա հայտարարել է Իրանի զինված ուժերի բարձրագույն հրամանատարության հետ հանդիպման ժամանակ, հաղորդում է Tasnim-ը։

Խամենեին լայնածավալ դիմակայության պատրաստականությունը համարել է հակառակորդին առավելագույնս զսպելու առանցքային պայմաններից մեկը։ Նրա խոսքով՝ ռազմական կամ ահաբեկչական հարձակումների վերսկսման դեպքում հենց Իրանն ու նրա զինված ուժերն են որոշելու հակամարտության ավարտի ժամկետն ու պայմանները։

Իրանի գերագույն առաջնորդը նաև հանձնարարել է թարմացնել հնարավոր թիրախների ցանկը, որպեսզի իրանցի զինվորականները կարողանան հարվածներ հասցնել հակառակորդների նյութական և ոչ նյութական ակտիվներին։ Այդ հակառակորդներին նա անվանել է «ամերիկա-սիոնիստական թշնամի»։

Այլ առաջնահերթությունների թվում Խամենեին նշել է ռազմական հետախուզության կատարելագործումը, սեփական պաշտպանական տեխնոլոգիաների զարգացումը, մարտավարության և ռազմական դոկտրինի թարմացումը, ինչպես նաև ժամանակակից տեխնոլոգիաների կիրառմամբ հետախուզական ու մարտական կարողությունների ամրապնդումը։

Հանդիպման ընթացքում Իրանի զինված ուժերի գլխավոր շտաբի պետ Ալի Աբդոլլահին, բանակի հրամանատար Ամիր Հաթամին և Իսլամական հեղափոխության պահապանների կորպուսի ղեկավար Ահմադ Վահիդին զեկուցել են Պարսից ծոցի ափին, Հորմուզի նեղուցի ու Օմանի ծոցի շրջանում, ինչպես նաև երկրի հյուսիսարևմտյան ու հարավարևելյան սահմաններին տեղակայված զորքերի պատրաստականության մասին։ Նրանց խոսքով՝ տարբեր տեսակի զինամթերքի, հետախուզական, օժանդակ և մարտական սպառազինության արտադրությունն աճել է մի քանի անգամ։

Խամենեին շնորհակալություն է հայտնել զինվորականներին, ոստիկանությանը, «Բասիջ» ուժերին և պաշտպանության նախարարության աշխատակիցներին՝ կատարած աշխատանքի համար։ Նա նաև ընդգծել է Իրանի և տարածաշրջանում նրա դաշնակից ուժերի միջև համակարգման ռազմավարական նշանակությունը՝ հայտարարելով, որ տարբեր ուղղություններով փոխգործակցությունն ազդում է Արևմտյան Ասիայում քաղաքականության և անվտանգության նոր կարգի ձևավորման վրա։