նախընտրելի դարձնելՎերին Լարսի անցագրային կետի տարուց ավելի փակ լինելը փոքր ինչ չի նվազեցրել այդ ճանապարհով Հայաստան բեռնափոխադրումների կարեւորությունը եւ այն բացվելուց անմիջապես հետո հսկայական թվով ապրանքներ Հայաստան կմտնեն հենց այդ ճանապարհով: Այս մասին NEWS.am-ի թղթակցի հետ զրույցում նման տեսակետ հայտնեց RAILVNESHTRANS ընկերության տնօրեն Արսեն Տեր-Կարապետյանը: Հիշեցնենք, որ Ռուսաստանն ու Վրաստանը համաձայնել են եկող տարվա մարտ ամսին բացել Վերին Լարսի անցակետը:
«Այս ընթացքում բեռնափոխադրումները կատարվել են այլ ուղիներով, սակայն Վերին Լարսի բացման խնդիրը շարունակում է մնալ արդիական, քանի որ դա տրանսպորտային ծախսերը կնվազեցնի, եւ ժամանակի առումով բեռների տեղափոխումն ավելի արագ կկատարվի»,- ընդգծեց նա: Հարցին, թե հնարավո՞ր է, որ բեռնափոխադրում իրականացնող ընկերությունները, արդեն հարմարվելով բեռները լաստանավով փոխադրելու տարբերակին, այլեւս չցանկանան օգտվել Վերին Լարսի բացվող անցակետից, Ա. Տեր-Կարապետյանը պատասխանեց. «Նման բան չի լինի: Վերին Լարսը բացվելուց հետո ապրանքների մեծ մասը անցնելու է հենց այդ անցակետով, քանզի դա ոչ միայն էժան է, քանի որ լաստանավային փոխադրումն անհամեմատ թանկ է, այլեւ ժամանակի առումով շահավետ է»: Նրա խոսքով, Հայաստան բեռնափոխադրումների մոտավորապես 30-40 տոկոսը կթեքվի դեպի Վերին Լարս: «Իհարկե, Եվրոպայից եկող բեռները կշարունակեն գալ ծովով, սակայն Ռուսաստանից եւ Ուկրաինայից եկող բեռների համար ամենաշահավետը Վերին Լարսն է»,- իր խոսքն ամփոփեց նա:
