նախընտրելի դարձնելՓոփ երաժշտության արքա Մայքլ Ջեքսոնից ոչինչ չժառանգած քույրերը եւ եղբայրներն իրավաբաններին մեղադրել են կտակը կեղծելու եւ երգչի մոր վրա ճնշում գործադրելու մեջ, որը նրան հասցրել էր կաթվածի: Ջեքսոնի աղջիկը մեղադրանքները սուտ է անվանել:
Տիտո, Ռենդի, Ժերմեն, Ջանեթ եւ Ռեբբի Ջեքսոններն իրենց մեղադրանքները նամակով ներկայացրել են իրենց եղբոր փաստաբաններին` Ջոն Բրանկեին եւ Ջոն Մաքլեյնին, գրում է New York Daily News-ը: Նամակի ներքո չեն ստորագրել ոչ երգչի մայրը, ոչ երեխաները, ոչ հայրը, որը նույնպես որոշ ժամանակ առաջ փորձել էր վիճարկել կտակը:
Ջեքսոնի 5 քույրերն ու եղբայրները փաստաբաններին գրել են, որ վերջիններս դադարեն իրենց եղբոր անշարժ գույքը կառավարել: «Մեր եղբայրն ասել է, որ զզվում է ձեզանից, եւ նա չէր ցանկանում, որ ձեզանից որեւէ մեկը նրա կյանքի կամ ունեցվածքի հետ կապ ունենա», - ասվում է նամակում:
Ըստ նրանց` Բրանքեն ու Մաքլեյնը ստել էին, որպեսզի ստիպեն Ջեքսոնի մորն ավելի մեծ գումար հատկացնել իրենց այն շահույթից, որը նա ստանում է փոփ արքայի ունեցվածքից, հաղորդում է NEWSru.com-ը:
Ջեքսոնները հիշեցրել են, որ փաստաբանները կեղծել են կտակի ստորագրությունը: Ռենդի Ջեքսոնը նման հայտարարությամբ հանդես էր եկել դեռեւս 2009 թվականին, իսկ 2010 թվականին դատարանը փաստաթուղթն օրինական էր ճանաչել` ժառանգորդ նշանակելով Ջեքսոնի երեք երեխաներին եւ մորը:
Հիշեցնենք, որ Մայքլ Ջեքսոնը վախճանվել է 2009 թվականի հունիսի 25-ին` Լոս Անջելեսում, 51 տարեկան հասակում: Ըստ հետաքննության` երգչի անձնական բժիշկ Քոնրադ Մյուրեյը նրան պրոպոֆոլ դեղամիջոցի մեծ քանակություն էր տվել, որն այլ դեղամիջոցների հետ փոխազդելով դարձել էր երգչի մահվան պատճառը:
