Այս գիշեր Բելառուսի մայրաքաղաք Մինսկ մեկնեց ՀՀ ԱԻՆ փրկարարների մանկապատանեկան թիմը, որը պիտի սեպտեմբերի 17-23-ը մասնակցի ազգային մանկական կրթական-առողջապահական «Զուբրյոնոկ» կենտրոնում կազմակերպվելիք պատանի հրշեջ-փրկարարների միջազգային հավաքին:

ԱԻՆ լրատվական ծառայությունից հայտնում են, որ դեռեւս հունիսին հայտարարված բաց մրցույթի արդյունքում ԱԻ նախարարությունում մայրաքաղաքի եւ մարզային դպրոցներից ընտրվել էին 12-16 տարեկան 7 երեխա (2 աղջիկ եւ 5 տղա):

Մասնակիցներին ընտրելիս հաշվի են առնվել նրանց առաջադիմությունը դպրոցում, գիտելիքներն արտակարգ իրավիճակների վերաբերյալ եւ գեղարվեստական ընդունակությունները, քանի որ հավաքի ընթացքում լինելու են տարբեր մրցույթներ ու մասնակիցները պետք է նաեւ փոքրիկ գեղարվեստական համարով ներկայացնեն իրենց երկիրը:

Ընտրական փուլը հաղթահարած երեխաների համար կազմակերպվել են հատուկ դասընթացներ (փրկարարական գործ, հրդեհաշիջում, առաջին բուժօգնություն, լող եւ այլն), ինչպես նաեւ տրամադրվել է հրշեջ-փրկարարի համազգեստ: 

Մեկնումից առաջ ՀՀ ԱԻՆ արտաքին կապերի վարչության աշխատակից, պատվիրակության ղեկավար Աղվան Սարգսյանը շնորհակալություն հայտնեց ԱԻ նախարար Ա. Երիցյանին, փրկարար ծառայության ղեկավարությանն ու երեխաների ծնողներին` աջակցության համար, նշելով, որ իրենք կաշխատեն միջազգային հավաքում բարձր պահել ՀՀ ԱԻ նախարարության անունը:

ԱԻՆ պատանեկան թիմի անդամ պատանիները նույնպես շատ ոգեւորված էին ու խոստացան պատվով կրել հայ հրշեջ-փրկարարի համազգեստը: