Մեկամսյա նորոգումից հետո վերաբացվել է Երեւանի քաղաքապետարանի ենթակայության համար 2 դպրոցը: Թեեւ ուսումնական պրոցեսսը սեպտեմբերի 1-ից էր մեկնարկել, սակայն հանդիսավոր վերաբացումը  կատարվեց դպրոցի 180-ամյա հոբելյանի օրը:

Երեւանի քաղաքապետարանի տեղեկատվության եւ Հասարակայնության հետ կապերի վարչությունից հայտնում են, որ Երեւանի քաղաքապետարանի հանրակրթության վարչության պետ Գայանե Սողոմոնյանը ներկաներին է փոխանցել Երեւանի քաղաքապետ Տարոն Մարգարյանի ուղերձը հոբելյանի կապակցությամբ եւ 180 տարվա փորձառություն ունեցող դպրանոցի մանկավարժական կոլեկտիվին Տարոն Մարգարյանի անունից պարգեւատրել է  Երեւանի քաղաքապետի պատվոգրով:

Քաղաքապետի հանձնարարությամբ մինչեւ ջեռուցման հերթական տարեշրջանը ամբողջությամբ կնորոգվի նաեւ դպրոցի ջեռուցման համակարգը:

Հարկ է նշել, որ դպրոցի եռահարկ շենքը հիմնանորոգվել է «Օգնիր դպրոցիդ» արշավի շրջանակում, շրջանավարտ Գարեգին Նուշիկյանի միջոցներով, ով դպրոցի մանկավարժական խորհրդի որոշմամբ պարգեւատրվել է Խաչատուր Աբովյանի անվան դպրոցի «Պատվո աշակերտ» մեդալով:

Ի դեպ, 180-ամյա այս դպրոցը Երեւանի առաջին պետական դպրոցն է եւ 1925 թվականից կրում է դպրոցի 6-րդ տնօրեն-տեսուչ Խաչատուր Աբովյանի անունը: