նախընտրելի դարձնել
Հայաստանի փոխվարչապետ, տարածքային կառավարման նախարար Արմեն Գեւորգյանն այսօր ընդունեց Ասիական զարգացման բանկի (ԱԶԲ) պատվիրակությանը:
ՏԿՆ հասարակայնության հետ կապերի բաժնից հայտնում են, որ հյուրերը ներկայացրեցին Հայաստանում կոշտ թափոնների կառավարման ազգային ռազմավարության մշակման հետ կապված աշխատանքների ընթացքը, քննարկեցին հետագայում ռազմավարության իրականացման հետ կապված հարցեր: Տեղեկացվեց, որ փաստաթղթի նախնական տարբերակը կառավարությանը կներկայացվի հունվարին:
Փոխվարչապետը ողջունելով կատարված աշխատանքները` միաժամանակ կարեւորեց ոլորտում ծրագրեր իրականացնող միջազգային մյուս կազմակերպությունների հետ համագործակցությունը, ինչպես նաեւ ընդգծեց ռազմավարության իրատեսական լինելու հանգամանքը: Նա հյուրերին առաջարկեց մասնակցել հոկտեմբերի 5-6-ը Ջերմուկում կայանալիք գյուղական համայնքների երկրորդ համաժողովին, որի աշխատանքային խմբերից մեկի քննարկման թեման վերաբերելու է հենց Հայաստանում կոշտ կենցաղային թափոնների կառավարման խնդիրներին` նշելով, որ այն սեփական մոտեցումները ներկայացնելու ու նաեւ համայնքապետերի առաջարկությունները լսելու լավ հնարավորություն կլինի:
