ՆախընտրելիԻնչպես հայտնի է «Խոսրովի անտառ պետական արգելոց» ՊՈԱԿ-ի տնօրենի պաշտոնը մնացել է թափուր նոյեմբերի 23-ին անցկացված «մրցույթից» հետո: Այդ օրվանից անցել է շուրջ երկու շաբաթ, սակայն «Խոսրովի անտառ պետական արգելոց» ՊՈԱԿ-ի տնօրենի թափուր պաշտոնի համար մրցույթի անցկացման նոր հայտարարություն չի արվել Բնապահպանության նախարարության կողմից: «Թռչկան» եւ «Խոսրով» քաղաքացիական նախաձեռնություններն այսօր` դեկտեմբերի 10-ին դիմում են հղել Բնապահպանության նախարարին, որում մասնավորապես նշված է.
«Կարեւորելով Խոսրովի անտառ պետական արգելոցի պահպանության եւ կառավարման հետ կապված հարցերը եւ անընդունելի համարելով բնության հատուկ պահպանվող տարածքի կառավարումը ժամանակավոր պաշտոնակատարի ձեռքում թողնելը, խնդրում ենք այս շաբաթվա մեջ հայտարարել «Խոսրովի անտառ պետական արգելոց» ՊՈԱԿ-ի տնօրենի թափուր պաշտոնի համար նոր մրցույթ եւ հրապարակել այդ հայտարարության տեքստը:
Միեւնույն ժամանակ, սույն մրցույթն ավելի թափանցիկ եւ արդար անցկացնելու համար առաջարկում ենք հայտարարության տեքստում հստակեցնել.
1. նշված թափուր պաշտոնը զբաղեցնելու համար պահանջները, մասնավորապես՝ համապատասխան բնագավառի բարձրագույն կրթությունը եւ որակավորումները («համապատասխան կրթություն» բառակապակցությունը տարաբնույթ ընկալման տեղիք է տալիս),
2. ներկայացվելիք հայեցակարգերի պահանջները, մասնավորապես`բովանդակային պահանջները, ակնկալվող ծավալը,
3. հանրայնացնել բոլոր թեկնածուների ինքնակենսագրությունները, մասնագիտական եւ աշխատանքային փորձի տվյալները,
4. հանրայնացնել նրանց կողմից ներկայացված`պետական կազմակերպության զարգացման եւ բարեփոխման հայեցակարգերը (ըստ հավակնորդների տեսակետի),
5. ապահովել մրցույթի, այդ թվում` հարցազրույցների հրապարակայնությունը:
Նկատի ունենալով այն հանգամանքը, որ լրացուցիչ աշխատանքներ կատարելու կամ տեղեկություններ ձեռք բերելու անհրաժեշտություն չկա, ուստի ակնկալում ենք ստանալ Ձեր պատասխանը «Տեղեկատվության ազատության մասին» ՀՀ օրենքի 6-րդ եւ 9-րդ հհ սահմանված 5-օրյա ժամկետում»,- ասված է նամակում:
