Երեւանի քաղաքապետ Տարոն Մարգարյանի հանձնարարությամբ փողոցներում ու մայթերում շարունակվող ձնամաքրման աշխատանքներին զուգահեռ , ջերմաստիճանի բարձրացմամբ պայմանավորված,  իրականացվում է նաեւ մայրաքաղաքի բազմաբնակարան , ինչպես նաեւ հասարակական նշանակության շենքերի ու շինությունների տանիքներից ձյան եւ կախված սառցաբեկորների հեռացման գործընթացը:   Խնդիրը անցորդների անվտանգ անցուդարձի  ապահովումն է, քանի որ ինչպես գոյացած սառույցը, այնպես էլ կտուրների եզրին կուտակված ձյունը,  ցած թափվելով, կարող են պոտենցիալ վտանգ սպառնալ մարդկանց կյանքի եւ առողջության համար:

Երեւանի քաղաքապետարանի տեղեկատվության եւ հասարակայնության հետ կապերի վարչությունից հայտնում են, թե այս աշխատանքներում Երեւանի քաղաքապետարանին տեխնիկապես, ինչպես նաեւ հրշեջ փրկարարների ներգրավմամբ աջակցում է ԱԻՆ Երեւանի փրկարարական ծառայությունը, համատիրությունների աշխատակիցները, ճանապարհային ոստիկանությունը,  ոստիկանության Երեւան քաղաքի վարչության աշխատակիցները: Բոլոր դեպքերում քաղաքացիների խորհուրդ է տրվում ցուցաբերել զգուշավորություն եւ հնարավորին խուսափել շենքերի ու շինությունների  անմիջական հարեւանությամբ անցուդարձ կատարելուց: