2012թ. ընթացքում հանրապետությունում արձանագրվել է թմրամիջոցների ապօրինի շրջանառության 1138 դեպք նախորդ տարվա 1525 դեպքի դիմաց:

Հայաստանի գլխավոր դատախազության տվյալներով, դեպքերը նվազել են 386-ով կամ 25%-ով։ Նվազել է նաեւ իրացման նպատակով թմրամիջոցների ապօրինի շրջանառության դեպքերը՝ 31.5 տոկոսով, կամ 239 դեպքով (2011թ.՝ 754, 2012թ. 515 դեպք)։ Առգրավվել է 23 կգ 440 գրամ տարբեր տեսակի թմրամիջոցներ (2011թ.՝ 128 կգ)։

Ձեռնարկված օպերատիվ քննչական միջոցառումների արդյունքում 2012թ. ընթացքում քրեական պատասխանատվության է ենթարկվել 686 անձ, որից 26-ը՝ կին, 5-ը՝ անչափահաս, 18-ը՝ այլ երկրների քաղաքացիներ։ Քրեական պատասխանատվության ենթարկված 686 անձանցից 180-ը մեղադրվել են թմրամիջոցների իրացման համար։

Գլխավոր դատախազությունում կարծում են, թե ներկայացված վիճակագրությունը վկայում է այն մասին, որ այս ոլորտում հանցագործությունների դեմ պայքարի կազմակերպման աշխատանքների բարելավման կարիք կա եւ 2012թ. 2-րդ կիսամյակի ընթացքում ձեռնարկվող օպերատիվ միջոցառումները հույս են ներշնչում, որ 2013 թվականի ընթացքում այս ոլորտում ցուցանիշների զգալի բարելավում կարձանագրվի։