The New York Times-ը, հղում կատարելով անվտանգության արևմտյան ծառայություններից մեկի աշխատակցին, հայտնել է, որ վերջին երկու ամսվա ընթացքում իրանական զինվորականները շաբաթը առնվազն 40 անգամ գրոհել են նավերը Հորմուզի նեղուցում։

Նրա տվյալներով՝ օգոստոսի սկզբից Իրանը շաբաթական իրականացրել է 30 գրոհ անօդաչու թռչող սարքերի կիրառմամբ և ևս 10 հարձակում՝ հակառազմանավային հրթիռների օգտագործմամբ, որոնք ուղղվել են Հորմուզի նեղուցում առևտրային նավերի դեմ։

Վերջին 10 օրում Իրանը հարվածներ է հասցրել առնվազն չորս նավի։ NYT-ի զրուցակիցը հավելել է, որ բազմաթիվ հարձակումներ մնում են հանրության ուշադրությունից դուրս, միաժամանակ նշվել է, որ հարվածները հաճախ վնաս չեն հասցնում նավերին։

Բրիտանական ՌԾՈւ-ի հովանու ներքո գործող մոնիթորինգային ծառայությունը հայտնել է, որ սեպտեմբերի 10-ից առնվազն 13 նավ, որոնցից շատերը լցանավեր են, ստացել են արկերի կամ դրանց բեկորների հարվածներ։ Այս թվերը կարող են ամբողջական չլինել, քանի որ հիմնված են նավերի անձնակազմերի կողմից կամավոր փոխանցվող հաղորդումների վրա։ Բացի այդ, այս դեպքում հարձակումների պատասխանատուները նշված չեն։

Ավելի վաղ ԱՄՆ իշխանություններն ու ամերիկյան լրատվամիջոցները վստահեցնում էին, որ էներգակիրների մատակարարումները վերադառնում են այն մակարդակին, որը նկատվում էր մինչև 2026 թվականի փետրվարի 28-ին ԱՄՆ-ի և Իսրայելի կողմից Իրանի վրա իրականացված հարձակումը։ NYT-ը նշել է, որ նավերը Պարսից ծոցից դուրս են գալիս Օմանի տարածքային ջրերով՝ ԱՄՆ ՌԾՈւ-ի կողմից վերահսկվող երթուղով, ամերիկյան կործանիչների և հարվածային ուղղաթիռների պաշտպանության ներքո։ Որոշ նավեր անջատում են տրանսպոնդերները, որպեսզի մնան աննկատ։

Սակայն դիտորդները կարծում են, որ ԱՄՆ-ի համար դժվար կլինի իրականացնել նավագնացության պաշտպանության գործողություններ անորոշ ժամկետով։ Kpler վերլուծական ընկերությունը նշել է, որ տարածաշրջանից էներգակիրների արտահանման աճը մատակարարները մեծապես ապահովել են Հորմուզի նեղուցը շրջանցող ուղիների օգտագործման շնորհիվ։