նախընտրելի դարձնելԱՊՀ դիտորդական առաքելությունը Հայաստանի նախագահի նախօրեին կայացած ընտրությունը լեգիտիմ է ճանաչել:
Առաքելության գործադիր քարտուղար Սերգեյ Լեբեդեւը հայտնել է, որ ընտրությունները ազատ են եղել, բաց, մրցակցային եւ համապատասխանել են միջազգային չափանիշներին:
ԱՊՀ դիտորդական առաքելության կազմում ԱՊՀ ութ երկրներից 212 ներկայացուցիչներ են ընդգրկված: Նրանցից 25-ը Հայաստան էին ժամանել հունվարի 24-ին՝ ընտրությունների ընթացքի երկարաժամկետ դիտարկում անցկացնելու համար: Մնացածները հանրապետություն ժամանել էին ընտրությունների նախօրեին: ԱՊՀ դիտորդներն այցելել էին ավելի քան 1000 ընտրատեղամասեր:
«Մենք ընտրությունների նախապատրաստմանն ու անցկացմանն անկողմնակալ գնահատական տալու հնարավորություն ենք ստացել, հանդիպել ենք ընտրական հանձնաժողովների, թեկնածուների շտաբերի, իշխանության մարմինների, ԿԸՀ ներկայացուցիչների հետ»,- հայտնել է Սերգեյ Լեբեդեւը: Նրա խոսքով՝ դիտարկման ընթացքում ընտրությունների լեգիտիմությունը կասկածի տակ դնելու փաստեր չեն արձանագրվել: «Ընտրությունները պետության Սահմանադրությանը եւ ընտրական օրենսդրությանը համապատասխան են անցկացվել», - նշել է Լեբեդեւը:
Նրա խոսքով՝ դիտորդները դիտարկման ընթացքում խախտումների դեպքեր են հայտնաբերել, սակայն այդ դեպքերը չէին կարող ազդել քվեարկության արդյունքների վրա: Առավել եւս՝ ընտրողների տոկոսային հարաբերակցությունը հաշվի առնելով:
Խախտումների թվում առաքելության քարտուղարը նշել է այն փաստը, որ որոշ ընտրողներ անունները ցուցակում չեն գտել: Սակայն հանձնաժողովների նախագահները տեղում քաղաքացիներին բացատրել են, թե որտեղ է պետք դիմել:
Որոշ ընտրատեղամասերում մնացել էին առաջատար թեկնածուի դիմանկարները: Այս հանգամանքը ԱՊՀ դիտորդները բացատրում են նրանով, որ քանզի խոսքը դպրոցների եւ մանկապարտեզների մասին է, կազմակերպիչները պարզապես մնոռացել են հանել պետության ղեկավարի դիմանկարները:
Առաքելության գործադիր քարտուղարը որպես դրական կողմ նշել է այն փաստը, որ նախորդ տարիներին Հայաստանի ընտրական օրենսդրությունը կատարելագործվել է՝ միջազգային փորձագետների խորհուրդներին համապատասխան, ինչն այն ավելի է մոտեցրել միջազգային չափանիշներին: «Ընտրական օրենսգիրքը երաշխավորում է քաղաքացիների ազատ կամարտահայտման իրավունքը», - ընդգծել է Սերգեյ Լեբեդեւը:
Մյուս դրական գործոնը, ըստ նրա, այն է, որ ներկա քարոզարշավը նախորդից հանգիստ է ընթացել: Սերգեյ Լեբեդեւն այս համատեքստում նշել է նախագահի թեկնածուների մեծամասնության ելույթների չափավորությունը, որոնք չեն դիմել սեւ PR-ի, հարգալից վերաբերմունք են դրսեւորել միմյանց նկատմամբ:
Լրատվամիջոցների հասանելիության վերաբերյալ ԱՊՀ դիտորդները վստահ են, որ բոլոր թեկնածուներն իրենց ծրագրերը լիարժեք ներկայացնելու հնարավորություն են ունեցել, եւ մեծ մասն օգտվել է ընձեռված հնարավորությունից:
Միաժամանակ, ԱՊՀ դիտորդներին վշտացրել եւ մտահոգել է նախագահի թեկնածու Պարույր Հայրիկյանի դեմ մահափորձը: «Փառք Աստծո, որ նա իր մեջ ուժ գտավ քարոզարշավը շարունակելու, եւ նախընտրական քարոզարշավի ընթացքը չխախտվեց», -նշել է Սերգեյ Լեբեդեւը:
Խոսելով նախագահի մյուս թեկնածու Անդրիաս Ղուկասյանի հացադուլի մասին՝ ԱՊՀ ներկայացուցիչը նշել է, որ ակցիան մի փոքր «ստվերել է», բայց դա «իր իրավունքն է»:
