նախընտրելի դարձնելԱյսօր՝ փետրվարի 19-ին, հայ մեծանուն գրող Հովհաննես Թումանյանի ծննդյան եւ գիրք նվիրելու համաշխարհային օրն է: Այս առիթով Հայաստանում մեկնարկում է «Գրքի բանկ» ծրագիրը:
«Գրքի բանկ» ծրագրի նախաձեռնող խումբը սիրով հրավիրում է բոլորին մասնակից դառնալ ծրագրին եւ վաղը՝ ժամը 12:00-ին գրքով այցելել Ավ. Իսահակյանի տուն-թանգարան (ք. Երեւան, Զարոբյան 20), որտեղ ծրագրի կազմակերպիչները կներկայացնեն ծրագիրը եւ կպատասխանեն ներկաների հարցերին:
Ստորեւ ներկայացնում են «Գրքի բանկ» ծրագրի նախաձեռնող խմբի հայտարարությունը.
Տոմսի փոխարեն գիրք. մեկնարկել է «Գրքի բանկ» ծրագիրը
Երևան, 19 փետրվարի 2013թ. – Այսօր՝ հայ մեծ գրող Հովհաննես Թումանյանի ծննդյան և գիրք նվիրելու համաշխարհային օրվա առթիվ մեկնարկել է «Գրքի բանկ» ծրագիրը։ Այն իրականացվում է «Ֆլեշմոբ Դիվիզիա» ՀԿ-ի նախաձեռնությամբ, Քաունթերփարթ ինթերնեշնլ հայաստանյան ներկայացուցչության, ԱՄՆ ՄԶԳ-ի ու ՀՀ մշակույթի նախարարության աջակցությամբ, «Երևանը գրքի համաշխարհային մայրաքաղաք» նախագծի շրջանակում:
«Գրքի բանկ» նախաձեռնության շրջանակում փետրվարի 19-23-ը բոլոր ցանկացողները կարող են անվճար այցելել Երևանի 20 թանգարաններ (http://bookbank.am/museums.pdf)՝ մուտքի տոմսի փոխարեն նվիրելով գեղարվեստական կամ գիտահանրամատչելի գրքեր: Ծրագրի նպատակն է ամրապնդել գիրք նվիրելու և կարդալու մշակույթը Հայաստանում, հասարակությանը մասնակից դարձնել համայնքային զարգացմանը, ինչպես նաև աջակցել համայնքային գրադարաններին։ «Գրքի բանկ»-ին նվիրված բոլոր գրքերը փոխանցվելու են Շիրակ, Լոռի, Տավուշ, Վայոց Ձոր և Սյունիք մարզերի համայնքային գրադարաններին:
Ծրագրում ընդգրկված թանգարանները բաց են ժ. 11:00-ից -16:30-ը, սակայն ցանկացողները կարող են գրքեր նվիրաբերել նաև Երևան քաղաքի 10 տարբեր վայրերում տեղադրված «Գրքի բանկ»-ի պահարաններում: Կազմակերպիչներն առաջարկում են գրքերի շապիկների ներսի մասում կոկիկ զետեղել նվիրողի անունն ու ստորագրությունը:
Ստեղծվել է նաև կայք՝ bookbank.am, որի միջոցով հետագայում հնարավոր է տեղեկանալ, թե որ գրադարանում է հայտնվել յուրաքանչյուրի նվիրած գիրքը:
