«Օգնել կարող ենք ամենքս» նախաձեռնության թիմը փետրվարի 24-ին կրկին այցելել է Ստեփանավան՝ ազգությամբ եզդի Խաթոյանների ընտանիքի համար հավաքված օգնությունը տրամադրելու նպատակով, որում ներառված են եղել ձմեռային տաք հագուստ, կոշիկներ, սնունդ, փոքրիկներին խաղալիքներ, բաճկոններ, վերարկուներ ու տակդիրներ:

Նախաձեռնության շրջանակներում ներկայացված եւ ներկայացվելիք ընտանիքներին ձմեռային տաք բաճկոններ է տրամադրել նաեւ ՀՀ վարչապետ Տիգրան Սարգսյանը: Հատկացված սննդի մի մասը տրամադրել է ՀՀ Աշխատանքի եւ սոցիալական ապահովության հարցերի նախարարությունը:

Նախաձեռնության օգնությամբ Խաթոյանների համար ՎՏԲ բանկում բացվել է հաշվեհամար:

Ընտանիքին այսօր տրամադրված օգնությունը մի մասն է միայն, առաջիկա օրերին սննդի հերթական խմբաքանակը կհանձնվի Խաթոյաններին:

ԱՄՆ-ում բնակվող մեր հայրենակիցները եւս խոստացել են պարբերաբար օգնել Խաթոյանների ընտանիքին ինչպես գումարի, այնպես էլ հագուստի ու սննդի տեսքով:

Մեր աշխատակիցների օգնությամբ առաջիկայում կփորձենք լուծել նաեւ Խաթոյանների ընտանիքի անդամներից մի քանիսի փաստաթղթային հարցերը:

Ընտանիքին անանուն բարերարի կողմից վաղը կտրամադրվի նաեւ որոշակի գումար: Նախաձեռնությունն իր շնորհակալությունն է հայտնում բոլոր այն մարդկանց ու կազմակերպություններին, ովքեր օգնել եւ շարունակում են օգնել դժվարի իրավիճակներում հայտնված ընտանիքներին:

Պետք է նշել, որ այս օրերին Խաթոյանների ընտանիքի դուստրը՝ 14-ամյա Մանանա Խաթոյանը, մի քանի օր է, ինչ տեղափոխվել է Ստեփանավանի բժշկական կենտրոն: Երեխայի վիճակը գնալով ավելի է վատանում:

«Օգնել կարող ենք ամենքս» նախաձեռնության թիմն այսօր տեսակցել է նաեւ Մանանային: Զրուցեցինք նաեւ բժիշկների հետ, որոնք հայտնել են, որ Մանանայի վիճակը շարունակում է վատանալ: Աղջնակի մոտ ախտորոշվել է ձախակողմյան թոքաբորբ, ինֆեկցիոն ալերգիկ միոկարդիտ, արյան շրջանառության անբավարարություն, 2-րդ ֆունկցիոնալ դաս:

Մանանան ամեն ամիս ունենում է վիճակի սրացում, սակայն սոցիալական ծանր պայմանների պատճառով շատ հաճախ ծնողներն ու աղջիկն ինքը հրաժարվում են բժշկական ծառայություններից՝  հասկանալի պատճառներով, հաղորդում է lorinews-ը:

Նշենք, որ «ՎՏԲ-Հայաստան» բանկում գործում է հաշվեհամար՝ Խաթոյանների ընտանիքին ֆինանսական օժանդակություն ցուցաբերելու համար:

AMD 16033009050900

USD 16033009050901

EUR 16033009050902

RUR 16033009050903