Ընտրությունները, ինչպես եւ սպասվում էր, վատն էին, պաշտոնական արդյունքները՝ կանխորոշված: Այդ մասին այսօր՝ փետրվարի 26-ին ՀՀ Ազգային Ժողովի հայտարարությունների ժամին հայտարարեց ՀՅԴ խմբակցության անդամ Արմեն Ռուստամյանը:

«Կանխորոշվածության հիմնական պատճառը մնաց նույնը՝ պետության ողջ ռեսուրսի յուրացումը իշխող քաղաքական ուժի կողմից: Դրա ակնհայտ դրսեւորումներն էին ոչ միայն ընտրատեղամասերում կատարված կեղծիքները, այլեւ իշխանության վերարտադրման գործում թերացած պաշտոնյանների հրաժարականների շքերթը: Աբսուրդ է, թե ինչո՞ւ ընտրված համայնքապետը պիտի համապետական ընտրության արդյունքներով հրաժարական տա»,- ասաց Ա. Ռուստամյանը:

Նրա կարծիքով՝ իշխանությունների համար անակնկալ եւ աննկատ կերպով ընդդիմադիր ընտրազանգվածը ինքնակազմակերպվեց եւ կենտրոնացավ մեկ թեկնածուի շուրջ: Ինքնաբերաբար ձեւավորվեց միասնական թեկնածու, որից այդքան խուսափում էին իշխանությունները, եւ  նախագահի ընտրության առաջին փուլը,  ըստ էության, ընթացավ երկրորդ փուլի տրամաբանությամբ:

Լուսանկարը՝  Արսեն Սարգսյանի/NEWS.am