նախընտրելի դարձնելՀայաստանի վերաքննիչ քրեական դատարանը՝ դատավոր Արշակ Խաչատրյանի նախագահությամբ, այսօր` մարտի 5-ին, անփոփոխ է թողել խոշոր չափերով եւ կաշառք ստանալու պատրվակով խարդախության մեջ մեղադրվող ՀՀ ԱԱԾ նախկին քննիչ Վլադիմիր Կոթոլյանի գործով Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանի դեկտեմբերի 13-ի դատավճիռը:
Վերաքննիչ դատարանն այսպիսով մերժել է մեղադրող Աշոտ Նադոյանի եւ պաշտպան Վաղարշակ Գեւորգյանի բողոքները:
Պաշտպանական կողմը միջնորդում էր ամբողջությամբ բեկանել Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանի դեկտեմբերի 13-ի դատավճիռը, Վլադիմիր Կոթոլյանի նկատմամբ քրեական գործի վարույթը կարճել եւ դադարեցնել քրեական հետապնդումը: Մերժելու դեպքում կողմը միջնորդում էր նշանակել նույն հոդվածի սանկցիայով նախատեսված ազատազրկման հետ չկապված պատիժ` տուգանք կամ նվազագույն կամ համաչափ պատիժ: Մեղադրող կողմը նույնպես միջնորդում էր բեկանել դատավճիռը՝ սակայն պատժաչափի խստացմամբ՝ Վլադիմիր Կոթոլյանին մեղավոր ճանաչել նախկին՝ կաշառք ստանալու մեղադրանքով եւ դատապարտել ազատազրկման 7 տարի ժամկետով` 1.484.560 ՀՀ դրամ գումարը չգերազանցող անձնական գույքի մեկ երրորդ մասի բռնագրավմամբ:
Ի դեպ, Վ.Կոթոլյանը գործով առաջին դատաքննության ավարտին հանցավոր էր ճանաչվել կաշառք ստանալու մեջ եւ դատապարտվել 7 տարվա ազատազրկման, սակայն հետագայում դատավճիռը բեկանվել էր եւ ուղարկվել նույն դատարան՝ նոր կազմով քննության: Դատավոր Մխիթար Պապոյանի նախագահությամբ կայացված դատավճռով ՀՀ քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափերով կաշառք ստանալու մեղադրանքը վերաորակվել էր ՀՀ քրեական օրենսգրքի 178-րդ հոդվածի 2-րդ մասի 2-րդ եւ 5-րդ կետերով մեղադրանքի՝ խարդախություն՝ խոշոր չափերով եւ կաշառք ստանալու պատրվակով, իսկ Վ.Կոթոլյանը դատապարտվել 5 տարվա ազատազրկման: Նրա նկատմամբ կիրառվել էր համաներումը, եւ նրա պատժաչափի չկրած մասը մեկ երրորդով կրճատվել էր:
Վ.Կոթոլյանի պաշտպան Վաղարշակ Գեւորգյանը «Փաստինֆո»-ի թղթակցին հայտնեց, որ անպայման բողոքարկելու է Վերաքննիչ դատարանի որոշումը ՀՀ վճռաբեկ դատարան, հաղորդում է «Փաստինֆոն»:
